I-yob 30 - RUAC KUƆTH IN RƐL RƆ

¹ “Kä kɛn täämɛ yɔaŋkɛ ɣä, kɛn nɛy ti kuiy nikɛn kä ɣä, ti dëë gua̱nikiɛn jak kä yiëën deetkä kɛɛl kɛ jio̱o̱k tin la yien kɛ.

² Kä ɛŋu mi dëë jek kä buɔ̱mdiɛn, kä kɛ nɛy ti thil lua̱ŋ?

³ Kä kɛn kɛ can ti näk buɔthkɛ ti wa go̱r ni thär juaacni ti ci kööt kɛ wäär rɛy dɔar.

⁴ Kä la guɔ̱thkɛ ni woor kɛnɛ ji̱th kɛɛc, kä cam kɛn ni lɛw dɔaar.

⁵ Kä ca kɛ kon ɛ nɛɛkiɛn, rɔal naath kɔɔriɛn ce̱tkɛ mi kɛ kuëël.

⁶ Kä ciɛŋ kɛn ni rɛy kɔ̱a̱kni, rɛy ɣo̱tni piɛny kɛnɛ pääm.

⁷ La wieekɛ rɛy ruɔ̱ɔ̱p ce̱tkɛ muɔ̱li, kä duɔ̱ɔ̱lkɛ rɔ̱ thäri jiɛn.

⁸ Kɛ nɛy ti jiäk ti thil kɛ̈k ca kɛ juɔc raar muɔ̱nikiɛn.

⁹ “Kä täämɛ kɛ̈tkɛ ni ɣä ɛ kɛn kɛ diit, kä lat kɛn ni ɣä ala cäät kä kɛ.

¹⁰ Ci kɛn ɣä cany, kä cikɛ rɔ̱ nɔa̱a̱n kɛ ɣä, kä /cikɛ dual kɛ ɣöö ŋuɔ̱lkɛ ɣä ruɛy.

¹¹ Kɛ ɣöö ci Kuoth ɣä jak kä ram mi nyua̱n mi thil buɔ̱m, a cikɛ rɔ̱ cu luɔ̱c ni ɣä.

¹² Kä cu nɛy ti jiäk ɣä cu mak kui̱c cuëëc, kä cukɛ ɣä cu moc cambak mi nyoŋ ciökä, kä cukɛ ɣä cu göl rɛc.

¹³ Kä cukɛ duɔ̱pkä cu ga̱k, kä cukɛ ɣä cu däk, a thil ram mi cukɛ luäk.

¹⁴ Cukɛ cunh rɛc kɛ kam kal, la bäkɛ kɛ ɣöö ba ɣä ben däk.

¹⁵ Kä cua̱ cu dual ɛlɔ̱ŋ cu thiakdä cu jiɛɛn ce̱tnikɛ jiɔam, kä cu ria̱ŋdä cu jiɛɛn ce̱tnikɛ pua̱r.

¹⁶ “Kä ɛn täämɛ ci yiëëdä jiɛɛn rɛydä, ca ɣä naŋ ɛ ni̱n rikädä.

¹⁷ La ko̱o̱kɛ cɔ̱wkä kɛ wäär, la ko̱o̱kɛ kɛ a thil lɔ̱a̱ŋ.

¹⁸ Cuɛ ɣä käp nikɛ luɔ̱tdä, cuɛ ɣä tho̱t nikɛ ŋuäk lutädä.

¹⁹ Ɛn Kuoth cɛ ɣä yuɔr ni rɛy tua̱a̱k, cua̱ cu ce̱tnikɛ tup kɛnɛ ŋɛ̈th.

²⁰ Kä cä ji̱ cɔl Kuoth kä /keni ɣä loc, kä cua̱ rɔ jiɛc kä /keni ɣä nɛn.

²¹ Kä curi luɔ̱c ni rɔ ɣä, curi ciɛŋ ni ɣä a jiäk kɛ buɔ̱mdu.

²² Kä curi ɣä pa̱l ɣöö lɔk jiɔamä curi ɣä jak kä wi̱elä rɛy thuɔ̱ɔ̱l.

²³ Kä ɣän ŋa̱cä jɛ ɛn ɣöö bi ɣä näk, a bi ɣä naŋ guäth nɛɛni diaal.

²⁴ “Kä cuɛ tekɛ ram mi ci wut ëë ci cuuc luäk, mëë go̱o̱rɛ luäk kɛ kui̱ nɛɛni tëë tekɛ riɛk.

²⁵ Kä ɣän /ka̱n wiee kɛ kui̱ nɛɛni tëë tëë riɛk? Kä /ken lɔcdä ku jiath kɛ kui̱ cani?

²⁶ Duundɛ ɣöö mi cä go̱r ni gɔɔy, bi ben ni jiääk, kä mi göörä ni buay, bi ben ni muuth.

²⁷ Kä jiath lɔacdä thilɛ jɛ pek, kɛ ɣöö ni̱n riknikä rëpkɛ ni rɔ̱.

²⁸ Ɣän ja̱a̱lä ni muuth mi thil cäŋ, kä cä cuɔ̱ŋ rɛy dolä göörä luäk.

²⁹ Kä cua̱ ce̱tnikɛ guɔɔr kɛnɛ wuɔ̱t.

³⁰ Cua̱ rɔɔl a bä cuɔl ɛ cuc kɛ juey.

³¹ Kä cu tɛ̈th lɔaacdä rɔ loc ni jiath lɔaac, kä cu kuewdä rɔ loc ni jɔw nɛɛni ti pär.