I-yob 16 - RUAC KUƆTH IN RƐL RƆ

Luɔc I-yob kɛ Ɛ-li-padh

¹ Kä cu I-yob jɛ loc i̱,

² “Ɣän cä ti ŋuan ti ce̱tkɛ kɛn ti̱ti̱ liŋ. Kɛ yɛn nɛy ti tekɛ com mi gääy ɣä ɛlɔ̱ŋ yɛn diaal.

³ Kä bi ruac baaŋdun lɛ tekɛ pek? Kä ɛ ruac ŋukä loc yɛn ɛ mɔ?

⁴ Ɣän bä dëë ruac ce̱tkɛ yɛ mi ku yɛn lɛ te guäthdä. Dëë yɛ la̱t ruac mi jiääk, a dëë wi̱cdä a ti̱eŋä yɛ.

⁵ Ɣän dëë com ni yɛ, dëë yɛ bum kɛ lɛpdä a bia buɔ̱m.

⁶ “Kä cäŋ ruac ɣä /ci bɛ̈c ɣä päl, kä cäŋ cä biɛt /cɛ jiɛc.

⁷ Kä kɛ thuɔ̱k ci ɣä däk lö Kuoth, ci ji̱ dhɔaarä diaal dup.

⁸ Kä ci ɣä käp, kä cɛ cua̱ neendä. Kä ci kɔ̱a̱cdä cua̱ gua̱n tɛ̈rä a cɛ cu gɔany ni ɣä.

⁹ Kä jɛn Kuoth cɛ ɣä däk kɛ gakdɛ a cɛ ɣä lo̱k, kä cɛ lɛckɛ kac kɛ ɣä. Kä ci gua̱n tɛ̈rä ɣä cu guic kɛ waŋ mi jiääk.

¹⁰ Kä ci naath cu lat ni ɣä jɔ̱ɔ̱r, a pät kɛn ni ɣä, kä cikɛ rɔ̱ mat kɛ kui̱dä.

¹¹ Ci Kuoth ɣä ka̱m nɛy ti thil Kuoth, cɛ ɣä cu la̱th tetni nɛɛni ti jiäk.

¹² Kä mëë dan gɔw ti diaal kɛ ɣä, kä täämɛ cɛ ɣä moc riɛk, cɛ ɣä käp ni ŋuääk kä cɛ ɣä dup. Cɛ ɣä cu jak kä riɛkdɛ,

¹³ ci bääri kɛ ɣä go̱l. Cɛ rokä yiath a thil pälikä, kä cɛ kɛ̈thdä wuɔc ni piny.

¹⁴ Kä cɛ ɣä moc kɛ buɔ̱ɔ̱t nikä ti nyin ŋuan, cɛ ɣä wurikä ce̱tkɛ wääth ko̱o̱r.

¹⁵ Kä ciaŋä ni bieyni cuaalä kɛ ɣöö pa̱rä, a cä buɔ̱mdä muɔl rɛy tupä.

¹⁶ A ci nhiamdä tiɛth kɛ wiee, kä ci waŋdä cuɔl ɛ cuc,

¹⁷ kä thilɛ ko̱r mi cä lat kä palä gɔaaɛ.

¹⁸ “Kä lö piny /cu riɛmdä mol, kä a thiecdä /ci thil luɔt.

¹⁹ Ɛn täämɛ neendä jɛn a ni nhial, ram in bi ɣä luäk jɛn a ni puɔ̱rä.

²⁰ Mäthnikä ca ɣä yɔŋ, kä ci waŋdä Kuoth löny mer,

²¹ kɛ ɣöö dëë Kuoth läŋ kɛ kui̱dä ce̱tkɛ min la läŋ raan gua̱n thieekädɛ.

²² Kɛ ɣöö kɛ run ti tɔt tɔ̱ bi ben tɔ̱, bä wä jäl ni duɔ̱p in thil luny jɔk.”