I-yob 4 - RUAC KUƆTH IN RƐL RƆ

Ruac Ɛ-li-padh kɛ I-yob

¹ Kä cu Ɛ-li-padh raan Te-man I-yob loc i̱,

² “Mi ci raan ruac kɛ ji̱, deri gaak? Ku duundɛ la ɣöö thilɛ ram mi dëë pen ruac.

³ Kä carɛ, ci nɛy da̱ŋ di kulɛ ruac, kä ci nɛy ti thil lua̱ŋ bum.

⁴ Laatku ca nɛy ti ca rɔ̱ luär luäk, kä ca nɛy ti lathɛ bum.

⁵ Kä ɛn täämɛ riɛk tëë kɛ ji̱, cɛ rɔ riet ji̱, kä jeki bɛ̈cdɛ, a ci thil buɔ̱m.

⁶ Kä /cɛ bi kua̱ luthdu kɛ Kuoth bi kua̱ lua̱ŋdu mɔ kä bi thil bɛ̈ɛ̈lädu kua̱ ŋa̱thdu?

⁷ “Kä carɛ täämɛ, ɛ ram in mi̱th mi thil bɛ̈ɛ̈l kä ca näk? Kiɛ gua̱n cuŋni mi ca däk?

⁸ Kä min ŋa̱cä, nɛy tin la̱tkɛ ni jiäk kɛnɛ nɛy tin la̱t kɛ dueer, jekɛ ni jiäk kɛnɛ dueer.

⁹ Däk yiëë Kuɔth kɛ, kä näk ɛ kɛ kɛ gakdɛ.

¹⁰ La bur lony kä ŋa̱a̱rkɛ, kä ci lɛc lonyni tin di̱t töl.

¹¹ La li̱w lony kɛ ɣöö thilɛ ley mi camɛ, kä la däk dɛy luɔny piny.

¹² “Tëë kɛ riet mi cua nöŋ ɣä kɛ tɛ̱̈ɛ̱̈, kä cua jɛ liŋ ɛn ruac luɔm ɛmɔ.

¹³ Ce̱tdɛ kɛ läk mi jiääk kɛ wäär, min la bä mɔ ci naath rɔ̱ kuɛr ni̱n ɔ.

¹⁴ Cuɛ ɣä kuer dual kɛnɛ lath mi di̱i̱t, cuɛ kɛ wä lath amäni cɔ̱wkä.

¹⁵ Kä cu jiɔam ben kɛ nhiamdä, kä cuɛ miem pua̱a̱nydä jiɛc.

¹⁶ Kä cuɛ cu cuɔ̱ŋ, duundɛ ɣöö /cä jɛ dëë lar i̱ ɛŋu. Kä ta̱a̱dɛ tëë waaŋdä, kä ci ɣɔw biɛt a til, cua̱ jɔw liŋ i̱,

¹⁷ ‘Tëë kɛ ram mi dëë te ni jɛn kɛ cuŋ ɛlɔ̱ŋ kä Kuoth? Kä tëë kɛ ram mi dëë gɔaa ni jɛn kä Cääkdɛ?

¹⁸ Kä mi /ci Kuoth ja̱ŋdɛ ŋäth, kä mocɛ jääkdɛ duer,

¹⁹ derɛ kulɛ te i̱di kɛ nɛy tin cieŋ duëli muɔ̱ɔ̱n, tin ca yiath piny rɛy tupä, tin däk tor kɛ.

²⁰ Tin la däk kɛ kam ruɔ̱nwaaŋ kɛnɛ thiaŋ, tin la däk a thil lär lär.

²¹ Mi ca nyinkiɛn diaal naŋ la kɛ cua̱ li̱w ɛ dak pɛliɛn.’