I-yob 23 - RUAC KUƆTH IN RƐL RƆ

Luɔ̱c I-yob kɛ jɛ

¹ Kä cu I-yob jɛ loc i̱,

² “Amäni ɛn walɛ ŋuɔtdä thiëëcä Kuoth ɛlɔ̱ŋ, cɛ tetdɛ jak kä thiɛk kɛ ɣä a /cɛ lulä lɛ liŋ.

³ Aɣ, duŋ mi ŋa̱cä gua̱a̱th in dëë jɛ jek thi̱n, kɛnɛ mi dëë wä guäth ciɛŋädɛ!

⁴ Ɣän dëë ruacdä lat nhiamdɛ, a dëë cuŋkä diaal lat.

⁵ A dëë min derɛ luɔcä liŋ, kä dëë min lätdɛ ɣä ŋa̱c.

⁶ Ɛ derɛ ɣä ku gak kɛ buɔ̱mdɛ min di̱i̱t? Eey, bɛ liŋ ni ɣä.

⁷ Ɛn wi̱ni dëë ram mi tekɛ cuŋ go̱o̱nydɛ lat nhiamdɛ, kä bɛ ɣä cu kän amäni cäŋ kɛl ɛn kuäär luɔ̱kdä.

⁸ “Kä duŋdɛ ɣöö mi cä wä kui̱c känyä ca̱ŋ, thilɛ jɛ thi̱n, kä mi cä wä kui̱c konyä ca̱ŋ, /ci ɣän jɛ jek bä.

⁹ Kä göörä jɛ kui̱c caam, duŋdɛ ɣöö cä jɛ jek, kä cua̱ jɛ lɛ go̱r kui̱c cuëëc, duŋdɛ ɣöö /ka̱n jɛ nɛn.

¹⁰ Kä jɛn ŋäcɛ duɔ̱ɔ̱p in cä guɔ̱ɔ̱r, kä mi wëë ɣä ɣɔ̱n, bä ce̱tnikɛ da̱a̱p mi lɛy lɛy.

¹¹ Kä cua̱ guɔ̱ɔ̱r ni duɔ̱pkɛ, cua̱ tit ni dupkɛ ɛ /ka̱n ciɛc thi̱n.

¹² Kä /ka̱n luëëkɛ päl kä cä guɔ̱ɔ̱r ni rieet kɛ, a /ci mɔ a min göörä.

¹³ Kä jɛn /cɛ rɔ gɛr, ɛŋa bi jɛ kulɛ ri̱tɔ? Kä jɛn lätdɛ ni min nhɔkɛ.

¹⁴ Kä jɛn bɛ la̱t ni min cɛ car kɛ kui̱dä, kɛn cär tɔ̱tɔ̱ tekɛ kɛ jɛ.

¹⁵ Kɛ kui̱c ɛmɔ ɣän dualä ɛlɔ̱ŋ nhiamdɛ, mɔ cä kɛn ti diaal ti̱ti̱ car ɔ, la dualä kɛ jɛ.

¹⁶ Kuoth cɛ ɣä moc kɛ bɛ̈c lɔaac, jɛn Kuoth in leny buɔ̱mdɛ ti diaal cɛ ɣä jak kä dualä ɛlɔ̱ŋ,

¹⁷ kɛ ɣöö ɣän /cä dual kɛ muth, ɛn muth ɛ col ɛ ci nhiamdä kumɛ.”