I-ca-yaa 9 - RUAC KUƆTH IN RƐL RƆ

Kuäär mi gɔaa mi bi ben

¹ Kä /cɛ bilɛ tekɛ da̱k kä nɛy tin te rikä. Kä kɛ pek ëë ci wä cuɛ mun ji̱ Dhɛ-bu-lun kɛnɛ mun ji̱ Nap-ta-li jak kä po̱c, duundɛ ɣöö kɛ ni̱n tɔ̱ bi ben tɔ̱ bɛ Gɛ̈-lɛ-li moc kɛ luth muɔ̱ɔ̱n juri min wä dup baar in bo̱r min te kam wi̱i̱ni a wä ni kui̱ kiɛɛr Jɔr-dɛn.

² Nɛy tin te rɛy muɔth, ca buay mi di̱i̱t nɛn, kä nɛy tin cieŋ däär muɔ̱th ci buay ben kä kɛ.

³ Kuoth ci naath jak kä ŋuan, kä ci tɛ̈th lɔaacdiɛn rep, tɛth lo̱ckiɛn nhiamdu ce̱tkɛ min la lɔc ran ɛ tɛth kɛ cäŋ ŋër bɛɛl, ce̱tkɛ min la lo̱c wutni a tɛth mɔ da̱a̱kɛ tin ca pɛc ɔ.

⁴ Kä curi gäkdiɛn to̱l kä kɛ kɛnɛ kɛɛt in la dua̱ckɛ kɛ ɛ nɛy tin ciaŋkɛ kɛ a jiäk, kä curi kɛ joc ce̱tnikɛ juɔ̱c ëë ci kɔŋ joc ni ji̱ Mid-yan.

⁵ Kä wa̱a̱ri ji̱ köör diaal, kɛnɛ bieyni tin tekɛ riɛm, bakɛ waŋ ala tɔŋ maac.

⁶ Kɛ ɣöö ca kɔn da̱p gat, ca kɔn ka̱m gat dhöl, kä bɛ la kuäär nath, kä ba ciötdɛ cɔl i̱, “Rueec mi Gɔaa, kä Kuoth mi Bum, Gua̱n nath mi Do̱raar, kä Kuäär Malä.”

⁷ Kä bi kuäärɛ kɛnɛ mal thil pek, kä bɛ ruëc ala Kuäär wi̱i̱ kɔam kuäärä Dee-bid, bɛ jɛ ruac kɛ cuŋ kɛnɛ thuɔ̱k ɛn cäŋ ɛmɔ amäni cäŋ kɛl. Bi Kuoth Nhial in la Ruey Ɣɔaa jɛ la̱t.

Bi Kuoth I-thɛ-rɛl duäc

⁸ Ci Kuoth Nhial ruac ja̱k kɛ kui̱ ji̱ Je-kɔb, kä bɛ I-thɛ-rɛl luk,

⁹ kä ba jɛ ŋa̱c ɛ nɛy diaal, bi ji̱ Ɛ-pa-rim kɛnɛ ji̱ Tha-mɛ-ria jɛ ŋa̱c, tin ruac liakä kɛ lo̱ckiɛn i̱,

¹⁰ “Ci tuɔpni tɛɛth, duundɛ ɣöö bakɔ kɛ nyɔk kɛ ta̱th kɛ pääm ti ca kuac, ca rieewni thëëp jɔap piny, duundɛ ɣöö bakɔ gua̱a̱thdiɛn luɛl kɛ luɔ̱ɔ̱r.”

¹¹ Kä cu Kuoth ji̱ Rɛ-dhin nöŋ ji̱ tɛ̈riɛn, cuɛ ji̱ tɛ̈riɛn jiëc cuɔ̱ŋ kɛ kui̱diɛn.

¹² Ji̱ Thi-ri-ya kui̱ känyä ca̱ŋ, kɛ ji̱ Pi-li-thɛt kui̱ konyä ca̱ŋ, duɔ̱pkɛ I-thɛ-rɛl kɛ rɛmkiɛn. Kɛ kui̱ kä ti̱ti̱ ŋot gak Kuɔth /kenɛ ni thuɔ̱k, ŋotdɛ duääcɛ naath kɛ buɔ̱mdɛ.

¹³ Duundɛ ɣöö /ken naath rɔ̱ riet ram in cikɛ näk, kä /kenkɛ Kuoth Nhial min la Ruey Ɣɔaa go̱r.

¹⁴ Bi Kuoth Nhial wi̱c I-thɛ-rɛl kɛnɛ juälɛ ŋok, bɛ kaar kɛnɛ cuut ŋok kɛ jɛn cäŋ ɛ kɛl ɔ,

¹⁵ kɛ ɣöö wi̱c ɛ bööth kɛnɛ nɛy tin luɔ̱th kɛ, kä juäl ɛ go̱o̱k tin ŋi̱eeckɛ ka̱a̱cni.

¹⁶ Nɛy tin böthkɛ nɛy ti̱ti̱ cikɛ bath, kä nɛy tin guɔ̱ɔ̱rkɛ kɛ cikɛ riaw.

¹⁷ Kɛ kui̱c ɛmɔ /ci Kuäär ni Kuoth lɔcdɛ tɛth kɛ ŋuɛ̈tni wutnikiɛn, kä thilɛ jɛ kɔ̱a̱c lɔaac kɛ gaat tin rɛ̈tni kɛnɛ män jɔɔkni, kä kɛn diaal thilɛ kɛ kuoth kä kɛ la̱a̱t jiäkni, kä lat kɛn ni nyin ko̱o̱ri. Kɛ kɛn ti̱ti̱ ŋot gak Kuɔth /kenɛ ni thuɔ̱k, ŋotdɛ duääcɛ naath kɛ buɔ̱mdɛ.

¹⁸ Kɛ thuɔ̱k jiäk pɛtkɛ ce̱tnikɛ mac, ɛ waaŋɛ gɔ̱a̱k kɛnɛ kuiy, kä waaŋɛ rup mi cɛ thi̱ŋ, ɛ riith toliɛn rɔ ni nhial.

¹⁹ Kɛ ŋɛ̈ɛ̈ny Kuɔth Nhial in la Ruey Ɣɔaa cɛ mun waŋ, cu naath kula tɔŋ maac, thilɛ ram mi dëë däman luäk.

²⁰ Yuɔ̱ɔ̱thkɛ ni mi̱th, kä ŋotkɛ kɛ mi näk buɔthkɛ, kä bikɛ mi̱eth in ci duɔth cam, kä /cɛ kɛ bi ro̱ŋ, kä bi ram ɔ cam ni tetdɛ.

²¹ Bi Ma-na-thɛ mi̱th kä Ɛ-pa-rim, kä bi Ɛ-pa-rim mi̱th kä Ma-na-thɛ, kä bikɛ rɔ̱ luɔ̱c Juda kɛɛl. Kɛ kɛn ti̱ti̱ ŋot gak Kuɔth /kenɛ ni thuɔ̱k, ŋotdɛ duääcɛ naath kɛ buɔ̱mdɛ.