I-yob 29 - RUAC KUƆTH IN RƐL RƆ

Ruac I-yob in jɔak

¹ Kä cu I-yob rɔ nyɔk kɛ mi buumɛ rɔ wëë i̱,

² “Ɣän göörä ni mi luɔcä ciɛŋädä mëë wal, ni̱n tëë tiit Kuoth ɣä thi̱n,

³ mëë la te buay Kuɔth kɛɛl kɛ ɣä, kä la ja̱lä rɛy muɔ̱th kɛ buaydɛ,

⁴ kɛ gua̱a̱th ëë ŋuɔtdä kɛ ŋuɛɛt, gua̱a̱th ëë te puɔ̱th Kuɔth dhɔrä.

⁵ Mëë ŋot Kuoth kɛɛl kɛ ɣä, mëë te gaatkä gekädä,

⁶ mëë ta̱a̱ kɛ ria̱ŋ mi di̱i̱t, cak ti ŋuan kɛnɛ liɛɛth mi di̱i̱t!

⁷ Mɔ cä wä raar ɔ guäth in ci di̱t wec mat thi̱n ɔ, mɔ cä ku nyuur wi̱c kɔaamdä mɔ,

⁸ mi ci ŋuɛ̈tni ɣä nɛn la jiɛc kɛ, kä la dɔŋ rɔ̱ a jiec ni cuɔ̱ŋ,

⁹ kä la ruëëc ruac a päl la nhiatkɛ ni thukiɛn kɛ tetkiɛn,

¹⁰ kä la bit nɛy tin luɔ̱thkɛ, la pek ni thukiɛn ɣo̱o̱ŋä.

¹¹ Kä ram mi ci ɣä liŋ, ruacɛ agɔaa kɛ kui̱dä, kä ram mi ci ɣä nɛn latdɛ ni mi gɔaa kɛ ɣä,

¹² kɛ ɣöö la lua̱kä can mi go̱o̱r luäk, kɛnɛ rɛɛt mi thil ram luäk jɛ.

¹³ Kä la puɔthkɛ ɣä ɛ ram mi go̱o̱r lia̱a̱, kä la jakä lɔc ciek jɔkä tɛth.

¹⁴ Kä cua̱ cuŋ la̱th puɔ̱ɔ̱nydä ce̱tkɛ bi̱i̱, kä thuɔ̱k ɛ jɛn la luɔ̱tdä mɔ kä ɛ kumdä.

¹⁵ Ɣän lapä taŋ kä cɔr, kä ɛ ɣän cio̱o̱k kä duääny.

¹⁶ Ɣän la ca̱tdä kɛ gua̱n raam mi can, kä la ka̱nä riɛk raam mi juɔ̱r.

¹⁷ Ɣän la da̱kä nɛy tin jiäk, kä la lua̱kä nɛy tin cikɛn kɛ miɛt.

¹⁸ Kä cua̱ ca̱r i̱, ‘Ɣän bä li̱w dhɔrä, kä bä ni̱n teekädä jak kä ŋuan ce̱tnikɛ waŋ litdä,

¹⁹ ɣän ca̱tdä nikɛ jiath mi te ciökɛ rɛy pi̱i̱ni, kä te karkɛ kɛ thäc kɛ wäär kɛɛliw.

²⁰ Kä te wuɔ̱tdä thi̱n ni ciaŋ, kä /ken buɔ̱mdä met jiɛɛn kä ɣä.’

²¹ “Kä la liip naath ruacdä a bitdä, la bit kɛ mi la̱tdä kɛ ruac.

²² Kä mi cä ruac, /ci kɛ la ruac, kɛ ɣöö la cup ruacdä lɔɔcdiɛn.

²³ La liip kɛn ruacdä ce̱tkɛ mi liɛpkɛ ni nhiaal, la ro̱ŋɛ lɔɔcdiɛn ce̱tnikɛ nhiaal ruëël.

²⁴ La duɔ̱thä kɛ duɔɔth mi thilɛ kɛ mi ŋa̱thkɛ, la gɔɔy nhiamdä kɛ a jak kä bum.

²⁵ Kä cua̱ kɛ rialikä ce̱tnikɛ bo̱o̱thdiɛn, kä cua̱ cieŋ ce̱tkɛ kuäär mi te rɛy rɛ̈mdɛ, cua̱ ce̱tnikɛ ram mi buum nɛy ti jiɛth lo̱ckiɛn.