I-yob 2 - RUAC KUƆTH IN RƐL RƆ

Ɣɔ̱n I-yob in rɛwdɛ

¹ Kɛ cäŋ mi dɔ̱ŋ cu gaat Kuɔth rɔ̱ nyɔk kɛ ben nhiam Kuɔth Nhial, cu Gua̱n jiäkni ben bä bëë nhiam Kuɔth.

² Kä cu Kuoth Nhial Gua̱n jiäkni thiec i̱, “Kä bi̱i̱ nikä?” Kä cu Gua̱n jiäkni jɛ loc i̱, “Ba̱a̱ jäl rɛy ɣɔaa, wiɛlä rɔ thi̱n.”

³ Kä cu Kuoth Nhial jɛ jiök i̱, “Ji̱n ŋäci ja̱ŋdä ni I-yob, kɛ ɣöö thilɛ ram mi päär kɛ jɛ rɛy ɣɔaa? Thilɛ jɛ bɛ̈ɛ̈l kä ɛ Gua̱n cuŋni mi luth Kuoth kä lo̱k jiäk. Jɛn ŋotdɛ thiɛkädɛ, cäŋɛ ni mɔ ci ɣä jak kä da̱kä jɛ mɔ ni baaŋ.”

⁴ Kä cuɛ Kuoth Nhial loc i̱, “La raan ti diaal päl kɛ ɣöö bɛ tëk!

⁵ Met ni jɛ lät kä duɔ̱ɔ̱r puɔ̱ɔ̱nydɛ, mi /cɛ ji̱ bi kuëth.”

⁶ Kä cu Kuoth Nhial jɛ jiök i̱, “Jɛn ɔ cä la̱th tetkädu mɔ, duundɛ ɣöö /cu jɛ näk.”

⁷ Ɛ jɛn cu Gua̱n jiäkni jiɛɛn nhiam Kuɔth Nhial, kä cuɛ I-yob wä moc kɛ juey gupä a känɛ jɛ pa̱a̱tni ciöknikɛ cu mäni wi̱cdɛ.

⁸ Kä cu I-yob rɔ moc kɛ tha̱lier mi la jɔnyɛ puɔ̱nydɛ, kä cuɛ wä ciɛŋ ni rɛy ŋɛthä.

⁹ Kä cu ciekdɛ jɛ jiök i̱, “Ji̱n ŋotdi ni thiɛkädu? Ɛŋu ci Kuoth kueth ɔ bi cu li̱w!”

¹⁰ Kä cuɛ ciekdɛ loc i̱, “Ji̱n ruaci nikɛ ruac ciek mi dɔ̱a̱r. A banɛ ku nhɔk ni gɔy kä Kuoth Nhial kärɔ̱, kä /canɛ jiäk bi nhɔk?” Kɛ kui̱ kä ti̱ti̱ diaal /ken I-yob duer la̱t kɛ tin latdɛ.

Cuɔ̱p mäthni I-yob da̱ŋ diɔ̱k

¹¹ Kä mëë ci mäthni I-yob da̱ŋ diɔ̱k jiäk diaal tëë ci tuɔɔk kä jɛ liŋ, cu kɛ ben gua̱thnikiɛn tin cieŋkɛ thi̱n, Ɛ-li-padh raan Te-man kɛ Bil-dad raan Cuwa kɛ Dho-par raan Naamaa. Cu kɛn ɛ mat ɛn ɣöö bikɛ ben kä I-yob ba ben luäk kɛ pa̱r kä ba ben bum.

¹² Kä mëë cikɛ jɛ nɛn a na̱n, /ken kɛ jɛ ŋic. Kä cukɛ wiee kɛ jɔw mi di̱i̱t. Kä cukɛ bieyni kiɛn rɛ̈t, kä cukɛ ŋɛ̈th kiɛth nhial wuɔ̱thnikiɛn.

¹³ Kä cukɛ nyuur piny kɛɛl kɛ jɛ kɛ ni̱n bärɔw. Kä cuɛ thil ram mi cu ruac kɛ jɛ, kɛ ɣöö cikɛ cuɔ̱cdɛ nɛn di̱tdɛ ɛlɔ̱ŋ.