I-yob 19 - RUAC KUƆTH IN RƐL RƆ

Luɔc I-yob

¹ Kä cu I-yob jɛ loc i̱,

² “Ɛ bi ku mäni nɛy, bia cuc ni puɔ̱nydä mɔ, kä bia däk ni ɣä kɛ rieet ɔ?

³ Nikä wäl täämɛ ruacɛ kɛ ɣä, /ci yɛn po̱c kɛ ɣöö lät yɛn ɣä duer?

⁴ A cäŋɛ mi ɛ thuɔ̱k ɛn ɣöö ta̱a̱ kɛ duer, ɛn duerä ca ni duŋdä ɣän kärɔa.

⁵ Kä mi caar yɛn ɛ i̱ gɔw ni yɛn kä ɣä, a bia riɛkdä lat ala duerä,

⁶ ŋa̱cɛ jɛ ɛn ɣöö ɛ Kuoth mocä duer ɔ, ɛ jɛn ci ɣä yiɛn ɔ kɛ cambakdɛ.

⁷ Kä ɣän cä wiee i̱, ‘Ko̱r!’ Thilɛ ram mi cu ɣä loc, kä cua̱ ruac kɛ kui̱ cuuŋä, kä cuɛ thil ram mi lat cuɔ̱ɔ̱ŋ.

⁸ Kä Kuoth cɛ duɔ̱pkä go̱l thilɛ gua̱a̱th mi coth kɛ ɣä, cɛ duɔ̱pkä jak kä col.

⁹ Jɛn cɛ wuɔ̱tdä woc kä ɣä, kä cɛ kɛ̈kdä nyon.

¹⁰ Kä jɛn cɛ ɣä dup a cä riaw, kä cɛ ŋa̱thdä yut ce̱tnikɛ jiath, mi ca yut ciöknikɛ.

¹¹ Jɛn cɛ ɣä pɛt kɛ gakdɛ, a ci ɣän a gua̱n tɛ̈rɛ.

¹² Kä ci rɛmdɛ ɣä mak cikɛ rɔ̱ tët puɔ̱l ti gölkɛ ni ɣä.

¹³ “Kuoth cɛ gaatmaari jak kä nɔ̱a̱n kɛ ɣä a ci ɣän a juɔ̱r kä nɛy tin ŋa̱cä.

¹⁴ A cä cu thil ji̱ maarä kɛnɛ mäthni.

¹⁵ A ci ɣän a juɔ̱r kä ja̱a̱lkä kɛnɛ nyier la̱tdä, a cä cua̱ ram mi guä waaŋdiɛn.

¹⁶ Cɔalä kuanydä, kä /cɛ ɣä loc, a cäŋ liɛpä jɛ bä.

¹⁷ A ci ɣän a mi jiääk ni kä ciekdä, kä ca ɣä lo̱k ɛ gaatmaar.

¹⁸ A cäŋɛ ni dho̱li yɔaŋkɛ ɣä, kä dɔalkɛ ɣä mi ca ɣä nɛn.

¹⁹ Ni mäthnikä pa̱ny lökɛ ɣä nɛy tin nhɔakä ca rɔ̱ riet ɣä.

²⁰ Ɣän cä nuään a cä thilɛ gua̱a̱th a cua̱ leny ni tëkdä kärɔa.

²¹ A lo̱ckun tɛth kɛ ɣä mäthnikä, kɛ ɣöö ci Kuoth ɣä moc riɛk!

²² Bia ɣä guɔ̱ɔ̱r ce̱tkɛ min ci Kuoth ɛ la̱t? A /ka̱nɛ ku ro̱ŋ kɛ puɔ̱nydä?

²³ “Cä go̱r ni mi tëë kɛ ram mi ci rieetkä gɔ̱r! Duŋ mi tëë kɛ ram mi cikɛ gɔ̱a̱r rɛy buɔk!

²⁴ Kɛnɛ mi ca kɛ gɔ̱a̱r rɛy pa̱a̱m kɛ ɣöö dëë kɛ te thi̱n amäni cäŋ kɛl!

²⁵ Duundɛ ɣöö kua̱ jɛ lɛ ŋa̱c i̱ tëk Gääŋdä, min bi wi̱c muɔ̱ɔ̱n ben luk kɛ jɔak.

²⁶ A cäŋ ni mi ci guɔ̱pdä thuɔ̱k ɛ, ŋotdɛ bä, bä Kuoth nɛn kɛ jɛn ri̱ŋdä mɛmɛ.

²⁷ Ɣän bä jɛ nɛn kɛ wäŋkä, bä guic ni jɛ a /ci mɔ a ram mi dɔ̱ŋ. Ci lɔcdä baath rɛydä!

²⁸ Kä mi ci jɛ lar i̱, ‘Bakɔ jɛ ku lɛ guɔ̱ɔ̱r i̱di, kä tuk rikä tëë kɛ jɛ.’

²⁹ Kɛ kui̱c ɛmɔ luthni ko̱r, kɛ ɣöö gak Kuoth bɛ da̱k nööŋ kɛ ko̱r, kä biɛ cu ŋa̱c ɛn ɣöö te luk wa̱nɔ.”