I-yob 33 - RUAC KUƆTH IN RƐL RƆ

¹ “Kä täämɛ liŋ ruacdä lö I-yob, liŋ rieetkä diaal.

² Nɛnɛ ɣän ruacä, lat lɛpdä rieet.

³ Kä kɛn rieetkä bäkɛ raar lɔɔcdä, kä bi lɛpdä lat ni min ŋäcɛ kɛ thuɔ̱k.

⁴ Cak ɣä yiëë Kuɔth in leny buɔ̱mdɛ ti diaal, kä ɛ jɛn käm ɣä tëk ɔ.

⁵ Kä loc ruacdä mi ti̱i̱kɛ luɔc, riali rɔ ikä ban ruac.

⁶ Ɣän bä ca̱a̱tdä nikɛ ji̱ nhiam Kuɔth, kä ca kɛ ɣä bä nikɛ mun.

⁷ Kä thilɛ mi bi ji̱ jak kä dual kɛ ɣä, kä /ci ruacdä bi thiak kä ji̱.

⁸ “Kä ɣän cä ji̱ liŋ a ruaci, ɣän cä rieetku tëë lat i̱ liŋ.

⁹ Curi wee i̱, ‘Ɣän gɔaa ɣä, thilɛ ɣä duer, ɣän thilɛ jiäk ti te rɛydä.

¹⁰ Kä ci Kuoth mi latdɛ jek kɛ ɣä, cɛ ɣä jak kä gua̱n tɛ̈rɛ,

¹¹ cɛ ciökä yiɛn kɛ kuatni, kä guicɛ duɔ̱pkä diaal.’

¹² “Kä nɛnɛ, thilɛ ji̱ cuɔ̱ɔ̱ŋ thi̱n kä ɛn nɛmɛ, kɛ ɣöö Kuoth di̱t ni jɛn kä raan.

¹³ Kä ji̱n ɛŋu gaki mɔ kɛ jɛ, ruaci i̱, ‘Tëë kɛ luɔc kɛl mi bɛ lat kä rieetkɛ’?

¹⁴ Kɛ ɣöö Kuoth la ruacɛ kɛ duɔ̱ɔ̱p ɛmɛ täämɛ, kä bɛ rɔ nyɔk kɛ duɔ̱ɔ̱p in dɔ̱ŋ kä thilɛ ram mi tiit jɛ.

¹⁵ La ruacɛ kɛ naath kɛ wäär kɛ la̱k kɛnɛ nyuuthni rɛy ni̱en,

¹⁶ la latdɛ ruacdɛ ji̱thnikiɛn, kä bɛ kɛ cu jak kä dual tin luekɛ nikɛ,

¹⁷ kɛ ɣöö bɛ raan ri̱t kä jiäkɛ, kä bɛ jɛ tit kä liakdɛ,

¹⁸ kä bɛ yiëë ran gaŋ kɔ̱kä, kä bɛ tëkdɛ gaŋ kɛ lia̱a̱.

¹⁹ “Kä gaŋɛ raan bäkɛ muɔ̱cdɛ kɛ juey, kɛ muɔ̱cdɛ kɛ juey ko̱o̱kä cɔ̱ɔ̱ni mi thil lɔ̱a̱ŋ,

²⁰ kɛ ɣöö bi ti̱eydɛ mi̱eth cu cany, kä bi lɔcdɛ mi̱eth mi gɔaa cu lo̱k.

²¹ Kä bɛ cu nuään a bɛ thilɛ gua̱a̱th, kä bi duɔth ni cɔ̱wkɛ tëë ci la jɔc.

²² Kä cu duɔth ni ɣöö bi yiëëdɛ cop ni kɔ̱k, kä cu tëkdɛ guic ni wä jɔɔkni.

²³ Kä mi tëë kɛ jääk Kuɔth mi te kui̱dɛ, mi la reec, ram kɛl kä bathdɔɔr, mi dëë raan la̱r min la cuɔ̱ɔ̱ŋ kä jɛ,

²⁴ ram mi dëë jɛ nhɔk mi wee i̱, ‘Päl ɛ, a jɛ /ci wä piny rɛy jɔɔkni, ɣän cä jëk mi luɛ̈lä jɛ,

²⁵ a puɔ̱nydɛ loc thi̱n a ba ni ŋuɛ̈t, a ciaŋ ŋuɛɛtädɛ loc thi̱n a bɛ buɔ̱m.’

²⁶ Mi wëë pal ni Kuoth, kä bɛ jɛ nhɔk, bɛ ben nhiamdɛ kɛ tɛ̈th lɔaac. Kä bi Kuoth jɛ luɔ̱c ciaŋ gɔɔyädɛ,

²⁷ kä bɛ naath ben jiök i̱, ‘Ɣän cä duer, kä /ka̱n la̱t ni min la cuɔ̱ɔ̱ŋ, kä /ka̱n jɛ lät kä ɣä.

²⁸ Kä ci Kuoth ɣä kän kɛ wädä kɔ̱k, kä ɣän bä tëk rɛy buɔyä.’

²⁹ “Kä nɛnɛ Kuoth la lätdɛ raan, kä ti ce̱tkɛ kɛn ti̱ti̱ kä rɛɛw kiɛ kä diɔ̱ɔ̱k,

³⁰ kɛ ɣöö bɛ yiëë ran luɔ̱c jɔk puul li̱eth, a bɛ lɛ tëk rɛy buɔyä.

³¹ Kä guicɛ lö I-yob, kä liŋ ɣä, päli rɔ piny kɛ ɣöö bä ruac.

³² Kä mi tëë kɛ mi bi lat, loc ni ɣä, ruacni, kɛ ɣöö göörä ɣöö bi lɔar.

³³ Kä mi /ciɛ jɛn, kä liŋ ɣä, päli rɔ piny, bä ji̱ nyuɔ̱th kɛ pɛl.”