I-yob 11 - RUAC KUƆTH IN RƐL RƆ

Ruac Dho-par

¹ Kä cu Dho-par raan Naamaa ɛ loc i̱,

² “Kɛn rieet ti ŋuan ti̱ti̱ /ca kɛ bi ku loc, kä ɛ bi gua̱n ruac mi di̱i̱t tekɛ cuɔ̱ŋ?

³ Kä ɛ ji̱n i̱ ruacdu mi di̱i̱t ɛmɛ bɛ naath jak kä bit, kiɛ yɔ̱ɔ̱ri naath kɛ ɣöö /ca thokdu bi ri̱t?

⁴ Kɛ ɣöö loori jɛ i̱, ‘Ŋa̱thdä gɔaaɛ, kä thilɛ ɣä duer waaŋ Kuɔth.’

⁵ Kä ɛn Kuoth bɛ yi̱k ruac a bɛ ruac kɛ ji̱,

⁶ a bɛ ji̱ nyuɔ̱th luɔt pɛlä! Kɛ ɣöö ɛn ŋäc ŋɔaani tëë kɛ kui̱c da̱ŋ rɛw. Kä ŋäcni jɛ ɛn ɣöö Kuoth cɛ tha̱a̱ŋ dui̱rädu päl.

⁷ “Kä ji̱n deri ca̱r Kuɔth ŋa̱c? Kiɛ deri pek bumä Kuɔth in leny buɔ̱mdɛ ti diaal jek?

⁸ Nɔ̱a̱n ni ca̱rɛ kä pua̱a̱r, min thilɛ mi deri la̱t thi̱n. Kä lueŋ ni pekdɛ kä ro̱l jɔɔkni min ci dëë ŋa̱c.

⁹ Bärni jɛn kä wi̱c muɔ̱ɔ̱n mi ca thɛm, kä ɣäpni jɛn kä bäpdiit.

¹⁰ Kä mi cɛ ben, kä cɛ ji̱ yiɛn, kɛnɛ mi lukɛ ji̱, ɛŋa dëë jɛ gak ɔ?

¹¹ Kɛ ɣöö ŋäcɛ nɛy tin jiäk kä mi cɛ duer nɛn, /cɛ jɛ a lat ɛ?

¹² Bi ram mi dɔ̱a̱r ŋɔak ŋa̱c, ɛ ni mi ci muul di̱eth kɛ raan.

¹³ “Car wi̱cdu I-yob, kä käm ni lɔcdu Kuoth.

¹⁴ Kä mi te duer rɛydu, wocɛ, /cu Gua̱n jiäkni jak kä cieŋ rɛydu.

¹⁵ Kɛ thuɔ̱k deri wi̱cdu kap nhial a thil pöc, kä bi tekɛ mal a thil dual.

¹⁶ Kä bi riku cu pa̱l ruëëc bikɛ car ce̱tkɛ pi̱ ti ci yäk.

¹⁷ Bi tëkdu buay ce̱tnikɛ cäŋ däär, kä bi wäärɛ ce̱tnikɛ runwaŋ.

¹⁸ Kä bi tekɛ mal kɛ ɣöö te ŋa̱th wan ɔ, bi Kuoth ji̱ gaŋ, kä bi tekɛ lɔ̱a̱ŋ.

¹⁹ Bi tɔ̱ɔ̱c a thilɛ mi jak ji̱ kä dual, kä bi nɛy ti ŋuan luäk go̱r kä ji̱.

²⁰ Duundɛ ɣöö bɛ wäŋ nɛɛni tin jiäk yäm, bɛ cu thil duɔ̱ɔ̱p mi lënykɛ ni rɔ̱, kä bi ŋa̱thdiɛn cua̱ ni lia̱a̱.”