I-yob 27 - RUAC KUƆTH IN RƐL RƆ

¹ Kä cu I-yob ŋot kɛ mi buumɛ rɔ wëë i̱,

² “Ɣän yaacä rɔ nikɛ ciöt Kuɔth in leny buɔ̱mdɛ ti diaal, mëë pen ɣä cuŋkä kä ci tëkdä jak kä bɛc.

³ Kä ce̱tnikɛ mi tëkä mi, kä te yiëë Kuɔth rɛydä,

⁴ ɣän /cä mi jiääk bi lat, kä /cä kac bi lat.

⁵ Kä /cä jɛ bi met lat i̱ ti̱i̱kɛ cuɔ̱ŋ, amäni mɔ cä li̱w ɔ /cä thuɔ̱kdä bi met päl.

⁶ Ɣän bä rɔm ni cuɔ̱ɔ̱ŋdä /cä jɛ bi met päl, thilɛ mi cä met bɛl ni rɔ rɛy teekä.

⁷ “A ji̱ tɛ̈rä mal duäc ce̱tkɛ ji̱ jiäkni, dëë nɛy tin lo̱k kɛ ɣä ciɛŋ ce̱tkɛ ji̱ dueeri.

⁸ Kä ɛŋu mi dëë ram mi thil kuoth ɛ jek, mi ci Kuoth tëkdɛ naŋ?

⁹ A dëë Kuoth lulɛ ku liŋ, mi ci riɛk ben kä jɛ?

¹⁰ A derɛ nhök ku jek kä Kuoth in leny buɔ̱mdɛ ti diaal? A derɛ Kuoth ku la cɔɔlɛ gua̱thni diaal?

¹¹ Ɣän bä ji̱ nyuɔ̱th buɔ̱m Kuoth, /cä duɔ̱p Kuɔth in leny buɔ̱mdɛ ti diaal bi tɛ̱̈ɛ̱̈.

¹² Ɛŋu latdɛ ruac mi thil luɔt ɔ, kä cia kɛn ti diaal ti̱ti̱ nɛn kɛ pua̱nykun?

¹³ “Kä nɛmɛ ɛ riɛk in käm Kuoth ɛ ram mi jiäk, min jek ram mi gua̱n tiilä jɛ kä Kuoth in leny buɔ̱mdɛ ti diaal.

¹⁴ Mi tëë kɛ gaat ti ŋuan, ba kɛ näk ko̱o̱r, kä thilɛ mi̱eth mi ro̱ŋ mi ba jek ɛ gaatkɛ.

¹⁵ Kä tɔ̱ bi kään tɔ̱, bi juey kɛ näk, kä ci mänkiɛn kɛ bi par.

¹⁶ A cäŋ cɛ läŋ in bo̱r dol ce̱tnikɛ tup, kä cɛ bieyni di̱r ce̱tnikɛ thɔc,

¹⁷ kɛn tɔ̱ cɛ di̱r tɔ̱ ba kɛ ciɛŋ ɛ gua̱n cuŋni, kä ba läŋdɛ min bo̱r da̱a̱k ɛ nɛy tin gɔw.

¹⁸ Kɛ ɣöö duel in cɛ la̱t ce̱tdɛ kɛ duel kɛcä, ce̱tdɛ nikɛ gɛ̈w mi ca la̱t rɛy kakä wal kɛ kui̱ kɔaŋ.

¹⁹ La tɔ̱ɔ̱cɛ kɛ ria̱ŋ mi /cɛ bi met nyɔk, kä mɔ cɛ keer ɔ la ria̱ŋdɛ thil.

²⁰ Kä bi dual jɛ cu naŋ ce̱tnikɛ nyɔc, kä bi ruɔth jɛ cu lɔk kɛ wäär.

²¹ Kä cu jiɔam kuec känyä ca̱ŋ jɛ naŋ, cɛ jɛ lɔak raar dhɔrɛ.

²² Cɛ rɔ kuer jɛ a thil pälikä, kä cuɛ jɛ ɣɔ̱n kɛ mi barɛ rɔ kɛ buɔ̱m jiɔam.

²³ Cu jiɔam jɛ pa̱t tetkɛ, kä cuɛ jɛ luɔ̱w luɔw ni dhɔrɛ.