I-yob 34 - RUAC KUƆTH IN RƐL RƆ

¹ Kä cu Ɛ-liɣu wee i̱,

² “Liɛŋɛ rieetkä, yɛn nɛy tin pɛl, liɛŋɛ ɣä yɛn nɛy tin ŋa̱ckɛ ŋɔak.

³ Kä ji̱th metdɛ ruac ce̱tkɛ min la lɛp mi̱eth bil.

⁴ Kɔn ka̱nɛ ni min la cuɔ̱ɔ̱ŋ, kä ɣɔ̱a̱nɛ mi gɔaa kɛ jek rɛydan.

⁵ Kɛ ɣöö ci I-yob wee i̱, ‘Ɣän thil ɣä duer kä ci Kuoth cuɔ̱ɔ̱ŋdä bath,

⁶ nikɛ cuŋkä cɛ ɣä cɔli gua̱n kacä, kä cɛ ɣä moc buɔ̱t mi ci bi gɔaa cäŋni mi thilɛ ɣä duerɛ.’

⁷ Kä ɛŋa mi bi ce̱tkɛ I-yob, mi maath ni kac ce̱tkɛ pi̱w ɛ,

⁸ mi nhɔk ni nɛy ti la̱a̱t jiäkni mi, kä jäl kɛɛl kɛ ji̱ dueeri?

⁹ Kɛ ɣöö cɛ wee i̱, ‘Thilɛ mi dëë raan ɛ jek mi cɛ lɔc Kuɔth jak kä tɛth.’

¹⁰ “Kɛ kui̱ ɛmɔ liɛŋɛ ɣä lö nɛy tin ŋa̱ckɛ ŋɔak, a jɛ nɔ̱a̱n kɛ Kuoth in leny buɔ̱mdɛ ti diaal, ɛn ɣöö derɛ dueer la̱t.

¹¹ Kä lätdɛ raan kä duɔ̱ɔ̱r kɛ min cɛ la̱t, la lätdɛ raan kä mi ce̱tkɛ lätkɛ.

¹² Kɛ thuɔ̱k /ci Kuoth in leny buɔ̱mdɛ ti diaal duer dëë la̱t a bɛ cuɔ̱ɔ̱ŋ päl.

¹³ Kä ɛŋa mi ci jɛ ka̱m wi̱c muɔ̱ɔ̱n, kä ɛŋa mi ci jɛ ka̱m ɣɔw kɛɛliw?

¹⁴ Kä mi cɛ yiëëdɛ luɔc jɔk, mi cɛ yiëë teekä luɔ̱c rɔ,

¹⁵ dëë ti diaal li̱w kɛɛl, a dëë raan loc ni tuääk.

¹⁶ “Kä mi ŋäci ŋɔak liŋ nɛmɛ, liŋ mi bä latdɛ.

¹⁷ Dëë ram mi lo̱k thuɔ̱k ruëc? Kä deri ram mi lat cuŋ kä bum lat jɔ̱ɔ̱r,

¹⁸ mi jio̱k kuäär ji̱ i̱, ‘Ram mi jiääk,’ kä jio̱kɛ rueec i̱, ‘Gua̱n dueeri,’

¹⁹ ɛn ram mi /ci nhök nyuth bööth, a /cɛ ram mi riäŋ nhɔk kä can, kɛ ɣöö kɛn diaal lät kɛ jɛn?

²⁰ La li̱w kɛn nɛy tɔ̱tɔ̱ ɛ mony, kä kɛ wäärdäär la yɔ̱kɛ naath kä bikɛ cu riaw, kä la nɛy tin buɔ̱m buɔ̱ɔ̱m rɔ̱ cua̱ päär kɛ lia̱a̱.

²¹ “Kä jɛn guicɛ duɔ̱p nɛɛni diaal, kä tiitdɛ lätkiɛn diaal.

²² Kä thilɛ gua̱a̱th mi col mi dee nɛy tin la̱a̱t jiäkni rɔ̱ tɛ̱̈ɛ̱̈ thi̱n.

²³ Kä thilɛ gua̱a̱th mi ci Kuoth jɛ rialikä, kɛ ɣöö bɛ naath wä luk kɛ jɛ.

²⁴ Kä wocɛ nɛy tin buɔ̱m buɔ̱ɔ̱m a thil thiec, kä bɛ nɛy ti kɔ̱ŋ la̱th gua̱thnikiɛn.

²⁵ Kɛ ɣöö ŋäcɛ lätkiɛn, cuɛ kɛ woc kɛ wäär, kä cukɛ duɔ̱p.

²⁶ Kä cuɛ kɛ tɔ̱ŋ kɛ kui̱ jiäknikiɛn, nhiam nɛɛni diaal,

²⁷ kɛ ɣöö ca rɔ̱ ri̱t kɔɔrɛ kä /ca duɔ̱pkɛ guur.

²⁸ Kä cukɛ can jak kä wiee nhiam Kuɔth, kä cuɛ jɔwdiɛn liŋ görkɛ luäk.

²⁹ Kä mi tëë bitdä, ɛŋa dëë jɛ bɛl ɔ? Kä mi cɛ rɔ tɛ̱̈ɛ̱̈, ɛŋa dëë jɛ nɛn ɔ? Ɛ dëë jɛ ku nɛn dör kiɛ raan.

³⁰ Kä ci nɛy ti jiäk bi ŋot kɛ ruec, a cäŋɛ ni nɛy tin la pɛlkɛ naath.

³¹ “Kä tëë kɛ ram mi ci Kuoth kɔŋ jiök i̱, ‘Ɣän ta̱a̱ kɛ duer, kä /cä mi jiääk bi nyɔk kɛ lätni,

³² nyuth ni ɣä min /ka̱n nɛn, kä mi cä duer, /cä jɛ bi nyɔk kɛ lätni’?

³³ Kä dëë Kuoth ji̱ lät kä min go̱o̱ri kä ci ruacdɛ lo̱k? Ɛ ji̱n bi jɛ lar ɔ, /ciɛ ɣän, kɛ kui̱ ɛmɔ lat min ŋäci.

³⁴ Kä bi nɛy tin ŋa̱ckɛ ŋɔak mat kɛ ɣä, kä bi nɛy tin pɛl wee i̱,

³⁵ ‘I-yob cɛ ruac a kui̱cɛ ŋu, ɛ jɛn thilɛ ruacdɛ luɔt ɔ.’

³⁶ Kä guic ruac I-yob amäni thuɔ̱kdɛ, ruacdɛ ce̱tdɛ nikɛ ruac nɛɛni ti ji̱ dueeri.

³⁷ Kɛ ɣöö cɛ rep ni dueerkɛ kɛ nyuɔn, kä patdɛ tetkɛ rɛydan, kä lätdɛ Kuoth laat ti jiäk.”