I-yob 28 - RUAC KUƆTH IN RƐL RƆ

Dit kɛ kui̱ pɛlä

¹ “Ɛ puc tëë kɛ gua̱a̱th mi jëkɛ läŋ ɛ in bo̱r thi̱n, kɛnɛ gua̱a̱th mi thalkɛ da̱a̱p thi̱n.

² Kä jëkɛ ladiit rɛy muɔ̱n, kä thalkɛ läŋ in yian rɛy pa̱a̱m.

³ Kɛn naath ca muuth moc nikɛ pek, wä kɛ go̱r ni piny muɔ̱ɔ̱n wa pääm tɛt ni däär muɔ̱th mi col.

⁴ Kä tɛt kɛn puɔ̱l ti lueŋ guäth mi /ca ciɛŋ ɛ raan, guäth mi /ka̱n kɔŋ döny cio̱o̱k ɛ raan, ri̱t kɛn ni rɔ̱ puɔ̱li ti nɔ̱a̱n kɛ naath.

⁵ Kä wi̱c muɔ̱ɔ̱n ciɛk bɛl thi̱n, kä la löölkɛ mun piɛnydɛ raar.

⁶ Kä päämkɛ tekɛ kɛ guiy ti jaŋ jaaŋ, kä te mundɛ kɛ da̱a̱p.

⁷ “Thilɛ cuɔɔr mi ŋäc duɔ̱ɔ̱pdɛ, kä /ken kuey jɛ met nɛn.

⁸ Kä thilɛ ley mi bum mi ci jɛ döny cio̱o̱k, kä /ken lony met rët kɛ jɛ.

⁹ “La tɛt raan päm mi di̱i̱t, kä bɛ jɛ wul ni thaarɛ.

¹⁰ La tɛtdɛ yiër rɛy päämni, kɛ ɣöö bɛ guiy tin gɔw jek.

¹¹ La di̱erkɛ tuk yiëër, kɛ ɣöö ba tin ca rɔ̱ tɛ̱̈ɛ̱̈ piny nööŋ raar.

¹² “Kä ɛ wɛ̱̈ɛ̱̈nith dëë pɛl jek thi̱n ɔ? Kä ɛn ŋäc ŋɔaani kuɛ lɛ te nikä?

¹³ Thilɛ ram mi ŋäc gɔɔy pɛlä, kä /ca jɛ dëë jek rɛy nath.

¹⁴ Ruac bäpdiit i̱, ‘/Cɛ tekɛ ɣä,’ kä laar yiër ɛ i̱, ‘/Cɛ te kɛɛl kɛ ɣä.’

¹⁵ /Ca jɛ dëë luäŋ kɛ kök kɛ da̱a̱p, kä /ca pek ko̱kädɛ dëë pa̱a̱r kɛ ciɛk in bo̱r.

¹⁶ /Ca jɛ dëë met kɔk kɛ da̱a̱p A-pir-ka, kiɛ kɛ guɛɛy in bok kɛnɛ guɛɛy in jaŋ jaŋ.

¹⁷ /Ca jɛ dëë met pa̱a̱r kɛ da̱a̱p kɛnɛ neen mi jaŋ jaŋ, kä /ca jɛ dëë met luɛl kɛ da̱a̱p mi ko̱k ko̱k.

¹⁸ Kä gɔɔy pɛlä di̱t ni jɛn kä gɔɔy guiiyä min do̱l, kɛnɛ guɛɛy in jaŋ jaŋ kɛ dɔ̱a̱k.

¹⁹ Kä /ca jɛ dëë ca̱a̱t kɛ guɛɛy rööl Kuc in määl, kä /ca jɛ dëë kɔk kɛ da̱a̱p in ko̱k ko̱k.

²⁰ “Kä ɛn pɛl kuɛ lɛ ben nikä? Kä ɛn ŋäc ŋɔaani kuɛ lɛ te nikä?

²¹ Jɛn cɛ rɔ tɛ̱̈ɛ̱̈ kɛ naath, cu mäni diit nhial bä.

²² Kä cu lia̱a̱ kɛnɛ da̱k wee i̱, ‘Liŋ nɛy ni kɛ̈kdɛ kɛ ji̱th kɔ.’

²³ “Ɛ Kuoth ŋäc duɔ̱ɔ̱pdɛ mɔ, kä ŋäcɛ gua̱a̱th in cieŋɛ thi̱n.

²⁴ Kɛ ɣöö guicɛ pek ɣɔaa, kä nɛɛnɛ ti diaal tin te piny puɔ̱rä.

²⁵ Kɛ ɣöö ɛ jɛn ɛ nëë käm jiɔam buɔ̱m, kä ɛ jɛn ɛ nëë thɛm pi̱w.

²⁶ Ɛ jɛn laar jɛ mɔ i̱ bi nhiaal dɛ̈m, kä ɛ jɛn lät yiel nhial ɔ.

²⁷ Ɛ jɛn ɛ nëë jek pɛl kä cuɛ jɛ nhɔk, kä cuɛ jɛ lar i̱ bɛ te thi̱n.

²⁸ Kä cuɛ raan jiök i̱, ‘Luth Kuɔth ɛ jɛn la pɛl ɔ, kä päl lätni jiäkni, ɛ jɛn la ŋäc ŋɔaani mɔ.’ ”