I-yob 24 - RUAC KUƆTH IN RƐL RƆ

¹ “Kä ɛŋu /ken Kuoth ni̱n rialikä kɛ kui̱ luɔ̱k ɔ, kä /ci nɛy tin ŋa̱ckɛ jɛ bi te thi̱n ɛn cäŋ ɛmɔ?

² Nɛy tin ɣöthkɛ thuɔ̱c këthni, kä yienkɛ det ti kualkɛ.

³ Kɛn nɛy tin mackɛ muɔ̱li rɛ̈tni, kä ka̱nkɛ thääk mään jɔɔkni kɛ ŋuäl.

⁴ Kɛn nɛy ti pënkɛ can cuŋkiɛn, a cikɛ can diaal jak kä ɣöö tɛ̱̈ɛ̱̈kɛ rɔ̱.

⁵ Ce̱tnikɛ muɔ̱li däär dɔaar, la wä can mi̱eth go̱r rɛy dɔaar kɛ kui̱ gankiɛn.

⁶ Ŋɛ̈rkɛ bɛl rɛy ka̱a̱kni nɛɛni ti kɔ̱kiɛn, kä ma̱a̱tkɛ bua̱c rɛy kakä wal kɛ kui̱ kɔaŋ ji̱ jiäkni.

⁷ Kä la tɔ̱ɔ̱ckɛ kɛ wäär kɛɛliw juutdä, kä thilɛ bi̱i̱ mi kuɔ̱mkɛ rɔ̱ rɛy kɔ̱a̱c.

⁸ Kä la luääny nhiaal guiiyni kɛ, kä ba rɔ wä kɔat rɛy päämni kɛ thil duëli.

⁹ “Kä nɛy tin ji̱ jiäkni jakɛ gaat tin rɛ̈tni kä kuaanykiɛn, kä naŋkɛ gaat cani kɛ kui̱ ŋua̱l.

¹⁰ Kä la jälkɛ baaŋ a thil bieyni, kä kapkɛ bɛl, kä näk buɔthkɛ.

¹¹ Kä lät kɛn liɛɛth kä jiɛn Ɔ-lip, kä dhiim kɛn kɔaŋ, kä näk rɛwkɛ.

¹² Dak nɛy tin li̱w rɛy wec, kä go̱o̱r ti̱ey ji̱ buɔ̱ɔ̱tni luäk. Kä ŋotdɛ thilɛ mi lät Kuoth ɛ kä nɛy tin la̱tkɛ jiäk.

¹³ “Kä tëë kɛ naath ti lökɛ buay, ti kueckɛ duɔ̱pkɛ, kä /ca kɛ guur.

¹⁴ Kä mɔ ci ɣɔw cuɔl ɔ la jiɛɛc ram mi luuc nath rɔ, kä bɛ can kɛnɛ ram mi go̱o̱r duɔ̱ɔ̱r wä näk, la wänɛ kɛ wäär ce̱tkɛ kue̱e̱l.

¹⁵ Kä la dho̱o̱m waŋdɛ cua̱ guicni mi̱er ɣɔaa, bɛ cu ca̱r i̱, ‘Thilɛ ram mi nɛɛn jɛ’, kä bɛ nhiamdɛ cu gel.

¹⁶ Kä la tölkɛ duël kɛ wäär, kä bikɛ rɔ̱ ga̱k duëli kɛ cäŋ däär, kui̱c kɛn mi cɔali buay.

¹⁷ Kɛ ɣöö muuth in col ɛ jɛn runwaŋdiɛn kɛn diaal, kä watdiɛn ɛ muuth dualä.

¹⁸ “Kä ŋotkɛ kɛ ti ba lɔk ɛ pi̱w, kä ca mundiɛn lam ɛ Kuoth, kä thilɛ ram mi bi wä rɛy ka̱a̱kni wal kɛ kui̱ kɔaŋ ŋɔa̱a̱ri.

¹⁹ Ce̱tkɛ min la cäŋ pi̱w a ko̱o̱t kɛnɛ rɛ̈ɛ̈th, in ɔ bä bi ji̱ dueeri wä jɔɔkni.

²⁰ Kä ci manikiɛn kɛ pa̱l ruëëc, kä bi kɔ̱a̱m kɛ cu cam. Kä /ca kɛ̈kdiɛn bi lɛ tim, bikɛ cu dhiap ce̱tnikɛ jiath mi ci tööl.

²¹ “Kä kɛn camkɛ ni mi̱eth ciëk mi rol, kä ciaŋkɛ ciek jɔkä a jiäk.

²² Duundɛ ɣöö Kuoth kɛ buɔ̱mdɛ wocɛ ram mi bum, kä mi lätdɛ duɔ̱ɔ̱r la li̱wni gua̱n dueeri.

²³ Derɛ raan pa̱l tëk rɛy malä, duundɛ ɣöö guicɛ lätkɛ gua̱thni diaal.

²⁴ Kä la te ji̱ jiäkni kɛ liak kɛ gua̱a̱th mi tɔt, kä bikɛ cu yi̱c ce̱tnikɛ wi̱c bël, kä bikɛ rɔɔl ce̱tnikɛ ji̱th bël.

²⁵ Kä mi /ciɛ jɛn inɔ, ɛŋa bi ɣä la̱r kac ɔ, mɔ bi jɛ latdɔ i̱ ruacdä /ciɛ thuɔ̱k?”