I-ca-yaa 64 - RUAC KUƆTH IN RƐL RƆ

¹ Ɛŋu ci pua̱a̱r rɛt ɔ a bi ben piny, kä bɛ pääm lath nhiamdu!

² Ce̱tkɛ min la mac tɛy a pɛt, kä bɛ pi̱w jak kä pua̱a̱r, bër piny bi ciötdu jak kä ŋa̱ckɛ ɛ ji̱ tɛ̈ru, bɛ döör diaal cu ben lath nhiamdu!

³ Kä mëë ci lät ti ga̱ykɛ naath ti /ci nɛy kɛ car la̱t, curi ben piny kä cuɛ pääm lath nhiamdu.

⁴ Thilɛ ram mi ci jɛ liŋ ni wal, thilɛ ji̱th mi ci jɛ liŋ, kä thilɛ waŋ mi ci Kuoth mi dɔ̱ŋ nɛn mi /ci mɔ a ji̱n, mi lät kɛ kui̱ nɛɛni tin liɛpkɛ ji̱.

⁵ La ro̱mi kɛ nɛy tin la̱tkɛ cuŋ kɛ gɔɔy lɔaac, nɛy tin tiɛmkɛ ji̱ rɛy lätnikiɛn. Kɛ ɣöö ci gaak cakɔ cu duer, te duer kɛɛl kɛ kɔ ni wal, bakɔ kulɛ kään i̱di?

⁶ Ci kɔn diaal cu ce̱tnikɛ ram mi ci rɔ nyon, ci lät cuŋnikɔ diaal cu ce̱tnikɛ bi̱i̱ mi ci lɔth. Ci kɔn diaal cu rɔɔl ce̱tnikɛ ji̱th jiaath, jiäkɔ ce̱tkɛ nikɛ kɔaŋ cakɔ cu buath jɔ̱ɔ̱r.

⁷ Thilɛ ram mi pal ji̱, thilɛ ram mi go̱o̱r luäk kä ji̱, kɛ ɣöö ci rɔ tɛ̱̈ɛ̱̈ kɛ nɛy, cikɔ cu pa̱l ni rɛy jiäknikɔ.

⁸ Kä ŋotdɛ lö Kuoth Nhial ɛ ji̱n Gua̱a̱ra, kɛ kɔn mun ta̱th, kä ɛ ji̱n tääthda, kɔn diaal kɛ kɔn la̱t tetkädu.

⁹ Ɛ gakdu /ci pal ɛlɔ̱ŋ lö Kuoth Nhial, kä /cu dueerkɔ lɛ tim amäni cäŋ kɛl, carɛ ɛn ɣöö kɔn diaal nɛɛku.

¹⁰ Ci wi̱i̱ku tin rɛ̈lkɛ rɔ̱ ce̱tnikɛ därdɔaar, ci Dha-yɔn a ni därdɔaar, Jɛ-ru-tha-lɛm ca ni day.

¹¹ Luaakda min gɔaa in rɛl rɔ min la gua̱nikɔ ji̱ a puɔny thi̱n, cɛ waaŋ kɛ mac täämɛ, gua̱th diaal tin nhɔk nɛy kɛ cikɛ da̱k.

¹² Kɛ kɔr kä ti̱ti̱ diaal lö Kuoth Nhial bi rɔ lɛ ni nɔa̱a̱n? Bi ŋot kɛ biɛt, ɛ bikɔ lɛ ni duäc ɛlɔ̱ŋ?