I-yob 36 - RUAC KUƆTH IN RƐL RƆ

¹ Kä cu Ɛ-liɣu ruacdɛ cuɔ̱p wee i̱,

² “Te ni kɛɛl kɛ ɣä kä mi tɔt, bä kulɛ nyuɔ̱th ji̱, ɛn ɣöö tëë ti dëë lat kɛ gua̱a̱th Kuɔth.

³ Kɛ ŋäc ŋɔaanidä min di̱i̱t, bä ji̱ la̱t cuɔ̱ɔ̱ŋ Cääkädä.

⁴ Kä bä la̱r ji̱ kɛ thuɔ̱k ɛn ɣöö ruacdä /ciɛ baŋ, kɛ ɣöö ɛn ram ɛ te kɛɛl kɛ ji̱ mi ŋäcɛ ŋɔak.

⁵ “Kä nɛnɛ Kuoth bumɛ, kä thilɛ ram mi lo̱kɛ, jɛn bumɛ, kä ŋäcɛ ŋɔak.

⁶ Kä /cɛ ram mi jiääk päl a tëk, kä kämɛ nɛy tin ciaŋkɛ a jiäk cuɔ̱ɔ̱ŋdiɛn.

⁷ Kä la tiitdɛ ji̱ cuŋni, kä la kämɛ kɛ kuäär kɛnɛ liak mi do̱raar.

⁸ Kä mi ca naath pua̱t kɛ kuatni, a ca kɛ moc riɛk kɛ kui̱ lätnikiɛn,

⁹ la Kuoth kɛ a lär lätkiɛn, kɛnɛ dueerkiɛn tin ca la̱t liakä.

¹⁰ Kä bɛ kɛ cu jak kä liɛŋkɛ luek, kä bɛ kɛ jiök i̱ rietdɛ rɔ̱ kä dueerkun.

¹¹ Kä mi cikɛ jɛ luɔ̱th, kä ba lätikä, bikɛ duɔth teekädiɛn thuk agɔaa, kä bikɛ runkiɛn thuk kɛ mal.

¹² Kä mi /ken kɛn ɛ luɔ̱th, bikɛ li̱w ko̱o̱r, kä bikɛ li̱w a /cikɛn ɛ ŋäc.

¹³ “La nɛy tin thil Kuoth gak rɔm kɛ lo̱ckiɛn, kä mi däk kɛn /cikɛn luäk a thieec.

¹⁴ La li̱w kɛ ni ŋuɛɛtädiɛn, kä la thuk tëkdiɛn nikɛ pöc.

¹⁵ Kä la luäkɛ nɛy tin cuc mi tekɛ kɛ riɛk, kä ruacɛ kɛ kɛ, kɛ kui̱ däkdiɛn.

¹⁶ Kä la kämɛ ji̱ raar rɛy rikni kä bɛ ji̱ naŋ guäth mi thil jiääk, kä kämɛ ji̱ tin diaal tin go̱o̱ri.

¹⁷ “Kä täämɛ ŋɔ̱ɔ̱ŋ luk ji̱ dueeri ji̱, te ni luk kɛ kui̱ cuŋni lɔɔcdu.

¹⁸ Kä tit rɔ a thil ram mi mɛt ji̱, a ji̱ /ca bi naŋ gekä kɛ kök yio̱o̱ni ti ŋuan.

¹⁹ Kä /ci ria̱ŋdu ji̱ dëë kän, kiɛ buɔ̱mdu rɛy rikä?

²⁰ Kä /cu lip ni wäär, kɛ ɣöö bi naath wä däk dho̱rikiɛn.

²¹ Car wi̱cdu, cu guur ni duer cu nhɔk ni jɛ kɛ kui̱ däkädu.

²² Kä nɛnɛ, Kuoth tëë kɛ buɔ̱m, kä ɛŋa mi la ŋi̱i̱c mi ce̱tkɛ jɛ?

²³ Kä ɛŋa ci jɛ nyuɔ̱th duɔ̱pkɛ mɔ, kiɛ dëë jɛ jiök i̱, ‘Ci duer la̱t’?

²⁴ “Kä timɛ ɛn ɣöö bi lätkɛ la̱t tëë puanykɛ ni jɛ ɛ naath kɛ dit.

²⁵ Kä ca kɛ nɛn ɛ naath diaal, guic kɛn ɛ ni nɔ̱a̱nä.

²⁶ Kä nɛnɛ, Kuoth di̱t ni jɛn, kä /canɛ jɛ dëë luäŋ kɛ ŋäc, kä /canɛ pek runikɛ dëë met ŋa̱c.

²⁷ Kä ɛ jɛn kän pi̱w piny ɔ, kä bɛ kɛ jak kä dɛm ala nhiaal,

²⁸ ku wuɔ̱n kɛ la jak kä bëë piny, bɛ cua̱ nhiaal mi di̱i̱t mi dem naath ikä.

²⁹ Kä tëë kɛ ram mi dee jɛ ŋa̱c ɛn ɣöö, bɛ pua̱a̱r jak kä te nhial, kä bɛ ma̱a̱r ni guäth cieŋädɛ?

³⁰ Kä nɛnɛ cɛ ma̱a̱r dääkä nhial kä thieeŋɛ yiër kɛ pi̱w.

³¹ Ruaacɛ naath kɛ jɛn duɔ̱ɔ̱p ɛ mɔ, kä ŋunɛ mi̱eth mi di̱i̱t mi ro̱ŋ.

³² Kä ɛ jɛn te yiel nhial tetädɛ mɔ, kä ɛ jɛn lat ɣöö bɛ yiel ɔ.

³³ Kä wuɔ̱w nhial latdɛ bendɛ, kɛ kui̱ gaak tiilädɛ kɛ ti jiäk.