I-yob 21 - RUAC KUƆTH IN RƐL RƆ

Luɔc I-yob kɛ jɛ

¹ Kä cu I-yob jɛ loc i̱,

² “Liɛŋɛ ruaacnikä agɔaa ɛ jɛn bi ku la tɛ̈th lɔaacdun ɔ kɛ ɣä.

³ Pa̱lɛ ɣä ɣöö latdä ruacdä, kɛ kɔr kä min cä ruac, kuɛ̈ɛ̈ ɣä dɔl.

⁴ Ɛn ruacdä /cä jɛ lat kɛ raan, thilɛ mi dëë ɣä jak kä bit.

⁵ Kä guɛcɛ ɣä agɔaa a bia ro̱ŋ, a bia thukun nhiɛt kɛ tetkun.

⁶ Kä mɔ cä jɛ car ɔ ɛn nɛmɛ, la dualä ɛlɔ̱ŋ, kä la lathɛ puɔ̱nydä.

⁷ Ɛŋu la jäny nɛy ti tekɛ dueer kɛ tëk ɔ, a cuɔpkɛ run ti ŋuan kä dɔŋkɛ nikɛ buɔ̱m?

⁸ Kä te gaatkiɛn nhiamdiɛn kä bi gaat gankiɛn lɛ piith waaŋdiɛn.

⁹ Kä dho̱rkiɛn thilɛ riɛk mi dual kɛ kɛ, thilɛ riɛk mi no̱ŋ Kuoth ɛ kɛ.

¹⁰ Kä ɣɔ̱ɔ̱kiɛn diaal tuɔ̱tkɛ kɛ, kä di̱eth kɛ a thil thɔ̱a̱r.

¹¹ La bä gaatkiɛn raar ce̱tkɛ buɔ̱n deet mi wä kɛ ŋar.

¹² Kä la ŋarkɛ pua̱tkɛ dɔ̱mpiny kɛnɛ tuɔ̱ŋ kɛ yikyikni.

¹³ La thuɔ̱kɛ tëkdiɛn ni gɔɔyä, kä li̱wkɛ nikɛ mal.

¹⁴ Kä la jio̱k kɛn Kuoth i̱, ‘Päl kɔ! /Cakɔ jɛ go̱o̱r i̱ bakɔ dupku ŋa̱c.

¹⁵ Ɛŋa ɛn Kuoth in leny buɔ̱mdɛ ti diaal min dëë kɔ lätikä? Kä ɛŋu mi bakɔ jek mi wakɔ jɛ pal?’

¹⁶ Kä caar kɛn ɛ i̱ jekɛ gɔɔydiɛn kɛ buɔ̱mdiɛn, /cä luek nɛɛni ti jiäk dëë liŋ.

¹⁷ “Kä ca lɛmbär raam mi jiäk yieny nikä di̱? Kä ci riɛk kɛ jek nikä di̱? Kä ci Kuoth kɛ met däk kɛ gakdɛ?

¹⁸ Kä cikɛ ce̱tnikɛ jil rɛy jiɔam, nyoon mi lɔk thulɛ?

¹⁹ Kä ci wee i̱, ‘Li̱p Kuoth dueerkiɛn gaatkiɛn.’ Akɛ culɛ kɛ, kɛ ɣöö bikɛ jɛ kulɛ ŋa̱c.

²⁰ Akɛ nɛ̈nkɛ da̱k kɛ wäŋkiɛn, akɛ jëkɛ gak Kuoth in leny buɔ̱mdɛ ti diaal.

²¹ Kä ɛŋu dëë kɛn ɛ ŋa̱c ɔ kä dho̱rkiɛn tin ci kɛn kɛ ba̱ny piny, kɛ gua̱a̱th in ci ni̱n teekädiɛn thuɔ̱k?

²² Kä tëë kɛ ram mi dëë Kuoth ŋi̱eec, kä ŋäcɛ jɛ i̱ ɛ Kuoth luk naath ɔ amäni tin luɔ̱thkɛ?

²³ Ci ram kɛl kɔŋ li̱w nikɛ gɔɔy pua̱a̱nydɛ, kɛ ni̱n ti tɛ̈thkɛ lɔcdɛ rɛy malä,

²⁴ kä jɛn puɔth puɔnydɛ kɛ thiɔl. Bum cɔ̱wkɛ ce̱tnikɛ ta̱a̱ ŋuɛɛtädɛ.

²⁵ Kä cu ram mi dɔ̱ŋ li̱w rɛy cucä mi di̱i̱t, /kenɛ tɛ̈th lɔaac met ŋa̱c.

²⁶ Kä cua kɛ kony niɛ muun ɔ kɛl ɔ, kä cu rɛl kɛ cam kɛn da̱ŋ rɛw.

²⁷ “Nɛ̈nɛ jɛ ɣän ŋa̱cä min carɛ, min bia ɣä moc duer kɛ jɛ.

²⁸ Kä kɛ ɣöö laar yɛnɛ i̱, ‘Dhɔr kua̱r a nikä? Kä dhɔr in cieŋ gua̱n dueeri thi̱n a nikä?’

²⁹ A /ka̱nɛ nɛy tin ja̱lkɛ duɔ̱ɔ̱p ku thiec, kä /ken yɛn tin ca lat ɛ kɛn ku nhɔk,

³⁰ ɛn ɣöö gua̱n dueeri pa̱lkɛ ni jɛ kɛ cäŋ däkä, kä la lua̱kɛ ni jɛ kɛ cäŋ gaak?

³¹ Ɛŋa mi ci lät raam mi jiääk kɔŋ lo̱k, kä ɛŋa ci jɛ kɔŋ cuɔ̱l lätkɛ mɔ?

³² Kä mɔ ca jɛ naŋ kɔ̱kädɛ mɔ, la gaŋkɛ wi̱c muɔ̱ɔ̱ndɛ.

³³ La päl mun lööli rɔ piny puɔ̱ɔ̱nydɛ, kä wä nɛy ti nyin ŋuan guäth kunyädɛ.

³⁴ Bia ɣä kulɛ com i̱di kɛ ruacdun ɛ thil luɔt ɛ? Kä tin cia lat kɛ ti thil luɔt.”