I-ca-yaa 8 - RUAC KUƆTH IN RƐL RƆ

Gat I-ca-yaa ɛ nyuuth kɛ käni ji̱ A-thi-ri-ya kɛ wi̱i̱

¹ Kä cu Kuoth Nhial ɣä jiök i̱, “Käni päm mi pat pat mi di̱i̱t kä gɔ̱ri rieet ti̱ti̱ thi̱n ɛ dho̱k i̱, ‘Duŋ Mer-ca-lal-a̱c-badh.’ ”

² Kä cua̱ bo̱o̱th palä ni U-ri-yaa kɛnɛ Dhɛ-kar-yaa gat Yɛ-bɛ-rɛ-kiyaa cɔl ala neen kä ɣä.

³ Kä cua̱ wä kä ciekdä, kä cuɛ ruët kä cuɛ dap kɛ gat dhöl. Kä cu Kuoth Nhial ɣä jiök i̱, “Cɔl ciötdɛ Mer-ca-lal-a̱c-badh,

⁴ kä ɛ ŋot /ken gat ciöt ni ŋa̱c wëë i̱, ‘Baba, kiɛ mama,’ ba ria̱ŋ Da-math-kɛth kɛnɛ pɛ̈ɛ̈c Tha-mɛ-ria naŋ ɛ kuäär A-thi-ri-ya.”

⁵ Kä cu Kuoth Nhial rɔ nyɔk kɛ ruac kɛ ɣä wëë i̱,

⁶ “Kɛ ɣöö cu nɛy ti̱ti̱ pi̱w Ci-lowa tin lo̱ny ɛgɔaa lo̱k. Ci wä tɛɛth ni lo̱ckiɛn kɛ Rɛ-dhin kɛnɛ gat Rɛ-mɛ̈l-yaa,

⁷ kɛ kui̱c ɛmɔ ɣän Kuäär ni Kuoth, bäkɛ jak kä makɛ ɛ kuäär A-thi-ri-ya kɛnɛ rɛmdɛ. Bikɛ Juda ban ce̱tnikɛ pi̱w nyɔac ti bä raar Kiir Yu-pɛ-ree-tidh, ti thia̱ŋkɛ lölikɛ diaal.

⁸ Kä bɛ Juda can ce̱tnikɛ nyɔc, ba nyɔc mi cup naath ni ŋuääk. Kä kɛ ɣöö te Kuoth kɛɛl kɛ kɔn, bi gɔ̱kɛ mundu kum ni kɛɛliw, lö I-manu-el!”

⁹ Matdɛ rɔ̱ guäth kɛl yɛn naath kɛ dual, liɛŋɛ nɛmɛ lö nɛy tin na̱n tuɔ̱ŋni ɣɔaa. Rialɛ rɔ̱ ikä kɛ ko̱r, kä da̱kɛ rɔ̱ kä piny! Rialɛ rɔ̱ ikä kɛ ko̱r, kä da̱kɛ rɔ̱ kä piny!

¹⁰ La̱tdɛ ca̱pdun, duundɛ ɣöö bɛ thil luɔt, latdɛ ruac, duundɛ ɣöö /cɛ bi te thi̱n, kɛ ɣöö te Kuoth kɛɛl kɛ kɔn.

¹¹ Kä cu Kuoth Nhial ruac kɛ ɣä a te tetdɛ min bum kɛɛl kɛ ɣä, kɛ ɣöö /cä bi guɔ̱ɔ̱r ni dup nɛɛni ti̱ti̱, wëë i̱,

¹² “/Cu ti diaal cɔli i̱ tɛr tin cɔl nɛy tɔ̱tɔ̱ kɛ i̱ tɛr, kä /cu dual kɛ tin dual kɛ kɛ ɛ ji̱ /cɛ cak lath kɛ jɛ.

¹³ Ɛ ni Kuoth Nhial in la Ruey Ɣɔaa bia cɔl i̱ mi rɛl gɔɔydɛ rɔ mɔ ni kä rɔa, ɛ jɛn bia dual kɛ jɛ mɔ, kä ɛ jɛn bɛ yɛ lath kɛ jɛ mɔ.

¹⁴ Kä ɛ jɛn bi la gua̱th palä mɔ, kä ba päm in kui̱r naath, ba jɛn döl in kɔ̱a̱thkɛ ikä ɛ dho̱r ji̱ I-thɛ-rɛl da̱ŋ rɛw. Kä bɛ la dhuur mi kääp ji̱ Jɛ-ru-tha-lɛm.

¹⁵ Bi nɛy ti ŋuan kɔ̱a̱a̱th kɔ̱thikä, bikɛ tëth kä bikɛ töl, bakɛ dɛp kä bakɛ käp.”

Luek kɛ kui̱ thiecä jɔɔkni

¹⁶ Yianɛ ŋut, ka̱pɛ ŋi̱i̱c cuɔ̱ŋ rɛy ji̱ kɔaarä.

¹⁷ Ɣän bä Kuoth Nhial lip, min ci nhiamdɛ tɛ̱̈ɛ̱̈ kɛ ji̱ dhɔaar Je-kɔb, ɣän bä ŋäth ni jɛ.

¹⁸ Nɛnɛ, ɣän kɔnɛ gaat tin Ci Kuoth kɛ ka̱m ɣä, kɛ kɔn nyuuth rɛy I-thɛ-rɛl kä Kuoth Nhial in la Ruey Ɣɔaa, min cieŋ wi̱i̱ Pa̱a̱m Dha-yɔn.

¹⁹ Kä mi wä naath yɛ jiök i̱, “Thiëcɛ jɔɔk kɛnɛ kolaaŋ tin kui̱w kä gi̱eer,” ɛ /ci naath dëë ku thiec ni kuothdiɛn ɛ dëë ku thiec ni mi ci li̱w, ɛ /ca dëë ku thiec ni mi tëk?

²⁰ Guɔ̱ɔ̱rɛ ni ŋut Kuɔth kɛnɛ ŋi̱i̱cdɛ! Kɛ thuɔ̱k ruac in lat ji̱ kolaaŋni jɛ thilɛ jɛ luɔt.

²¹ Kɛn bikɛ wi̱el muun kɛ da̱k mi di̱i̱t kɛnɛ buɔth, mi wä buɔthkɛ näk bikɛ cu gaak ba guic ni nhial, kä bikɛ kuääriɛn lam kɛnɛ Kuothdiɛn.

²² Kä bikɛ piny guic, kä bikɛ nɛn ni rik kɛnɛ muth kɛ da̱k mi bɛc bɛc, kä bakɛ yuɔr rɛy muɔ̱th mi col.