I-yob 17 - RUAC KUƆTH IN RƐL RƆ

¹ “Ci yiëëdä cuuc kä ci ni̱nkä kuɛ̈ɛ̈, a liip kɔa̱a̱k ni ɣä.

² Kɛ thuɔ̱k ca ɣä go̱l ɛ nɛy ti yɔaŋkɛ ɣä, kä bi wäŋkä guic ni ŋɛ̈ɛ̈nydiɛn.

³ “Kämni ɣä min thiëëcä lö Kuoth, kɛ ɣöö thilɛ ram mi dɔ̱ŋ mi dëë mal jek kä jɛ.

⁴ Min ci kɛ pën ŋäc ŋɔaani, /cukɛ lɛ jak kä dɔanykɛ ɣä.

⁵ Kä mi gak raan mäthnikɛ kɛ ɣöö bɛ duɔ̱ɔ̱r jek kä nyinkiɛn, bi gaatkɛ cuuc kɛ kui̱dɛ.

⁶ “Ci Kuoth ɣä jak kä cäät kä naath, a ŋuɔ̱lkɛ waŋdä kä ruɛy ɛ naath.

⁷ A ci waŋdä cuɔl kɛ jiath lɔaac, a cä cu ce̱tnikɛ ti̱eep.

⁸ Kä ga̱a̱c nɛy tin ɛ kɛn i̱ tekɛ cuŋ kɛ nɛmɛ, kä nɛy tin thilɛ ŋu, yakɛ ram in thil Kuoth.

⁹ Kä nɛy tin ji̱ cuŋni rɔamkɛ ta̱a̱diɛn, kä nɛy tin gɔw reep buɔ̱mdiɛn ni rɔ.

¹⁰ Kä yɛn, bia nyɔakɛ jɛ kɛ ɣɔ̱n yɛn diaal, thilɛ ram mi pɛl mi dëë jek rɛydun.

¹¹ Ci ni̱nkä thuɔ̱k, kä ci ca̱rä kuɛ̈ɛ̈, kä ci tin göörä thil.

¹² Kɛn nɛy tin luɔckɛ cäŋ däär ni wäär, kä cɔɔl kɛn muth i̱, ‘Ci buay thia̱k.’

¹³ A guɛcä ni wec jɔɔkni ala cieŋ, kä cä dhaŋdä pap rɛy muɔ̱th.

¹⁴ Kä dëë kɔ̱a̱k cɔl i̱, ‘Gua̱a̱r,’ kä dëë kɔ̱a̱m cɔli, ‘Maar,’ kiɛ ‘Nyimaar’.

¹⁵ Kä dëë min ŋa̱a̱thä kulɛ te nikä? Kä ɛŋa dëë min ŋa̱a̱thä nɛn ɔ?

¹⁶ A derɛ ku wä piny kä jɔɔk? A dëë kɔ ku loc rɛy tupä kɛɛl kɔnɛ min ŋa̱a̱thä?”