I-yob 10 - RUAC KUƆTH IN RƐL RƆ

¹ “Ɣän cä ŋɔa̱a̱ŋ kɛ tëk. Kä ɣän bä go̱o̱nydä päl. Ɣän bä lat ni bɛ̈c yieekädä.

² Kä bä Kuoth jiök i̱, /cu ɣä lat jɔ̱ɔ̱r, nyuth ni ɣä duerä.

³ Lotdɛ rɔ kɛ ji̱ i̱ bi ɣä ciɛŋ a jiäk, a bi mi ci la̱t ɛ ji̱n lo̱k, a bi nhɔk ni cär gua̱n dui̱rä?

⁴ Ji̱n ti̱i̱ kɛ wäŋ ti ce̱tkɛ waŋ ran? Kä guici kɛ guec nath?

⁵ Kä ni̱nku ce̱tkɛ kɛ ni̱n ran, kiɛ ce̱t runku kɛ run nath,

⁶ mɔ curi jiäkä guic ɔ kä go̱o̱ri duerä,

⁷ kä ŋäci jɛ i̱ thilɛ ɣä duer, kä thilɛ ram mi dëë ɣä kän kä ji̱?

⁸ Lätdi ɣä ɛ ji̱n nikɛ tetku, kä täämɛ lɛni ɣä lɛ däk niɛ ji̱n.

⁹ Kä timɛ ɛn ɣöö ɛ ji̱n tääth ɣä mɔ kɛ mun, go̱o̱ri jɛ ɛn ɣöö bi ɣä luɔc rɛy tupä?

¹⁰ /Ciɛ ji̱n ɛn nëë wooc ɣä ce̱tnikɛ cak diar kä curi ɣä dol ce̱tnikɛ liɛɛth?

¹¹ Kä curi puɔ̱nydä kum kɛ ri̱ŋ kɛnɛ guɔ̱p, kä curi jɛ rɔk kɛ cɔ̱w kɛnɛ räl.

¹² Kä ci ɣä ka̱m tëk kɛnɛ nhök in thil pek, kä curi tëkdä gaŋ.

¹³ Kä kɛn ti̱ti̱ tekɛ rɛydu, cä ŋa̱c ɛn ɣöö ti̱ti̱ tekɛ rɛy cärädu.

¹⁴ Kä mi cä duer ŋäci jɛ, kä /keni ɣä la̱r duerä.

¹⁵ Kä mi ta̱a̱ kɛ duer, riɛk akɛ ɣä! Kä mi ta̱a̱ kɛ cuɔ̱ɔ̱ŋ, /cä wi̱cdä bi met kap nhial, kɛ ɣöö pöcä, guɛcä ni riɛkdä.

¹⁶ Kä mi cä wi̱cdä kap nhial, la kaki ɣä ce̱tnikɛ lony, kä lätdi ɣä ti ga̱ykɛ naath.

¹⁷ La no̱ŋi ɣä nëën ti kɔ̱ŋ, kä reepi gakdu kɛ ɣä, kä la jäki rɛmku kä ɣä.

¹⁸ “Kä ɛŋu curi ɣä jak kä dapkɛ mɔ? DEE gɔaa ni mi cä li̱w a thil ram mi ci ɣä nɛn,

¹⁹ kiɛ duŋ mi /ka̱n ɣä cak, kiɛ dëë dap ni ɣä kä wa̱a̱ kɔ̱k.

²⁰ Kä ni̱n teekädä /ken kɛ thuɔ̱k? Pälä, dɔ̱ŋ dëë tekɛ tɛ̈th lɔaac mi tɔt,

²¹ a /ka̱n ni wä guäth in /ci naath luny jɔk thi̱n, muun muɔ̱th in col,

²² muun in col muuthdɛ ɛ cuc, min ce̱tdɛ buaydɛ nikɛ wäär.”