I-yob 1 - RUAC KUƆTH IN RƐL RƆ

Cäät kɛ kui̱ I-yob

¹ Tëë kɛ wut mi te ro̱o̱l Udh, mi cɔal kɛ i̱ I-yob. Jɛn ɛ wut mi thil bɛ̈ɛ̈l kä te cuŋ, mi luth Kuoth kä lo̱kɛ mi jiääk.

² Jɛn tëë kɛ dhɔɔl da̱ŋ bärɔw kɛ nyier da̱ŋ diɔ̱k.

³ Tëë kɛ dët ti bathdɔɔri bärɔw, kɛ thɔ̱a̱rɔa̱a̱li ti bathdɔɔri diɔ̱k, kɛ thääk ti kur dhieec ti lät, kɛ muɔ̱li ti kur dhieec, kɛ la̱a̱t ti ŋuan. Riäŋ ni jɛn kä nɛy diaal tin te kui̱ känyä ca̱ŋ.

⁴ La gaatkɛ lätni mi̱thni a guääl dho̱rikiɛn, kä la cɔɔl kɛn nyiemani da̱ŋ diɔ̱k kɛ ɣöö bikɛ ben mi̱th kä bikɛ maath kɛɛl kɛ kɛ.

⁵ Kä mɔ ci gua̱th mi̱eth thuɔ̱k ɔ, la I-yob raan jäk kɛ ɣöö bɛ kɛ jak kä gɔw. La muc tin waŋkɛ a wëë thöp ce̱tnikɛ pekdiɛn diaal. Kɛ ɣöö la caarɛ jɛ i̱, “Dɔ̱ŋ ci gaatkä duer a ca Kuoth kuëth kɛ rɛy lo̱cnikiɛn.” Nɔmɔ la I-yob jɛ a lät ni ciaŋ.

Ɣɔ̱n ŋäthä I-yob

⁶ Kɛ cäŋ kɛl cu gaat Kuɔth ben nhiam Kuɔth Nhial, kä cu Gua̱n jiäkni ben kɛ rɛydiɛn.

⁷ Kä cu Kuoth Nhial Gua̱n jiäkni thiec i̱, “Bi̱i̱ nikä?” Kä cuɛ Kuoth Nhial loc, “Ba̱a̱ rɛy ɣɔaa, wiɛlä rɔ thi̱n.”

⁸ Kä cu Kuoth Nhial jɛ jiök i̱, “Ji̱n ŋäc i̱ ja̱ŋdä ni I-yob, kɛ ɣöö thilɛ ram mi päär kɛ jɛ rɛy ɣɔaa? Thilɛ jɛ bɛ̈ɛ̈l, kä ɛ gua̱n cuŋni, mi luthä Kuoth kä lo̱k jiäk.”

⁹ Kä cu Gua̱n jiäkni Kuoth Nhial loc i̱, “Ɛn I-yob luthɛ jɛ baaŋ?

¹⁰ Ɛ ɣöö la gaŋi jɛ kɛnɛ dhɔrɛ kɛ nyinkɛ diaal tin tekɛ jɛ. Kä ci lätkɛ poth, a ci nyinkɛ rɔ̱ rep wi̱i̱ muɔ̱ɔ̱n.

¹¹ Kä met ni kuak kɛ thiap bɛ, mi /cɛ ji̱ bi lam nun.”

¹² Kä cu Kuoth Gua̱n jiäkni jiök i̱, “Gɔaaɛ, nyinkɛ diaal tin tekɛ jɛ cä kɛ la̱th tetädu, duundɛ ɣöö /cu puɔ̱nydɛ kulɛ guëër.” Kä cu Gua̱n jiäkni jiɛɛn nhiam Kuɔth Nhial.

¹³ Kɛ cäŋ ëë mi̱th, kä mäth kɛ gaat I-yob kɛ nyieekɛ dhɔr dämandiɛn in di̱i̱t,

¹⁴ cu aläät I-yob ben jiök i̱, “Min pur thääk kä läk muɔ̱li gekädiɛn,

¹⁵ cu kuëël ɣɔ̱ɔ̱k ben, cua kɛ ben pɛc. Kä ca kuaany näk. Ci kään ni ɣän kärɔa kɛ ɣöö bä ji̱ ben la̱r lär.”

¹⁶ Kä min ŋot jääk kɛ ruac, cu jääk mi dɔ̱ŋ ben, cuɛ I-yob ben jiök i̱, “Ci mac pɛ̈ɛ̈n ni nhial kä Kuoth, cɛ det kɛnɛ kuaany waŋ. Ci kään ni ɣän kärɔa kɛ ɣöö bä ji̱ ben la̱r lär.”

¹⁷ Kä min ŋot jääk ɛmɔ kɛ ruac, cu ram mi dɔ̱ŋ ben, kä cuɛ wee i̱, “Ci ji̱ Kɛ̈l-da-ya ben kɛ bua̱a̱n diɔ̱k, ca thɔ̱a̱rɔa̱a̱li ben pɛc kä ca kuaany näk. Ɛ ɣän kärɔa ci kään ɔ, kɛ ɣöö bä ji̱ ben la̱r lär.”

¹⁸ Kä min ŋotdɛ kɛ ruac, cu ram mi dɔ̱ŋ ben, kä cuɛ wee i̱, “Min te gaatku kɛnɛ nyieeku mi̱th kä mäthkɛ kɛ kɔaŋ dhɔr dämandiɛn in di̱i̱t,

¹⁹ cu jiɔam mi di̱i̱t puɔ̱t, bëë rɛy dɔaar kä cɛ duel kuɛr wi̱i̱diɛn, a cikɛ li̱w. Ɛ ɣän kärɔa ci kään ɔ, kɛ ɣöö bä ji̱ ben la̱r lär.”

²⁰ Kä cu I-yob rɔ jiɛc, kä cuɛ bi̱i̱dɛ rɛ̈t, kä cuɛ wi̱cdɛ mut, kä cuɛ rɔ yuɔr piny palɛ Kuoth.

²¹ Kä cuɛ wee i̱, “Ɣän ba̱a̱ raar jic maar kɛ puɔ̱nydä baaŋ, kä bä lɛni loc jɔk kɛ puɔ̱nydä baaŋ. Kuoth Nhial la ŋunɛ ŋɔak kä la naŋɛ kɛ, a puɔ̱th tekɛ Kuoth Nhial.”

²² Kɛ kɛn ti diaal ti̱ti̱, /ken I-yob Kuoth moc kɛ duer thi̱n.