I-yob 39 - RUAC KUƆTH IN RƐL RƆ

¹ “Ji̱n ŋäc i̱ gua̱a̱th in la di̱eth kɛ det dɔaar? Ji̱n la nɛni thi̱i̱l dɔaar mi dap kɛn gaatkiɛn?

² Ji̱n deri päth tin liac kɛ kɛ ŋa̱c, kiɛ ŋäci gua̱th in la di̱ethkɛ kɛ,

³ min cikɛn rɔ tɛ̱̈ɛ̱̈ kɛ ɣöö bikɛ di̱eth, gua̱th in di̱eeth kɛn dɛykiɛn?

⁴ Kɛnɛ min la pith gaatkiɛn ni dɔɔr a bikɛ bum, kä la kɛn cua̱ däk piny kɛ manikiɛn.

⁵ “Kä ɛŋa ɛ nëë jak muul dɔaar kä bi cieŋ a lɔr? Kä ɛŋa ɛ nëë lony yieen muɔ̱l in puɔl puɔl?

⁶ Kä cä dɔr mi di̱i̱t ka̱m jɛ ala cieŋdɛ, kɛnɛ mun milɛkä ala gua̱a̱th cieŋädɛ?

⁷ Kä /cɛ ta̱a̱ rɛy wec go̱o̱r, kä /cɛ jɔw raam in kɔt jɛ liŋ.

⁸ Kä cɛ wuɔ̱th päämni jakä gua̱a̱th la̱kdɛ, kä go̱rɛ ni juaac tin tɔ̱ɔ̱c.

⁹ “Ji̱n deri lät kɛ tuut mok in te dɔɔr? Kä jɛn bɛ wäär thuk rɛy wecdu?

¹⁰ Deri jɛ yiën pur a bɛ nhɔk, kiɛ derɛ ji̱ guɔ̱ɔ̱r mi wi̱i̱ jɛ yɔ̱a̱c pur rɛy löli?

¹¹ Deri ŋäth ni buɔ̱mdɛ min di̱i̱t, kiɛ deri lätku diaal päl kɛ kui̱cdɛ?

¹² Ji̱n deri jɛ ŋäth i̱ bɛ luny jɔk mi ca jɛ lony, derɛ bɛlku nööŋ guäth in bakɛ lɔk thi̱n?

¹³ “Kä wuut la ɣärɛ gɔ̱kɛ ni liakä, kuɛla ɣöö kɛn gɔ̱kɛ kɛnɛ juät tɔ̱tɔ̱ /kɛ nyin tɛthä lɔaac kä jɛ?

¹⁴ Kä kɛ ɣöö la bänyɛ toŋkɛ piny ni baaŋ, a bi piny kɛ jak kä leth.

¹⁵ /Cɛ jɛ ŋäc ɛn ɣöö dëë kɛ dɔany kɛ ciök, kiɛ dee ley dɔaar kɛ dɔany.

¹⁶ La ciɛŋɛ gaatkɛ ce̱tkɛ mi /cikɛ gaatkɛ, a cäŋ bi la̱tdɛ la baŋ, ŋotdɛ /cɛ dual,

¹⁷ kɛ ɣöö /ken Kuothɛ ka̱m pɛl, kä thilɛ jɛ ŋäc ŋɔaani.

¹⁸ Kä mi cɛ riŋ, la lenyɛ ni gua̱n jiöŋköör kɛ pual.

¹⁹ “Ɛ ji̱n ɛ nëë moc jio̱ŋko̱o̱r guëth, kiɛ ɛ ji̱n läth miem ŋua̱a̱kdɛ thi̱n ɔ?

²⁰ Ɛ ji̱n la jak jɛ kä ka̱c ce̱tkɛ rak ɔ? Kä cäŋ ɛ niɛ thiëmdɛ ɛ guëth.

²¹ Mi cɛ wa̱t rɛy täpä la liakɛ buɔ̱mdɛ, la wëë rɔ cuɔt ni ko̱o̱r.

²² Jɛn /cɛ dual, kä /cɛ rɔ la barɛ ko̱o̱r.

²³ Kä jɛn la thiäŋ jɔkdɛ kɛ bääri kuen kueen, kɛ yio̱w ko̱o̱r ti muɔth muɔɔth kɛnɛ ri̱epni.

²⁴ Kä mi määtdɛ piny kɛ wuɔ̱r guëth, /cɛ la cuŋɛ amäni mi cɛ jɔw kaaŋä köör liŋ.

²⁵ Mi ci kaaŋ köör ku wak, bɛ cu wee i̱, ‘Ɛ jɛn!’ Bɛ ko̱r ku liŋ ni guäth mi nɔ̱a̱n, ruac kua̱ri, kɛnɛ rɔaliɛn.

²⁶ “Ɛ pɛlu ɛn min la pär kɛ cuɔɔr, min la wä kɛ jɛ ni peek cuëëc ɣɔaa?

²⁷ Lär ɛ ji̱n ɛ jɛ ɛn ɣöö bɛ wä wuɔ̱thni päämni nhial, kä bɛ duelɛ la̱t ni nhial?

²⁸ Kɛ ɣöö la te duelɛ ni rɛy päämni, ni rɛy kɔ̱a̱kni pa̱a̱m tin ciɛw ciɛɛw.

²⁹ Kä bɛ ley in kakɛ cu guic niɛ wi̱ni, kɛ ɣöö la nën wäŋkɛ ni guäth mi nɔ̱a̱n.

³⁰ Kɛ ɣöö la loot gaatkɛ ni riɛm, kä gua̱a̱th ɔ ca duɔ̱ɔ̱r näk thi̱n ɔ tëë thi̱n.”