I-yob 38 - RUAC KUƆTH IN RƐL RƆ

Luɔ̱c Kuɔth kɛ I-yob

¹ Kä ɛnɔ cu Kuoth I-yob luɔ̱c ruac kɛ rɛy jiɔam wëë i̱,

² “Kä ɛŋa mi lo̱k lui̱k pa̱ny kä jɛn kui̱c ɛ ŋɔaani?

³ Täämɛ ji̱n rial ni rɔ ikä ce̱tkɛ wut mi bum, bä ji̱ thiec kä bi ɣä loc.

⁴ “Ji̱n ti̱i̱ winith mëë tuɔɔkä wi̱c muɔ̱ɔ̱n kɛ la̱t? Lär ni jɛ ɣä mi ti̱i̱ ŋäc kɛ jɛ.

⁵ Kä ɛŋa ɛ nëë laar jɛ bɛ di̱t inɔ? Ɛ puc ŋäci jɛ! Kä ɛŋa ɛ nëë theem jɛ?

⁶ Kä tin ka̱pkɛ jɛ a bum tekɛ winith? Kiɛ ɛŋa ɛ nëë ŋäc ɣöö ca kɛr agɔaa?

⁷ Mëë cukɛ ki̱et amäni ciɛr bakä ɣɔaa, kä cu gaat Kuɔth diaal ki̱et kɛ tɛ̈th lɔaac?

⁸ “Kä ɛŋa ɛ nëë gäk bäpdiit kɛ thiekni mëë cɛ mak?

⁹ Mëë cä pua̱a̱r la̱t ala bieynikɛ, kä cä muth la̱t ala duŋ kuɔ̱mdɛ.

¹⁰ Kä cua̱ gëëkɛ rialikä, kä cua̱ jɛ moc kɛ gääkni kɛnɛ thiekni,

¹¹ kä cua̱ jɛ jiök i̱, ‘Ɛ jɛn pekdu ɛnɛ thilɛ ji̱ mi dɔ̱ŋ mi wä nhiam, kä bi muaŋ kacädu la pek niɛ guäth ɔ’?

¹² “I-yob ji̱n ci ɣɔw met jakä bak ni mëë kua ji̱ dap, kä curi bak ɣɔaa jak kä ŋäcɛ gua̱a̱thdɛ?

¹³ Kiɛ curi bak ɣɔaa jak kä dhiacɛ muth, a bi jiäk tin te rɛydɛ thil?

¹⁴ Kä bi ta̱a̱ muɔ̱ɔ̱n cu jɔɔc ce̱tkɛ biɛl kɛnɛ bi̱i̱ mi bo̱r.

¹⁵ Kä ji̱ dueeri ca buay nɔa̱a̱n kɛ kɛ, kä ca buɔ̱mdiɛn to̱lkä piny.

¹⁶ “Ji̱n I-yob ci met wä lo̱nyä pi̱i̱ni yiëër bäpdiit, kiɛ ci met wä ja̱l pinydɛ min lueŋ lueŋ?

¹⁷ Kä cua ji̱ met nyuɔ̱th thiekni li̱eth, kiɛ ci thiekni muɔ̱th met nɛn?

¹⁸ Ji̱n ŋäci pëk ɣɔaa diaal? Lär ni jɛ ɣä mi ŋäci kɛn ti diaal ti̱ti̱.

¹⁹ “Kä gua̱a̱th in cieŋ buay thi̱n ɛ gua̱a̱th in mi̱th, kä gua̱a̱th in te muth thi̱n ɛni?

²⁰ Kɛ ɣöö deri mɔ cu naŋ ni guäthdɛ pa̱ny, kiɛ deri duɔ̱pkiɛn nyuɔ̱th kɛ a bikɛ wä.

²¹ Ŋäc i̱ jɛ, ɛn ɣöö dapkɛ ji̱ ni wal, kä run diëëthdu ŋuankɛ!

²² “Kä ji̱n ŋäci gua̱a̱th in la tɔ̱a̱wkɛ thäc thi̱n, kiɛ ŋäci gua̱a̱th in la cieŋ pi̱ nhial thi̱n?

²³ Tin cä tɛ̱̈ɛ̱̈ kɛ kui̱c gua̱th in bi ɣɔw tekɛ rik, kɛ cäŋ ko̱o̱ri wec muɔ̱ɔ̱n.

²⁴ Kä ŋäci gua̱a̱th in da̱a̱kɛ buay thi̱n, kiɛ gua̱a̱th in da̱a̱kɛ jiɔam kuec känyä ca̱ŋ thi̱n rɛy ɣɔaa?

²⁵ “Kä ɛŋa ɛ nëë rial dɛ̈m nhial ikä, kä cu ma̱a̱rɛ lɛni la̱t bä,

²⁶ min la jak nhiaal kä dɛm amäni gua̱th ti /ci naath cieŋ thi̱n, kɛnɛ kuër tin thil naath,

²⁷ min la ro̱ŋ ni muɔ̱n ti te baaŋ, kä jak juaac dɔaar kä pith?

²⁸ “Kä nhiaal gua̱n ɛŋa, kä rur ɛ duŋ ŋa?

²⁹ Kä pi̱ tin kɔ̱a̱c kɔ̱a̱a̱c bäkɛ jic ŋa, kä ɛŋa ɛ nëë di̱eth thäc?

³⁰ Kä pi̱ la bumkɛ ɛ tet ce̱tnikɛ dööl, kɛ ɣöö la pi̱ bäpdiit rɔ̱ a kääp ɛ bum.

³¹ “Ji̱n deri ciɛr pi̱thä yiɛn kɛɛl a bikɛ mat, kiɛ deri kuɛl lony a bikɛ te gööli?

³² Ji̱n deri ciɛr nhial diaal ta̱a̱diɛn ŋa̱c, kiɛ deri kuaylɛt buɔth kɛnɛ gaatkɛ?

³³ Ji̱n ŋäci ŋuɔ̱t rööl nhial? Kä deri ŋuɔ̱tkiɛn la̱t ɛn piny ɛmɛ?

³⁴ “Kä ji̱n I-yob deri pua̱a̱r cɔl, i̱ bia dɛ̈mɛ wi̱i̱dä?

³⁵ Deri yiel nhial jäk kä raar a bikɛ wä, kä ba ji̱ jiök i̱, ‘Kɔn ti’?

³⁶ Kä ɛŋa mi ci pua̱a̱r moc kɛ pɛl, kiɛ ɛŋa mi cu jɛ moc kɛ ŋäc ŋɔaani mi dëë dɛ̈m kɛ jɛ?

³⁷ Kuɛ la ŋa mi dëë pek pua̱a̱ri kuɛn kɛ pɛlɛ? Kä ɛŋa mi dee kɛ jak kä dɛm,

³⁸ a bɛ tup duɔ̱ɔ̱l, kä bi mun a tuäk?

³⁹ “Ɛ deri lony ku luäŋ kɛ käk ley, a bi dɛykɛ luäŋ kɛ mi̱i̱th,

⁴⁰ guäth in näk buɔthkɛ dueeliɛn, min tekɛ tɔ̱ɔ̱cä?

⁴¹ Kä ɛŋa mi moc diit nhial kɛ mi̱eth, mɔ ro̱l gaatkɛ Kuoth ɔ, kä wurkɛ kɛ thil mi̱eth?