I-yob 3 - RUAC KUƆTH IN RƐL RƆ

La̱m I-yob kɛ cäŋ däpkädɛ

¹ Kɛ kɔrɛ cu I-yob cäŋ ëë dapkɛ ni jɛ lam.

² Kä cuɛ wee i̱,

³ “A cäŋ ëë dapkɛ ni ɣä thil, kɛnɛ wäär ëë lar kɛ jɛ thi̱n i̱, ‘Ca dho̱o̱l dap.’

⁴ A cäŋ ɛmɔ la muuth. A Kuoth /ci diɛɛr kɛ jɛ, kä a thil buay mi te thi̱n.

⁵ A muth kɛnɛ ti̱eep li̱eth naŋ jɛ. Kä a wuɔ̱n ciɛŋ ni jɛ, kä ate ni muuth thi̱n.

⁶ Ɛn wäär ɛmɔ a muth bath jɛ! A jɛ /ci te rɛy ni̱ni runä, kä a jɛ /ca kuɛn rɛy päthni.

⁷ A wäär ɛmɔ la rol. A thil jɔw tɛthkä lɔaac mi liɛŋkɛ thi̱n.

⁸ A nɛy tin la läm lamkɛ cäŋ ɛmɔ, nɛy tin la lamkɛ nyaŋ.

⁹ A ciɛr bakädɛ /ci käny kä a jɛ liip bak ɣɔaa mi /ci bi ben, a cäŋɛ ni po̱o̱t ɣɔaa a /cɛ nɛn,

¹⁰ kɛ ɣöö /kenɛ maar pen ɣöö bɛ ɣä dap, a cä rik ti̱ti̱ dee nɛn.

¹¹ “Ɛŋu /ka̱n li̱w ni mëë dapkɛ ɣä mɔ, mëë ba̱a̱ raar jic?

¹² Ɛŋu cua ɣä rɔm ɔ, a bä lɛni luɛth?

¹³ Ɛn täämɛ dëë te piny muɔ̱ɔ̱n kɛ mal. Dëë te ni̱n rɛy lɔ̱ŋä,

¹⁴ kɛɛl kɛ lueek kɛnɛ kua̱r piɛny, tëë ca rɔ̱ ta̱th ti̱ec däkä.

¹⁵ Kiɛ kɛɛl kɛ ruëëc tin tekɛ da̱a̱p, tin ca dho̱rkiɛn thieŋ kɛ läŋ in bo̱r.

¹⁶ Kä ɛŋu /ka̱n te tɔ̱ɔ̱wä mɔ ce̱tkɛ gat mi /ka̱n dap, ce̱tkɛ ruɔɔr mi tɔt mi /ken buay ɣɔaa met nɛn?

¹⁷ Ɛn guäth ɛmɔ ci jiäk ŋuɔk thi̱n, kä ci nɛy tin ci cuuc kɛ la̱t lɔ̱ɔ̱ŋ thi̱n.

¹⁸ Kä nɛy tin ca yian ci yieykiɛn wä piny, kɛ ɣöö thilɛ jɔw raam in yien kɛ mi lɛ̈ lɛ liŋ.

¹⁹ Ram mi luɔ̱thkɛ kɛnɛ ram mi tɔt a thi̱n, kä kuany ca lony kä kuäärɛ.

²⁰ “Ɛŋu mɔ bä buay kä nɛy ti te kɛ riɛk ɔ, mɔ bä tëk kä nɛy ti bɛc ciaaŋdiɛn ɔ?

²¹ Kɛn görkɛ ni lia̱a̱ kä /ca jɛ jek, görkɛ ni lia̱a̱ ce̱tkɛ nɛy ti görkɛ ni kuak.

²² Kɛn nɛy tin tɛth lo̱ckiɛn, kɛ ɣöö cikɛ cop rɛy kɔ̱kä.

²³ Ɛŋu ka̱mkɛ tëk ram mi ci duɔ̱pkɛ bath ɔ, ram mi ci Kuoth duɔ̱pkɛ ga̱k thi̱n?

²⁴ Ɣän ram mi ku ben ni jiath lɔacdä ce̱tkɛ mi̱eth, kä waaw ni merkä ce̱tkɛ pi̱w.

²⁵ Kɛ ɣöö min luɔ̱thä ci ben ni jɛn, min dualä kɛ jɛ ci tuɔ̱k ni jɛn kä ɣä.

²⁶ Ɣän thilɛ ɣä mal, kɛnɛ päl piny, thilɛ ɣä lɔ̱a̱ŋ, te ni rik wan ɔ.”