I-ca-yaa 7 - RUAC KUƆTH IN RƐL RƆ

Lär I-ca-yaa Kuäär ni A-ɣadh ruac

¹ Kɛ ni̱n tëë ruec ni A-ɣadh gat Yo-tham gat Ö-dhi-ya kuäär Juda, cu Rɛ-dhin kuäär Thi-ri-ya kɛnɛ Pɛ-kɛ̈ gat Rɛ-mɛ̈l-yaa kuäär I-thɛ-rɛl Jɛ-ru-tha-lɛm ka̱p ko̱r, duundɛ ɣöö /kenkɛ jɛ ka̱n.

² Kä mëë ca jɛ la̱r ji̱ dhɔaar Dee-bid i̱, “Ci ji̱ Thi-ri-ya rɔ̱ mat kɛ ji̱ Ɛ-pa-rim,” cuɛ lɔc kua̱r Juda kɛnɛ nɛɛkɛ lath ce̱tnikɛ min la jiɛn a yɔ̱a̱kɛ ɛ jiɔam.

³ Kä cu Kuoth Nhial I-ca-yaa jiök i̱, “Wër yɛnɛ gatdu ni Cɛ-ar-ya-cub bia wä röm kɛ A-ɣadh peek waŋ Puɔ̱ɔ̱l in te nhial, dup in di̱i̱t guäth in la naath ɛ läk thi̱n kɛ bieyni.

⁴ Wër jio̱k ni jɛ i̱, ‘Tit rɔ, kä päli rɔ piny, kä /cu dual, kä a lɔcdu /ci bath kɛ tol maac jiɛn da̱ŋ rɛw ti̱ti̱, gak Rɛ-dhin kɛnɛ ji̱ Thi-ri-ya kɛ gat Rɛ-mɛ̈l-yaa.

⁵ Ci ji̱ Thi-ri-ya kɛɛl kɛ ji̱ Ɛ-pa-rim kɛ gat Rɛ-mɛ̈l-yaa ji̱ ca̱p mi jiääk, wä kɛ i̱,

⁶ “Wanɛ Juda mak, wanɛ jɛ dääk kä rɔ̱, banɛ gat Tab-el wä jak kä kuäärɛ.”

⁷ Duundɛ ɣöö cu Kuäär ni Kuoth wee i̱, “/Cɛ bi tuɔɔk ɛn nɔmɔ, a /cɛ bi met ben.

⁸ Kɛ ɣöö bum ni Da-math-kɛth ɛ jɛn wec Thi-ri-ya min di̱i̱t, kä buɔ̱m Da-math-kɛth ɛ Rɛ-dhin. (Rɛy runi ti jiɛn bäkɛl wi̱cdɛ dhieec ba Ɛ-pa-rim däk a /cɛ bi la do̱r.)

⁹ Kä wec Ɛ-pa-rim in di̱i̱t ɛ Tha-mɛ-ria, kä buɔ̱m Tha-mɛ-ria ɛ gat Rɛ-mɛ̈l-yaa. Mi /ci yɛn bi buɔ̱m ŋäthädun, kɛ thuɔ̱k /ci yɛn bi lɛ met buɔ̱m.”

Nyuuth kɛ kui̱ I-manu-el

¹⁰ Kä cu Kuoth Nhial rɔ nyɔk kɛ ruac kɛ A-ɣadh wëë i̱,

¹¹ “Thiec nyuuth Kuɔth Nhial ni Kuothdu, mi dëë ben ni pinyi te jɔɔk thi̱ni kiɛ ni nhial ni puɔ̱ɔ̱rä mi na̱ni.”

¹² Duundɛ ɣöö cu A-ɣadh wee i̱, “Ɣän /cä bi thiec, /cä Kuoth Nhial bi la̱th rɛy ɣɔ̱ɔ̱nä.”

¹³ Kä cu I-ca-yaa wee i̱, “Kuɛ liŋ lö dhɔr Dee-bid! Jɛn ɛ mi tɔt ɛn ɣöö cuuc yɛn naath, mɔ cuuc yɛn Kuothdä mɔ bä?

¹⁴ Kɛ kui̱c ɛmɔ Kuäär ni Kuoth puɔ̱nydɛ bɛ yɛ moc kɛ nyuuth. Nɛ̈nɛ jɛ, nyal bɛ ruët kä bɛ dap kɛ gat mi dho̱o̱l, kä bɛ ciötdɛ cɔli I-manu-el.

¹⁵ Kä kɛ gua̱a̱th in bɛ lo̱k mi jiääk ɛ bɛ mɛk ni mi gɔaa, bi naath cam ni yat liɛth kɛnɛ tuaar.

¹⁶ Kä min ŋot gat kɛ mi /kenɛ mi jiääk ni lo̱k a bɛ mɛk ni min la cuɔ̱ɔ̱ŋ, bi mun kua̱ri da̱ŋ rɛw tin dual kɛ kɛ da̱k.

¹⁷ Bi Kuoth Nhial ji̱ yɛnɛ nɛɛku kɛ dhɔr guur nöŋ ni̱n ti bɛ̈c bɛ̈ɛ̈c ti /ken met ben ti bɛc ni kɛn kä cäŋ ëë kac kɛ I-thɛ-rɛl raar kä Juda, bɛ Kuäär A-thi-ri-ya nööŋ.”

¹⁸ Ɛn cäŋ ɛmɔ bi Kuoth Nhial tha̱pa̱a̱r koth mi la nyuuth kɛ ɣöö bi ji̱ I-jëp ben ce̱tnikɛ luaŋ ti bëë guäth mi nɔ̱a̱n jɔk kiɛɛr, kä bi ji̱ A-thi-ri-ya ben ce̱tnikɛ tuaar muundiɛn.

¹⁹ Bikɛ ben cieŋ rɛy puɔ̱li kɛnɛ kɔ̱a̱k päämni kɛ buɔ̱t buɔ̱ɔ̱tni diaal kɛ tɔ̱a̱ri diaal.

²⁰ Ɛn cäŋ ɛmɔ bi Kuäär ni Kuoth reet mi kɔkɛ kui̱c kiɛɛr Yu-pɛ-ree-tidh mi mɔ kuäär A-thi-ri-ya ka̱n, kä bɛ mutni mi̱em wuɔ̱thni kɛnɛ mi̱em pua̱a̱ny kɛ miem ti̱knikun.

²¹ Ɛn cäŋ ɛmɔ bi raan päl ni nac ɛ tëk kɛnɛ dët da̱ŋ rɛw,

²² kä kɛ ŋuan caakiɛn, bɛ cam ni liɛɛth. Kä nɛy diaal tin ci duɔth muun, bikɛ cam ni liɛɛth kɛnɛ tuaar.

²³ Ɛn cäŋ ɛmɔ gua̱th tin la tekɛ buɔ̱cni ti bathdɔɔr kä la kɔkɛ kɛ yio̱w ti bathdɔɔr, bi te ni kuiy thi̱n kɛnɛ thil.

²⁴ Bi naath wä thi̱n kɛ bääri kɛ ka̱k leeyni, kɛ ɣöö ɛn mun kɛɛliw te ni kuiy kɛnɛ thil thi̱n.

²⁵ Kä pääm diaal tin la piɛthkɛ, thilɛ ram mi bi wä thi̱n kɛ ɣöö bi te ni thil kɛnɛ kuiy thi̱n. Duundɛ ɣöö ba gua̱a̱th la̱k ɣɔ̱ɔ̱k kɛnɛ dët.