I-yob 12 - RUAC KUƆTH IN RƐL RƆ

Luɔc I-yob

¹ Kä cu I-yob jɛ loc i̱,

² “A thil diw kɛ yɛn naath, mi wä yɛn li̱w, bi pɛl li̱w kɛɛl kɛ yɛ.

³ Duundɛ ɣöö ta̱a̱ kɛ ca̱r ce̱tkɛ yɛ, /ci kuiy ni pɛlä kä yɛ. Ɛŋa mi dëë ti ce̱tkɛ ti̱ti̱ kui̱c?

⁴ Kä täämɛ dɔalkɛ ni ɣä ɛ mäthnikä, mi cä Kuoth thiec, la liŋɛ ɣä, ɛ ɣän ram mi tekɛ cuɔ̱ŋ kä thilɛ bɛ̈ɛ̈l, kä dɔl kɛn ɣä.

⁵ Nɛy tin thil riɛk la̱tkɛ ɣä kä jiäk, lökɛ nɛy tin tekɛ rik.

⁶ Kä ma̱a̱c nath kɛnɛ nɛy tin thil Kuoth cieŋ kɛ kɛ mal, nɛy tin kuothdiɛn buɔ̱mdiɛn.

⁷ “Thiec ley ba ji̱ nyuɔ̱ɔ̱th, kiɛ thiec diit nhial ba la̱t ji̱.

⁸ Kiɛ thiec juaac dɔaar, kɛnɛ rɛc yiëër ba la̱t ji̱.

⁹ Kä ɛŋa rɛydiɛn diaal kui̱c jɛ mɔ ɛn ɣöö ci Kuoth Nhial nɛmɛ la̱t?

¹⁰ Tëk kä ti diaal tëë tetkädɛ, amäni tëk nɛɛni diaal.

¹¹ Kä /ci ji̱th ran lieŋ rietdä la ɣɔ̱n ce̱tkɛ min la lɛp ran mi̱eth a bil?

¹² Nɛy tin dɔŋ pɛl kɛ kä ja̱ny teekä no̱o̱ŋɛ ŋäc ŋɔaani.

¹³ “Kä pɛl kɛnɛ buɔ̱m kɛ nyin Kuɔth, kä luek kɛnɛ ŋäc ŋɔaani kɛ nyin kɛ.

¹⁴ Mi ci Kuoth jɛ da̱k piny, thilɛ ram mi dëë jɛ nyɔk kɛ ta̱th. Kä ram mi cɛ yiɛn, /ca dëë luäŋ kɛ luɔ̱ny.

¹⁵ Kä mi cɛ nhiaal pën dɛ̈m, la ɣɔw a tekɛ rɛ̈ɛ̈th, kä mi cɛ jɛ jak kä dɛm la thieŋ ɣɔw kɛ pi̱w.

¹⁶ Kä buɔ̱m kɛnɛ pɛl kɛ nyin Kuɔth, kä kaŋ kɛnɛ kaŋni kɛ nyinkɛ.

¹⁷ Kä jɛn la bath ɛ ruëëc, kä la jak ɛ kua̱r luɔ̱ɔ̱kni kä dɔa̱a̱r.

¹⁸ Lonyɛ lät kua̱ri kä yiɛnɛ lɛtkiɛn kɛ bieyni.

¹⁹ Kä jɛn la bo̱o̱th ɛ bööth palä raar, kä däkɛ buɔ̱m nɛɛni tin buɔ̱m buɔ̱ɔ̱m.

²⁰ Jɛn la gookɛ nɛy tin luɔ̱th kɛ, kä woocɛ ŋäc ŋɔaani dɔŋni.

²¹ Jɛn mocɛ nɛy tin luɔ̱thkɛ kɛ pöc, kä woocɛ buɔ̱m nɛɛni tin wäth.

²² Jɛn nyoothɛ tin te rɛy muɔ̱th, kä jak ɛ muth kä buay.

²³ Jɛn jakɛ döör kä bum, kä däkɛ kɛ. Jakɛ döör kä ŋuan, kä riawɛ kɛ dɔɔr.

²⁴ Jɛn woocɛ ŋäc ŋɔaani kä kua̱r ji̱ wec muɔ̱ɔ̱n, kä jak ɛ kɛ kä yi̱c bathä guäth mi thil duɔ̱ɔ̱p.

²⁵ Duɔl kɛ rɔ̱ rɛy muɔ̱th mi thil buay, jakɛ kɛ kä yi̱ec ce̱tkɛ ram mi ci yɔ̱ŋ kɛ kɔaŋ.”