I-ca-yaa 65 - RUAC KUƆTH IN RƐL RƆ

Luk Kuɔth kɛ cuŋ

¹ Cä rɔ nyuɔ̱th nɛy tin /ka̱n ɣä thi̱ec, kä ca ɣä jek ɛ nɛy ti /ka̱n ɣä go̱r, kä cua̱ wee i̱, “Ɣän ɛn, ɣän ɛn,” kä do̱r mi /ca cɔl kɛ ciötdä.

² Kɛ cäŋ kɛɛliw cua̱ tetdä ɣöök raar, kɛ kui̱ nɛɛni tin ca rɔ̱ riet ɣä, nɛy ti la̱tkɛ ti /ci gɔw, nɛy ti guɔ̱ɔ̱rkɛ ni lät tin nhɔakɛ ni la̱tdiɛn.

³ Ni nhiamdä pa̱ny la kɛn a lätni ti jakɛ ɣä kä gak, la thöpkɛ kuthkiɛn muc rɛy ka̱a̱kni, kä waŋkɛ wäl in kɔp wuɔ̱thni yi̱kni dööli.

⁴ La nyuurni kɛn kamni kɔ̱a̱kni, la kɛn wäär wa̱a̱ thuuk wuɔ̱th muɔ̱ni, kä la kɛn a cam ni ri̱ŋ kuɔ̱ndhuɔ̱ɔ̱ri, kä ci cuɔ̱ɔ̱kiɛn thia̱a̱ŋ kɛ cuɛy ri̱eŋ mi jiääk.

⁵ Kä la kɛn rɔ̱ a jio̱k i̱, “Nɔ̱ɔ̱ni rɔ, /cu bä thiekädä, ɛ ɣän mi rɛl rɔ kä ji̱.” Kɛn nɛy ti̱ti̱ ce̱tkɛ kɛ tol wuumdä, ce̱tkɛ kɛ mac mi pɛt kɛ cäŋ kɛɛliw.

⁶ Kä nɛnɛ ca jɛ gɔ̱r nhiamdä i̱, “Ɣän /cä bi biɛt, ɣän bäkɛ culikä, ɣän bäkɛ luɔc ni buɔ̱ɔ̱riɛn,

⁷ kɛn dueerkun kɛnɛ dueer guuri ni kɛɛl, kɛ ɣöö waaŋkɛn wal tin kɔp wuɔ̱thni päämni, kä lätkɛn ɣä kä ti jiäk wuɔ̱th päämni, ɣän bäkɛ thɛ̈m ni buɔ̱ɔ̱riɛn, ɛn cut ni kɛɛliw kɛ kui̱ lätnikiɛn tëë kɔn.”

⁸ Kä cu Kuoth Nhial wee i̱, “Ce̱tkɛ min la kɔaŋ a jëkɛ kä dɛy buɔ̱cä, la naath a wee i̱, ‘/Cuarɛ jɛ yär, kɛ ɣöö te ria̱ŋ rɛydɛ,’ inɔ ɣän bä jɛ la̱t kɛ kui̱ kuaanynikä, /cä kɛ bi däk kɛn diaal.

⁹ Ɣän bä kuay nööŋ kä Je-kɔb, kɛ kuay kä Juda nɛy ti bi cieŋ wi̱i̱ pa̱a̱mdä, bi nɛɛkä tin cä mɛk ɛ ciɛŋ, bi ja̱a̱ŋkä cieŋ ɛn wi̱ni.

¹⁰ Kä bi Ca-ron a gua̱a̱th la̱k deet, kä bi Lo̱o̱l A-kor a gua̱a̱th tɔ̱ɔ̱cä ɣɔ̱ɔ̱k, gua̱a̱th la̱k ɣɔ̱ɔ̱k nɛɛnikä tin görkɛ ɣä.

¹¹ Duundɛ ɣöö yɛn nɛy tin pa̱lkɛ Kuoth Nhial ruëëc, yɛn tin lökɛ pämdä min rɛl rɔ, yɛn nɛy tin guɛcɛ ni baŋ, tin thia̱ŋɛ ni Li̱eeri kɛ kɔaŋ däkä.

¹² Ɣän bä da̱kdun lar kɛ ko̱r, kä ba yɛn diaal ŋuɔ̱t, kɛ ɣöö mëë cä ciöt cuɛ thil ram mi cu ɣä loc, kä mëë ruacä /ken yɛn ɛ liŋ, kä cuarɛ la̱t ni mi jiääk nhiamdä, kä cuarɛ mɛk ni min lökä.”

