I-ca-yaa 66 - RUAC KUƆTH IN RƐL RƆ

Luk Kuɔth Nhial kɛ döör

¹ Cu Kuoth Nhial wee i̱, “Pua̱a̱r ɛ kɔm kuäärädä, kä piny ɛ cääk ciöknikä, bɛ ku la duel ŋukä bia lät kä ɣä mɔ, gua̱a̱th lɔ̱ŋädä mi tëë di?

² Kɛn ti diaal ti̱ti̱ lätkɛ ɣän, kä ci kɛn diaal cu te wa̱nɔ. Nɛmɛ ɛ jɛn ram min bä guic, jɛn ram in kɔ̱c kä thil liak, jɛn min dual kɛ ruacdä,” ruac ni ɣän Kuoth Nhial.

³ “Kä ram mi ŋoot thäk ce̱tdɛ kɛ ram mi näk ni raan, kä ram mi tho̱p ruath dɛ̈ɛ̈l rɔɔmä ala muc, ce̱tdɛ nikɛ ram mi to̱l ni ŋuäk jiöök, kä ram mi no̱o̱ŋni muc bɛɛl, ce̱tdɛ nikɛ ram no̱o̱ŋni riɛm kuɔ̱ndhuɔ̱ɔ̱r, kä ram mi waaŋni wal tin kuɔ̱r kuɔ̱ɔ̱r, ce̱tdɛ nikɛ ram mi palni kuoth jiaath. Kɛn nɛy tɔ̱tɔ̱ ca mɛk ni dupkiɛn, kä nhɔk kɛn ni jiäkiɛn,

⁴ ɣän bä, bä moc nikɛ ciaŋ mi jiääk, bä nöŋ nikɛ min dual kɛn kɛ jɛ, kɛ ɣöö mëë ciötdä thilɛ ram mi ci nhɔk, mëë ruacä /kenkɛ ɣä liŋ, duundɛ ɣöö cukɛ la̱t ni mi jiääk nhiamdä, cukɛ wä mɛk ni min lökä.”

⁵ Liɛŋɛ ruac Kuɔth Nhial yɛn nɛy tin luɔ̱thɛ ruacdɛ wëë i̱, “Gaatmuɔɔri tin lökɛ yɛ tin ca rɔ̱ luɔ̱c yɛ kɛ kui̱ cio̱tädä, cikɛ wee i̱, ‘A Kuoth Nhial liakɛ, kɛ ɣöö bakɔ tɛ̈th lɔaacdun nɛn,’ duundɛ ɣöö ba jak nikɛ kä po̱c.

⁶ “Liɛŋɛ rɔal ɛ di̱i̱t ɛmɔ rɛy wec! Jɔw mi di̱i̱t rɛy luaak Kuɔth! Ɛ jɔw Kuɔth Nhial, culɛ ji̱ tɛ̈rɛ ti diaal tin derɛ cuɔ̱lkɛ!

⁷ “Ci ciek dap a /kenɛ mäc ɛ käp, cɛ gat dap a /ken mäc rɔ tok.

⁸ Ɛŋa ci mi ce̱tkɛ nɔ met liŋ ɔ? Kä ɛŋa ci mi ce̱tkɛ nɔ nɛnɔ? Dëë ro̱l dap kɛ cäŋ kɛl? Kä dëë do̱r dap kɛ gua̱a̱th mi tɔt? Kä niɛ guäth ɔ bi Dha-yɔn tekɛ mäc ɔ, bɛ gaatkɛ cu dap.

⁹ Kä ɣän dëë mäc jak kä te thi̱n, kä dëë gat tey a /ca jɛ dap? Kä dëë ran pën dap kä cä jɛ moc mäc dapä?” Ruac ni ɣän Kuoth Nhial ni Kuothdu.

¹⁰ “A lo̱ckun tɛth kɛɛl kɛ Jɛ-ru-tha-lɛm, yɛn nɛy diaal tin nhɔakɛ jɛ, a lo̱ckun tɛth kɛɛl kɛ jɛ rɛy gɔɔyä lɔaac, yɛn nɛy diaal tin parkɛ jɛ.

¹¹ Kɛ ɣöö bia luɛth a bia ro̱ŋ thiinkɛ tin tekɛ päl piny, bia maath a bia ria̱ŋ ɛlɔ̱ŋ kɛ tɛth lɔaac rɛy riäŋädɛ min gɔaa.”

¹² Cu Kuoth Nhial wee i̱, “Bä moc mal mi bi lo̱o̱ny ce̱tnikɛ kir, kä bä jɛ ka̱m ria̱ŋ dööri mi bi ce̱tnikɛ waŋ pi̱i̱ni mi lo̱ny, bɛ yɛ luëëth kä bɛ yɛ kap kɛ wuɔ̱ɔ̱kdɛ, kä bia ŋar ni ciöknikɛ.

