I-yob 18 - RUAC KUƆTH IN RƐL RƆ

Ruac Bil-dad

¹ Kä cu Bil-dad raan Cuwa wee i̱,

² “Bi ruac ɛ mɔ päl i̱ nɛy I-yob? Liŋ laat, kɛ ɣöö banɛ kulɛ ruac.

³ Ɛŋu guici kɔ mɔ ce̱tkɛ ɣɔ̱k? A ku nɛy ce̱tkɛ dɔa̱a̱r waaŋdu?

⁴ Kä ɛ ji̱n däk rɔ mɔ kɛ gakdu, ɛ ba wi̱c muɔ̱ɔ̱n ku päl kɛ kui̱du, kiɛ ba pääm woc gua̱thnikiɛn?

⁵ “Ba buay raam mi lät jiäk woc, kä /ci bo̱l maacdɛ bi bo̱o̱l.

⁶ Bi buay duëëlɛ a muth, buay in te gekädɛ bɛ thil.

⁷ Kä bi buɔ̱mdɛ kuɛ̈ɛ̈, bi cärkɛ jɛ kɔal piny.

⁸ Kä cɛ kac rɛy cambakä kɛ ciökɛ, kä cɛ ga̱a̱c kɛ ɣöö cɛ rɔ nyoŋ.

⁹ Ci dhuur ɛ käp ni dɔ̱ɔ̱ŋdɛ. Cɛ kɛ käp ni kɛn diaal.

¹⁰ Ca rɔk tɛ̱̈ɛ̱̈ piny kɛ kui̱dɛ, kä te dhuur duɔ̱pni mi ka̱p kɛ jɛ.

¹¹ Kä ci dual jɛ go̱l pekni diaal, guurɛ jɛ gua̱thni diaal.

¹² Kä duer go̱o̱rɛ jɛ ɛlɔ̱ŋ, kä liip da̱k ni pɛ̈ɛ̈ndɛ.

¹³ Ci juey guɔ̱pdɛ thuk, a cuɛ kɔŋ thuk ni cuŋkɛ.

¹⁴ Ca jɛ däk guäthdɛ in cieŋɛ thi̱n kɛ mal, cua nöŋ ni jɛ kuäär li̱eth.

¹⁵ Thilɛ mi ci duɔth dhɔrɛ, ci mac duelɛ däk.

¹⁶ Ci ciökɛ kööt pinyi, kä ci ji̱th kɛ rɔɔl nhialɛ.

¹⁷ Ci kɛ̈kdɛ bath wi̱i̱ muɔ̱ɔ̱n, kä /cɛ thil ciöt rɛy wec.

¹⁸ Ca jɛ woc rɛy buɔykä, kä ca jɛ naŋ rɛy muɔ̱th, cɛ cu thuɔ̱k rɛy ɣɔaa.

¹⁹ Thilɛ jɛ kuay rɛy nɛɛnikɛ, a thilɛ ram mi tëk kä jɛ.

²⁰ Kä da̱kdɛ cɛ ji̱ känyä ca̱ŋ kɛnɛ ji̱ konyä ca̱ŋ jak kä dual.

²¹ Kɛ thuɔ̱k ɛn nɛmɛ ɛ gua̱a̱th raam mi jiääk. Ɛ gua̱a̱th raam mi thil Kuoth.”