¹³ Kɛ kui̱c ɛmɔ cu Kuäär ni Kuoth Nhial wee i̱, “Nɛnɛ bi ja̱a̱ŋkä mi̱th, duundɛ ɣöö bi buɔth yɛ näk, kä nɛnɛ ja̱a̱ŋkä bikɛ maath, duundɛ ɣöö bi rɛw yɛ näk, kä nɛnɛ bi ja̱a̱ŋkä lo̱ckiɛn tɛɛth, duundɛ ɣöö ba yɛ jak kä po̱c.

¹⁴ Kä nɛnɛ bi ja̱a̱ŋkä dit tɛthä lɔaac kɛt, duundɛ ɣöö bia wiee kɛ bɛ̈c lɔaac, kä bia wiee kɛ cuɔ̱c yieekädun.

¹⁵ Kä bi ciötdun ce̱tnikɛ kuëth kä nɛɛkä tin cä mɛk, kä bi Kuäär ni Kuoth yɛ näk, duundɛ ɣöö bɛ ja̱a̱ŋkɛ cɔl kɛ ciöt mi dɔ̱ŋ.

¹⁶ Kɛ ɣöö ram mi wä rɔ poth muun, bɛ rɔ poth kɛ ciöt Kuɔth in thuɔ̱k, kä ram mi wä rɔ wä yac muun, bɛ rɔ yac kɛ ciöt Kuɔth in thuɔ̱k, kɛ ɣöö cä nyuɔɔn tëë wal pa̱l ruëëc, kɛn cikɛ bath waaŋdä.”

Ca̱k mi pay tuɔɔk

¹⁷ “Nɛnɛ ɣän cakä pua̱a̱r mi pay tuɔɔk kɛnɛ piny mi pay tuɔɔk, /ca tëë kɔn bilɛ tim, kiɛ /cakɛ bilɛ carkɛ wi̱c.

¹⁸ Duundɛ ɣöö ɛ lo̱ckun tɛth amäni cäŋ kɛl kɛ min cä cak, kɛ ɣöö cä Jɛ-ru-tha-lɛm cak ala mi tɛɛth lɔc, kä ji̱kɛ kɛ nɛy ti nhɔakɛ.

¹⁹ Bi lɔcdä tɛɛth kɛ Jɛ-ru-tha-lɛm, kä bi lɔcdä gɔaa kɛ nɛɛkä, /ca wiee bi nyɔk kɛ li̱eŋ thi̱n, kä /ca jɔw jiɛthkä lɔaac bi nyɔk kɛ li̱eŋ thi̱n.

²⁰ Kä thilɛ gat mi bi te thi̱n mi bi tëk kɛ ni̱n ti tɔt, kiɛ wut mi di̱i̱t mi /ci runkɛ bi thuk, bi gat li̱w a tëë kɛ run ti kuɔ̱r, kä ram wä li̱w a /kenɛ tekɛ run ti kuɔ̱r bɛ la ram mi ca lam.

²¹ Bikɛ duël la̱t, kä bikɛ cieŋ thi̱n, kä bikɛ ka̱a̱k wal kɛ kui̱ kɔaŋ pith kä bikɛ dɛykiɛn cam.

²² /Cikɛ duël ti ba ciɛŋ ɛ nɛy ti kɔ̱ŋ bi la̱t, kä /cikɛ ka̱a̱k bi pith ti ba cam ɛ nɛy ti kɔ̱ŋ, bi nɛɛkä jääny kɛ tëk ce̱tnikɛ min la jiath a jäny teekä, kɛn nɛɛkä tin cä mɛk bikɛ jääny, kä bikɛ dɛykiɛn cam kɛ tɛ̈th lɔaac.

²³ Kä /ci la̱tdiɛn bia̱ baŋ, kä /ca gaat ti bi li̱w bi kap, bi kɛn a gaat ti ca poth ɛ Kuoth Nhial, kɛn kɛɛl kɛ gaatkiɛn.

²⁴ A /kenkɛ ni ciöt bäkɛ loc, a ŋotkɛ kɛ ruac ɣän bä jɛ liŋ.

²⁵ Bi jio̱k nyapëc kɛnɛ ruath dɛ̈ɛ̈l rɔɔmä laak guäth kɛl, kä bi lony lak ni wal ce̱tkɛ yaŋ, kä bi mi̱eth thɔa̱a̱l ɛ tur. Kä thilɛ mi bikɛ jek kiɛ bikɛ däk rɛy pa̱a̱mdä min rɛl rɔ kɛɛliw,” ruac ni ɣän Kuoth Nhial.