I-yob 20 - RUAC KUƆTH IN RƐL RƆ

Ruac Dho-par

¹ Kä cu Dho-par raan Naamaa wee i̱,

² “Ci ca̱rä, ɣä kok kɛ ɣöö bä ruac ɛmɛ loc, cɛ ɣä pën ɣöö dëë rɔ pa̱l piny.

³ Min ci lat ɛ kuëth, kuɛ la ɣöö cä luɔcdɛ jek kɛ ca̱r lɔacdä.

⁴ Kä ji̱n kui̱ci jɛ ni wal, ni mëë kua raan la̱th wi̱i̱ muɔ̱ɔ̱n,

⁵ ɛn ɣöö tɛ̈th lɔaac raam mi thil Kuoth i̱ kuiyɛ?

⁶ A cäŋ ci liakdɛ cop ni nhial, kä ci ca̱rɛ cop ni pua̱a̱ri,

⁷ bɛ duɔ̱p amäni cäŋ kɛl ce̱tnikɛ tup, a bi nɛy tin ca jɛ nɛn wee i̱, ‘Kä jɛn a ni?’

⁸ Kä jɛn bɛ bath ce̱tnikɛ la̱k, a thilɛ mi ba jek kä jɛ, bɛ riaw ce̱tnikɛ nyuuth wa̱r.

⁹ Kä ram mi ci jɛ nɛn /cɛ jɛ bi nyɔk kɛ nën, kä bɛ bath guäth ëë la tëë thi̱n.

¹⁰ Bi gaatkɛ gɔɔy go̱r kä nɛy tin can, kä bɛ ria̱ŋdɛ thöp ɛ jɛn.

¹¹ Kä cɔ̱wkɛ tekɛ kɛ buɔ̱m mi di̱i̱t, duundɛ ɣöö bakɛ kony rɛy tuɔ̱ɔ̱r kɛ jɛ kɛɛl.

¹² “Kä mi jiääk gɔalɛ̈ kä jɛ, a tɔ̱ɔ̱wɛ jɛ ni thokdɛ,

¹³ kä /cɛ jɛ nho̱k jiɛɛn thokdɛ cɛ pa̱l ni jɛ thi̱n,

¹⁴ ŋotdɛ bi mi̱ethdɛ jiääk jicdɛ a bɛ ce̱tnikɛ lueŋ thɔa̱a̱l kä jɛ.

¹⁵ Kä jɛn bɛ ria̱ŋ in tekɛ jɛ ŋök raar, bi Kuoth jɛ jak kä ŋɔkɛ jɛ.

¹⁶ Kä jɛn bɛ luɛth ni lueŋ thɔa̱a̱l, bɛ li̱w nikɛ ka̱c thɔa̱a̱l.

¹⁷ Jɛn /cɛ yiër liɛth bi nɛn, yiër tin lo̱ny kɛ liɛth tuar.

¹⁸ Kä bɛ tin cɛ la̱t luɔ̱c jɔk a /kenɛ kɛ cam, kä /cɛ cuɔm kä tin cɛ kɔak bi jek.

¹⁹ Kɛ ɣöö cɛ can yɔŋ kä cɛ kɛ päl baaŋ, kä cɛ duël nɛɛni kɔ̱kiɛn mac.

²⁰ “Kɛ ɣöö da̱rɛ thilɛ jɛ pek, kä /ci ria̱ŋdɛ jɛ dëë met luäk.

²¹ Kä mi mi̱thɛ thilɛ mi la doth, kɛ kui̱c ɛmɔ ci gɔɔydɛ thuɔ̱k.

²² Kä ni rɛy riäŋädɛ bi riɛk jɛ pen ikä, rik diaal bikɛ ben kä jɛ.

²³ Kä gua̱a̱th in thiääŋɛ jicdɛ, bi Kuoth gakdɛ jäk kä jɛ, bɛ cua̱ mi̱eth mi ro̱ŋ kä jɛ.

²⁴ Kä mi wëë rɔ wä bar kä gua̱n muɔ̱t, ba jɛ bär ɛ gua̱n bäärä cikä min yian.

²⁵ Ɛn bäär cɛ wuth ni puɔ̱nydɛ, ci mut wä wuth ni cuenydɛ, kä bi dual mi di̱i̱t ben lɔɔcdɛ.

²⁶ Kä muuth mi col liipɛ jɛ, kä bi mac mi bëë ni nhial jɛ pɛt. Kä tin ŋot kɛ tëk dhɔrɛ bikɛ pɛ̈t bä.

²⁷ Kä bi pua̱a̱r dueerkɛ lat raar, kä bi piny kɛ jak kä thuɔ̱ɔ̱k.

²⁸ Kä bi nyɔc nyin dhɔaarɛ lɔk, bi löny kɛ naŋ kɛ cäŋ gaak Kuɔth.

²⁹ Nɛmɛ ɛ jɛn da̱k nɛɛni ti ji̱ dueeri, ɛ jɛn mi ci Kuoth ɛ lar kɛ kui̱diɛn.”