I-yob 35 - RUAC KUƆTH IN RƐL RƆ

¹ Kä cu Ɛ-liɣu wee i̱,

² “Diiwi jɛ ɛn ɣöö nɛmɛ ɛ thuɔ̱k? Kä curi wee i̱, ‘Ta̱a̱ kɛ cuɔ̱ɔ̱ŋ nhiam Kuɔth.’

³ Kä curi thiec i̱, ‘Ɛŋu mi bä jek, kɛ ɣöö /ka̱n duer la̱t?’

⁴ Ɣän bä ji̱ loc yɛnɛ mäthniku kɛɛl.

⁵ Ji̱n guic pua̱a̱r nhial, kä guic pua̱r tɔ̱ te ni nhial wi̱i̱du tɔ̱.

⁶ Mi ci duer ɛŋu mi dee Kuoth jek? Kä mi ŋuan dueerku, ɛŋu mi deri lät kä jɛ?

⁷ Kä mi ti̱i̱ kɛ cuŋ, ɛŋu deri ka̱m jɛ mɔ? Kiɛ ɛŋu derɛ jek ɔ kä ji̱?

⁸ Dueerku jekɛ ni ram mi ce̱tkɛ ji̱, kä cuŋku jekɛ ni gat ran.

⁹ “La wiee naath kɛ ciaŋ mi jiääk, kä la kɛn luäk go̱o̱r.

¹⁰ Duundɛ ɣöö thilɛ ram mi ci wee i̱, ‘Kä Kuoth in la Cääkdä a nikä, min la buum naath rɛy rikä,

¹¹ min nyuuth kɔn ɛlɔ̱ŋ kä ley dɔaar, kä käm kɔn pɛl mi di̱t ni jɛn kä pɛl din nhial?’

¹² Kä mi wiee kɛn, /cɛ kɛ loc, kɛ kui̱ liakä ji̱ dueeri.

¹³ Kɛ thuɔ̱k /ci Kuoth wiee baaŋ dëë liŋ, kä /cɛ ca̱rɛ dëë la̱th thi̱n.

¹⁴ Kä derɛ kulɛ te i̱di mi loori jɛ i̱ /cä jɛ nɛn, kä te ruacdu nhiamdɛ kä liipi ni jɛ!

¹⁵ Kä diiwi jɛ ɛn ɣöö /ci gakdɛ naath tɔ̱ŋ, kä /cɛ dueer käm tiit.

¹⁶ Kä cu I-yob lat ni ruaacni ti thil luɔt, cuɛ rieet ti ŋuan lat kɛ thil ŋäcä ŋɔaani.”