I-yob 22 - RUAC KUƆTH IN RƐL RƆ

Ruac Ɛ-li-padh in diɔ̱ɔ̱kdiɛn

¹ Ɛ jɛn cu Ɛ-li-padh raan Te-man jɛ loc i̱,

² “A dëë Kuoth duɔ̱ɔ̱r ku jek kä raan? Kɛ thuɔ̱k dee ram mi pɛl rɔ lät kä duɔ̱ɔ̱r.

³ Kä tëë kɛ mi dee lɔc Kuɔth Nhial in leny buɔ̱mdɛ ti diaal nhɔk mi ɛ ji̱n ram mi tekɛ cuŋ, kiɛ mi ci rɔ jak kä ram mi thil bɛ̈ɛ̈l?

⁴ Kiɛ dual ni ji̱n kɛ ɣöö bɛ ji̱ bɛl, a derɛ ji̱ lɛ wä luk?

⁵ Kä dueerku ci kɛ ŋuan ɛlɔ̱ŋ? Kä jiäku thilɛ kɛ pek.

⁶ Kɛ ɣöö ci gaatmuɔɔr thiec kɛ ŋua̱l, kä ci bieynikiɛn ka̱n, kä cikɛ ba̱ny piny baaŋ cikɛ päl juutdä.

⁷ Kä /kenɛ gua̱n rɛ̈w moc kɛ pi̱w ti maathɛ, kä ci gua̱n buath pën mi̱eth.

⁸ Kä mun ɛ duŋ raam mi bum bum, kä cieŋ ni ram mi nhɔkɛ thi̱n.

⁹ Kä ci män jɔɔkni tuɔ̱k raar kɛ tetkiɛn baaŋ, kä ci buɔ̱m nɛɛni tin thil gua̱ni woc.

¹⁰ Kɛ kui̱c ɛmɔ dhuur a ni gekädu, kä bi dual mi di̱i̱t ji̱ pärikä,

¹¹ kä bɛ la muuth mi col mi bi ji̱ pën guec, kä bi nyɔc ji̱ muɔl piny.

¹² “Kä Kuoth /cɛ te ni nhial puɔ̱rä? Kä guic ni ciɛr tekɛ nhial ɛlɔ̱ŋ!

¹³ Kä ŋotdi wi̱i̱, ‘Ɛŋu mi dëë Kuoth ɛ ŋa̱c? A derɛ naath ku luk kɛ rɛy muɔ̱th mi col col?

¹⁴ Ca jɛ kum ɛ pua̱a̱r, a/cɛ kɔn guic, min jälɛ rɛy puɔ̱rä.’

¹⁵ A bi ku guɔ̱ɔ̱r ni duɔ̱ɔ̱p ëë wal, mëë jäl kɛ nɛy tin ji̱ dueeri?

¹⁶ Tëë ci wä a/ken gua̱a̱th li̱ethdiɛn ni cop, tëë ca lɔk ɛ nyɔc.

¹⁷ Tëë jiökɛ Kuoth i̱, ‘Bänynikɔ piny, ɛŋu mi dëë Kuoth in leny buɔ̱mdɛ ti diaal ɛ lät kä kɔ mɔ?’

¹⁸ Kä ɛ jɛn ɛ nëë thiääŋ dho̱rkiɛn kɛ gɔy, aal a luek ji̱ dueeri nɔ̱a̱n kɛ ɣä.

¹⁹ Kä cu ji̱ cuŋni lo̱ckiɛn tɛɛth min ca da̱kdiɛn nɛn, kä cu nɛy tin kueckɛ ŋu kɛ dɔl,

²⁰ kä cukɛ wee i̱, ‘Kɛ thuɔ̱k ji̱ tɛ̈ran cikɛ da̱k, kä tin ci kään ci mac kɛ dup.’

²¹ “Ma̱tdɛ yɛnɛ Kuoth, bi tekɛ mal, inɔ bi gɔy ben kä ji̱.

²² Liŋ ruaacni kɛ, kä titkɛ kɛ rɛy lɔaacdu.

²³ Kä mi wi̱i̱ jiäk wä woc rɛydu a bi rietni rɔ Kuoth in leny buɔ̱mdɛ ti diaal, ba ji̱ päl.

²⁴ Yori da̱a̱pdu rɛy tupä, kä yori da̱a̱p A-pir-ka rɛy lo̱o̱lä ala guiy.

²⁵ Jakni ni Kuoth kä da̱a̱pdu, kä a jɛ la ciɛkdu min bo̱r,

²⁶ kɛ ɣöö bi nhök cu jek kä Kuoth in leny buɔ̱mdɛ ti diaal, kä bi cu tekɛ ŋa̱th kɛ jɛ.

²⁷ Kä palni jɛ, bɛ ji̱ liŋ, kä bi ya̱cdu cu la̱t.

²⁸ Kä mɔ bi lat ɔ, ba lät kä ji̱, kä bi duɔ̱pku cu tekɛ buay.

²⁹ Kä Kuoth lo̱kɛ liak, käänɛ ni nɛy tin mua̱l mua̱a̱l.

³⁰ Jɛn käänɛ naath amäni nɛy tin jiäk, kä ba ji̱ kän kɛ gɔɔy lätniku.”