I-ca-yaa 62 - RUAC KUƆTH IN RƐL RƆ

Jɛ-ru-tha-lɛm mi pay tuɔɔk

¹ Kɛ kui̱ Dha-yɔn ɣän /cä bi biɛt, kä kɛ kui̱ Jɛ-ru-tha-lɛm ɣän /cä bi lɔ̱ɔ̱ŋ, amäni mi ci cuŋkɛ mɛ̈r ce̱tnikɛ käny ca̱ŋ, kä ci ka̱ndɛ dɔap ce̱tnikɛ patariɛy.

² Bi döör cuŋku nɛn, kä bi kua̱r diaal gɔɔydu nɛn, kä ba ji̱ cɔl kɛ ciöt mi pay cak, mi bi Kuoth Nhial ɛ ŋun.

³ Bi la kum kuäärä mi gɔaa tetdä Kuɔth Nhial, bi ce̱tnikɛ kum kua̱r tetdä Kuɔthdu.

⁴ /Ca ji̱ bi nyɔkɛ ciöt i̱ Ä-dhu-baa, kä /ca mundu bi cɔl i̱ Cɛ-ma-maa, duundɛ ɣöö ba ji̱ cɔl i̱ Ɣɛp-dhi-baa, kä ba mundu cɔl i̱ Bɛ-u-laa, kɛ ɣöö nhɔk Kuoth Nhial ji̱, kä bi mundu a mun mi gɔaa.

⁵ Ce̱tkɛ min la ŋuɛ̈t nyal a kuɛɛn, inɔ bi gaatku mundu kuɛn, kä ce̱tkɛ min la lɔc cɔa nyaal a tɛth kɛ ciekdɛ, inɔ bi Kuothdu lɔcdɛ tɛɛth kɛ ji̱.

⁶ Ɣän cä gueec la̱th wi̱i̱ kalu lö Jɛ-ru-tha-lɛm, /cikɛ bi met biɛt kɛ cäŋ kɛnɛ wäär. Kä yɛn nɛy tin cɔalɛ Kuoth Nhial /cuarɛ rɔ̱ bi jak kä lɔ̱ŋ,

⁷ kä /cuarɛ jɛ jak kä lɔ̱ŋ, amäni mi cɛ Jɛ-ru-tha-lɛm yiath piny a cɛ jɛ jak kä liakɛ ɛ wi̱c muɔ̱ɔ̱n.

⁸ Ci Kuoth Nhial rɔ yac kɛ ciötdɛ kä cɛ rɔ yac kɛ buɔ̱mdɛ wëë i̱, “/Cä bɛlkun bi nyɔk kɛ tho̱p ji̱ tɛ̈run ala mi̱eth kä kɛ, kä /ci jur kɔaŋdun in cia la̱t bi nyɔk kɛ ma̱th,

⁹ bikɛ cam nɛy tin ŋɛ̈rkɛ kɛ, kä bikɛ Kuoth Nhial liak, kä bi nɛy tin ma̱a̱tkɛ buɔ̱c kɔaŋdɛ math rɛy kal luaakdä.”

¹⁰ Wiaakɛ, wiaakɛ kɛ thuk rɛ̈kni, rialɛ duɔ̱ɔ̱p ikä kɛ kui̱ nath, la̱tdɛ dup, la̱tdɛ dup tin di̱t, wuɔcɛ döölkɛ, kapɛ bɛ̈ri nhial kɛ kui̱ dööri.

¹¹ Kuoth Nhial cɛ wi̱c muɔ̱ɔ̱n kɛɛliw la̱t ruac wëë i̱, “Jio̱kni nya Dha-yɔn i̱, ‘Nɛnɛ, ci käändu ben, nɛnɛ, jälɛ kɛ min bɛ col ni ji̱, min culɛ ji̱ tëë kɛ jɛ,’ ”

¹² Kä bakɛ cɔli Nɛy ti rɛ̈lkɛ rɔ̱, nɛɛ Kuɔth Nhial ti cɛ luɛl, kä ba ji̱ cɔli mi Go̱o̱rɛ, Wec mi /Ka̱n Pa̱l Ruëëc.