I-yob 13 - RUAC KUƆTH IN RƐL RƆ

¹ “Ci waŋdä kɛ nɛn kɛn ti diaal ti̱ti̱, kä ci ji̱thdä kɛ liŋ a cä jɛ ŋa̱c.

² Kä mɔ ŋäc i̱ mɔ, ɣän ŋa̱cä jɛ, /ci ɣä leny kɛ pɛl.

³ Duundɛ ɣöö göörä ɣöö dëë ruac kɛ Kuoth, dëë lukdä lat kɛ jɛ.

⁴ Kä yɛn lat yɛn ni kac, kɛ yɛn nɛy ti thil luɔt yɛn diaal.

⁵ Mi ci duŋdun a biɛt, ɛ jɛn dëë ku la pɛl ɔ!

⁶ Kä täämɛ liɛŋɛ min luɔtdä, a wä lɔcdun ɛn min latdä.

⁷ Yɛn dërɛ ruac kacä kɛ Kuoth, dërɛ mɛ̈ɛ̈t lat kɛ jɛ?

⁸ Dëë yɛnɛ ku gaŋ, kiɛ dërɛ luk Kuɔth lat?

⁹ Kä derɛ gɔaa mi cɛ wee lukɛ ji̱? Kiɛ deri jɛ mɛt ce̱tkɛ min deri raan mɛt?

¹⁰ Bɛ ji̱ yi̱k luek kɛ thuɔ̱k mi nhɔki duɔ̱ɔ̱r kɛ tɛ̱̈ɛ̱̈.

¹¹ Bi buɔ̱mdɛ kɛnɛ wuɔ̱tdɛ ji̱ jak kä dual.

¹² Laat comädun thilɛ kɛ luɔt ce̱tkɛ nikɛ ŋɛ̈th, kä tin gaŋɛ ni rɔ ce̱tkɛ nikɛ mun.

¹³ “Lɛ̈nɛ lɛ biɛt, a ruacä, kä a mɔ bi tuɔɔkɔ bëë kä ɣä.

¹⁴ Ɛŋu la̱thä rɔ̱ rɛy rikä mɔ, mɔ la̱thä tëkdä tetkädä mɔ?

¹⁵ Jɛn bɛ ɣä näk, kä thilɛ mi bä ŋäth, ɛ ni ɣöö bä ta̱a̱dä gaŋ nhiamdɛ.

¹⁶ Ɛn nɔmɔ bɛ cua̱ duɔ̱p känädä, kɛ ɣöö thilɛ ram mi thil kuoth mi bi ben nhiam Kuɔth.

¹⁷ Liŋ laatkä agɔaa, a lɔcdu tiit tin bä lat.

¹⁸ Ɛn täämɛ cä lukdä rialikä, kɛ ɣöö ŋa̱cä jɛ i̱ bä tekɛ cuɔ̱ɔ̱ŋ.

¹⁹ Kä tëë kɛ ram mi bi ɣä nöŋ luk? Kä mi tëë kɛ raan, ɣän bä biɛt kä bä cu li̱w.

²⁰ “Kä käm ni ɣä rɛw ti bä thiec ti lö Kuoth, kɛ ɣöö /cä rɔ bi lɛ tɛ̱̈ɛ̱̈ nhiamdu.

²¹ Nɔ̱ɔ̱ni tetdu kɛ ɣä, kä ɛ dualä kɛ ji̱ /ci lɛ ben kä ɣä.

²² Cɔl ɣä bä ben kä ji̱, kiɛ liŋ ruacdä, kä loc ɛ.

²³ Kä kɛ dueer da̱ŋ di cä la̱t tɔ̱? Nyuthni ɣä jiäkä kɛnɛ dueerkä.

²⁴ Ɛŋu ci ɣä riet jɔkdu mɔ, ɛ ci ɣä ku jak kä gua̱n tɛ̈ru?

²⁵ A bi ku rep ni riɛk jieth jiaath mi lɔk jiɔamɛ, kä bi guɔ̱ɔ̱r ni köm mi ci kööt?

²⁶ Kɛ ɣöö ci ɣä gɔ̱a̱r ti bɛ̈c bɛ̈ɛ̈c, kä ci ɣä ka̱m dueer ŋuɛɛtädä.

²⁷ Kä ci cio̱o̱kdä moc kɛ kuatni, kä tiitdi duɔ̱pkä diaal, kä ci gua̱a̱th ciöknikä thɛm bä.

²⁸ Raan thukɛ ce̱tkɛ jiath mi ci dhiap, kɛnɛ bi̱i̱ mi ca cam ɛ kun.”