¹³ Ce̱tnikɛ min la man gatdä gatdɛ a kɔk, inɔ ɣän bä yɛ kɔk, ba yɛ bum kä Jɛ-ru-tha-lɛm.”

¹⁴ Mi wä yɛn ɛ nɛn, bi lo̱ckun tɛɛth, kä bia piith ce̱tnikɛ juaac, kä ba jɛ ŋa̱c ɛn ɣöö te tet Kuɔth Nhial kɛɛl kɛ ja̱a̱ŋkɛ, kä te gakdɛ kɛ ji̱ tɛ̈rɛ.

¹⁵ Nɛnɛ bi Kuoth Nhial ben kɛ dual, kä ce̱t thurbiɛɛlikɛ nikɛ ruɔth, no̱o̱ŋɛ ŋɛ̈ɛ̈nydɛ piny kɛ gak, bä gakdɛ ce̱tnikɛ bo̱l maac.

¹⁶ Bi Kuoth Nhial lukdɛ nööŋ kɛ mac, bɛ nɛy diaal luk kɛ thɛpdɛ, kä bi ŋuan ni nɛy tin bi Kuoth Nhial kɛ näk.

¹⁷ “Kä nɛy tin ca rɔ̱ lɛy tin ca pua̱nykiɛn jak kä gɔw kɛ ɣöö bikɛ kuth wä pal rɛy ka̱a̱kni walkiɛn, nɛy tin guɔ̱ɔ̱rkɛ rɔ̱ wa ri̱ŋ kuɔ̱ndhuɔ̱ɔ̱r cam kɛnɛ tin kɔ̱ŋ tin jiäk, bi kɛn diaal guut ni kɛɛl,” ruac ni ɣän Kuoth Nhial.

¹⁸ “Ɣän ŋa̱cä lätkiɛn kɛnɛ cärkiɛn kä gua̱a̱th ɛ bëëni kɛ ɣöö bi döör diaal kɛnɛ lëëp diaal ben kɛɛl, bikɛ buaydä ben nɛn,

¹⁹ kä bä nyuuth la̱th rɛydiɛn. Kä bä tha̱a̱ŋ nɛɛni tin ŋot kɛ tëk rɛydiɛn jäk kä rɛy dööri, bä kɛ jäk kä Tar-cic kɛ Pul kɛ Lud nɛy tin ŋa̱ckɛ yor bäärä kɛ Tu-bal kɛnɛ Ya-wan kɛ wi̱i̱ diaal tin nɔ̱a̱n nɔa̱a̱n tin /ka̱n kɛ̈kdä met liŋ kä /ken buaydä met nɛn, bikɛ gɔɔydä lat rɛy dööri.

²⁰ Kä bikɛ gaatmuɔɔri nööŋ rɛy dööri diaal ce̱tkɛ muc ti thöpkɛ Kuoth Nhial, bikɛ ben a cikɛ kɔt kɛ jiöŋkööri kɛ muɔ̱li kɛ thurbiɛɛli kɛ thɔ̱a̱rɔa̱a̱li bäkɛ wi̱i̱ pa̱a̱mdä min rɛl rɔ ni Jɛ-ru-tha-lɛm, ce̱tnikɛ min la ji̱ I-thɛ-rɛl muc bɛɛl a no̱o̱ŋ kɛ kuak ti gɔw rɛy luaak Kuɔth Nhial.

²¹ Kä bä tha̱a̱ŋkiɛn kuany ala bööth palä kɛnɛ ji̱ Lii-bay,” ruac ni ɣän Kuoth Nhial.

²² “Ɣän bä pua̱a̱r mi pay tuɔɔk kɛnɛ piny mi pay tuɔɔk la̱t, bikɛ te nhiamdä amäni cäŋ kɛl, inɔ bi gaatku kɛnɛ ciötdu te thi̱n ni ciaŋ,” ruac ni ɣän Kuoth Nhial.

²³ “Kä nikɛ tëth path amäni tëth path in dɔ̱ŋ, kɛnɛ cäŋ lɔ̱ŋä kɛ cäŋ lɔ̱ŋä min dɔ̱ŋ, bi nɛy diaal ben pal nhiamdä,” ruac ni ɣän Kuoth Nhial.

²⁴ “Kɛn bikɛ wä raar ba pua̱ny nɛɛni tin ci li̱w tëë ci rɔ̱ luɔ̱c ɣä wä nɛn, kä /ci lɔa̱a̱t tin camkɛ kɛ bi li̱w, kä thilɛ mi bi mac in waaŋkɛ yieny, bi kɛn a ti jiäk kä nɛy diaal.”