I-yob 15 - RUAC KUƆTH IN RƐL RƆ

Ruac Ɛ-li-padh

¹ Kä cu Ɛ-li-padh gat Te-man jɛ loc i̱,

² “Dëë ram mi pɛl ruac loc kɛ ca̱r mi thil luɔt, a bi rɔ thiäŋ kɛ ruac mi baŋ?

³ Derɛ ruac mi thil luɔt lat, ruac mi thil mi bɛ nööŋ?

⁴ Kä lo̱ki luth Kuɔth, kä ci palu kɛ Kuoth kuɛ̈ɛ̈.

⁵ Kɛ ɣöö dueerku ca ji̱ ŋi̱eec, ɛ ci ka̱n ni ruaacni nɛɛni tin jiäk.

⁶ Ci rɔ kuɛth kɛ thokdu, a /ci mɔ a ɣän, lɛpdu cɛ ji̱ gɔany.

⁷ “Ɛ ku ji̱n ɛ ram ëë dapkɛ kɛ nhiam? Kiɛ kɔaŋ cak ni ji̱ kä pääm?

⁸ Kä ji̱n ci luek Kuɔth liŋ? Ɛ ku pɛl nath tekɛ ji̱n kä rɔɔdu?

⁹ Kä ɛŋu mi ŋäci kä kuec kɔ? Kä ɛŋu ŋäci mɔ kä kui̱c nɛy ɛ?

¹⁰ Te nɛy ti ci wuɔ̱thkiɛn a cuɔri rɛydan, ti kɔaŋ dap nikɛ kä guur.

¹¹ A /ken luek Kuɔth ku cop lɔɔcdu, ruac in cɛ la̱t ji̱ agɔaa?

¹² Ɛŋu bath lɔcdu ji̱ jɔ̱ɔ̱r ɔ, kä ci wäŋku cuɔl ɛ cuc ɔ,

¹³ a gak i̱ kɛ Kuoth mɔ bi rieet ti̱ti̱ lat ɔ?

¹⁴ Kä ɛŋa kä naath gɔaa ɔ, kiɛ ɛŋa ca dap ɔ kä tëë kɛ cuŋ?

¹⁵ Nɛnɛ Kuoth /cɛ jaakɛ ŋäth, a cäŋɛ ni pua̱a̱r /cɛ gɔaa waaŋdɛ,

¹⁶ derɛ kulɛ tëë di kä ram mi jiääk mi tekɛ dueer, mi lätni dueer ce̱tkɛ ma̱th pi̱i̱ni!

¹⁷ “Ji̱n liŋ ɣä I-yob, a ji̱ la̱tdä mia̱a̱ ŋa̱cä ni,

¹⁸ (mi ca lat ɛ nɛy ti pɛl kä /ken gua̱ni jɛ tɛ̱̈ɛ̱̈,

¹⁹ tëë ca ka̱m mun, kä thilɛ juɔ̱r mi ci rët kɛ rɛydiɛn.)

²⁰ Ram mi gua̱n dueeri mi gua̱n gaak thukɛ ni̱nkɛ diaal a bɛc, run teekädɛ diaal kɛ rik.

²¹ Jiööth dualä diaal te ji̱thdɛ, mi cɛ tekɛ mal, ba jɛ mak ɛ ma̱a̱c nath.

²² Kä /cɛ jɛ ŋäth i̱ bɛ kään rɛy muɔ̱th, kɛ ɣöö liipɛ ni mut mi bi jɛ näk.

²³ Kä jɛn wi̱elɛ go̱o̱rɛ mi̱eth, kɛ ɣöö ŋäcɛ jɛ i̱ ci ni̱n lieth thia̱k.

²⁴ Ci ga̱a̱c kɛnɛ cuɔ̱c jɛ jak kä dual, ce̱tdɛ nikɛ kuäär mi ci rɔ rialikä kɛ ɣöö bɛ jɛ mak.

²⁵ Kɛ ɣöö cɛ tetdɛ cuɔ̱ŋ nhial kä Kuoth, kä cɛ jɛ lat jɔ̱ɔ̱r,

²⁶ banɛ Kuoth a cɛ tetdɛ cio̱c, kɛ ko̱t mi thiɛk thiɛk kä bum.

²⁷ Kɛ ɣöö cɛ nhiamdɛ kum kɛ lia̱a̱, kä cɛ lɛ̈tdɛ yiɛn kɛ dep li̱eth,

²⁸ kä bɛ ciɛŋ ni wi̱i̱ ti ci da̱k, kɛnɛ duel mi ca ciaaŋdɛ päl, mi ci ria̱p a ca di̱r juaacni.

²⁹ Kä jɛn /cɛ bi tekɛ ria̱ŋ kä /ci ria̱ŋdɛ bi jääny, kä /cɛ wecdɛ bi met yiath piny.

³⁰ Kä /ci muth jɛ bi päl, kä ba puɔ̱nydɛ waŋ ɛ mac, ba jɛ cu lɔk ɛ ruacdɛ.

³¹ A jɛ ci rɔ kaŋ kɛ ŋa̱th kä mi thil luɔt, kɛ ɣöö thilɛ mi bɛ jek thi̱n.

³² Bɛ kööt a /ken gua̱a̱thdɛ ni cop, kä /cɛ rɔ bi nyɔk kɛ jëc.

³³ Bɛ ce̱tnikɛ ŋɔ̱a̱r mi pɛn dɛykɛ a /ken kɛ ni ciɛk, ce̱tnikɛ jiath Ɔ-lip mi pɛn gaaknikɛ.

³⁴ Kɛ ɣöö nɛy tin thil Kuoth bikɛ rol, kä bi mac dho̱r nɛɛni tin nhɔakɛ kök waŋ.

³⁵ Kɛn ruëtkɛ ni rik, kä ba dap ni dueer, kä car lɔcdiɛn ni baŋ.”