I-ca-yaa 61 - RUAC KUƆTH IN RƐL RƆ

Thuk känä ti gɔw

¹ Te yiëë Kua̱r ni Kuoth kɛ ɣä, kɛ ɣöö ci Kuoth Nhial ɣä kuany, kɛ ɣöö bä can nöŋ thuk ti gɔw, cɛ ɣä ja̱k kɛ ɣöö bä nɛy tin jiɛth lo̱ckiɛn bum, kä bä pɛ̈ɛ̈c la̱t ɣöö bikɛ lɔar, kä bä ji̱ yieenä la̱t ɣöö cakɛ lony,

² kä bäkɛ la̱t ruɔ̱n gɔɔyä Kuɔth Nhial, ɛn cäŋ juɔ̱cdɛ kɛ ji̱ tɛ̈r, kɛ ɣöö bɛ nɛy diaal tin pär bum,

³ kä bɛ nɛy tin pär kä Dha-yɔn moc, bɛ kɛ moc kum kuäärä kɛ gua̱a̱th ŋɛthä, kä bɛ kɛ moc kɛ tɛ̈th lɔaac kɛ gua̱a̱th pärä, kä bɛ kɛ moc diit puɔnyä kɛ gua̱a̱th jiɛthä lɔaac, dɔ̱ŋ dëë kɛ cɔli jiath riɛt cuŋni, mi ca pith ɛ Kuoth Nhial, kɛ ɣöö ba jɛ liak.

⁴ Kä bikɛ ti̱ec tëë wal tëë ci da̱k nyɔk kɛ ta̱th, kɛn ti̱ec tëë ci da̱k bakɛ nyɔk kɛ lätni, kä bikɛ wi̱i̱ tëë ci da̱k buɔt, kɛn wi̱i̱ tëë ca däk ni wal.

⁵ Bi jur dëtku yien, nɛy tin jur ba ka̱a̱ku pur,

⁶ duundɛ ɣöö ba yɛ cɔl i̱ bööth palä Kuɔth Nhial. Bi ciötdun a bööth palä Kuɔthda, kä bia ria̱ŋ dööri cam, bi lo̱ckun tɛɛth kɛ ria̱ŋdiɛn.

⁷ Kɛ gua̱a̱th po̱cädun, bia jek ni muc nikä rɛɛw, kɛ gua̱a̱th buarädun, bi lo̱ckun tɛɛth kɛ kui̱dun, kɛ kui̱c ɛmɔ bikɛ muc rɛw jek muundiɛn, kä bia cu tekɛ tɛ̈th lɔaac mi thil pek.

⁸ Kɛ ɣöö ɣän Kuoth Nhial nhɔakä cuŋ, ɣän lökä mac kɛnɛ lät jiäkni, kɛ gɔɔydä bäkɛ culikä, kä bä mat ruac mi do̱raar la̱t kɛ kɛ.

⁹ Kä ba kuaykiɛn ŋa̱c rɛy dööri, kä ba gaatkiɛn ŋa̱c rɛy nath, nɛy diaal tɔ̱ bakɛ nɛn tɔ̱ bakɛ ŋa̱c, ɛn ɣöö kɛ nɛy ti ca poth ɛ Kuoth Nhial.

¹⁰ Ɣän bi lɔcdä tɛɛth ɛlɔ̱ŋ kɛ Kuoth Nhial, bi ti̱eydä Kuothdä liak, kɛ ɣöö cɛ ɣä kum kɛ bi̱i̱ känä, cɛ ɣä yi̱k piny kɛ bi̱i̱ cuŋni, ce̱tnikɛ min la cɔ nyaal rɔ a pik kɛ jiöŋgööni, kɛnɛ min la kaw rɔ a pik kɛ dɔ̱a̱kni.

¹¹ Ce̱tkɛ min la kuay a do̱ny piny, kä ce̱tkɛ min la tin ca pith rɛy kakä a do̱ny, inɔ bä bi Kuäär ni Kuoth cuŋ kɛnɛ puɔnyni nööŋ nhiam dööri diaal.