I-ca-yaa 60 - RUAC KUƆTH IN RƐL RƆ

Gɔɔy Dha-yɔn mi bi ben

¹ Jiɛc rɔ bili kɛ ɣöö ci buaydu ben, ci buay Kuɔth Nhial ben kä ji̱.

² Kä nɛnɛ muth bɛ wi̱c muɔ̱ɔ̱n kum, muth mi col tëë wi̱i̱ nath, duundɛ ɣöö bi Kuoth Nhial ji̱ mɛr, ba buaydɛ nɛn kä ji̱.

³ Bi döör ben kä buaydu, bi kua̱r ben kä buay ca̱ŋdu.

⁴ Kapni waŋdu nhial gui̱cni, ci naath rɔ̱ mat kɛɛl bäkɛ kä ji̱, kä bi dhɔɔlku ben ni guäth mi na̱n, kä ba nyieeku kap nikɛ wuɔ̱ɔ̱k.

⁵ Mi wi̱i̱kɛ wä nɛn bi lɔcdu buay, bi tekɛ tɛ̈th lɔaac mi di̱i̱t, kɛ ɣöö ba ria̱ŋ nɛɛni tin te kui̱ yiëër nöŋ ji̱, ɛn ria̱ŋ dööri bɛ ben kä ji̱.

⁶ Bi thɔ̱a̱rɔa̱a̱li ti ŋuan mundu thiäŋ, dɛy thɔ̱a̱rɔa̱a̱li ji̱ Mid-yan kɛnɛ ji̱ Eepa, kä bi ji̱ Thɛba diaal ben. Bikɛ da̱a̱p kɛnɛ wäl in kɔp nööŋ, kä bikɛ Kuoth Nhial puany.

⁷ Kä ba ji̱ ka̱m dët Ke-dhar diaal, kä ba rueeth deet rɔɔmni Nɛ-ba-yɔth nöŋ ji̱ ala muc, bi kɛn a muc ti gɔw wi̱i̱ yi̱kädä, kä bä luakdä min gɔaa liak.

⁸ Kɛ ŋaani kɛn ti ri̱i̱ŋ ti ce̱tkɛ pua̱r, nɛy ti ri̱i̱ŋ ti ce̱tkɛ guɔ̱kni ti bankɛ duëlkiɛn?

⁹ Nɛy tin cieŋ kä dhuɔ̱li liɛpkɛ ɣä, bi kɔn ben ni babuuri Tar-cic kɛ nhiam, ba dhɔɔlku nööŋ guäth mi nɔ̱a̱n, bakɛ nööŋ kɛɛl kɛ ciɛkdiɛn in bo̱r kɛ da̱a̱pdiɛn. Kɛ kui̱ cio̱tdä Kuɔth Nhial ni Kuothdu, kɛnɛ kui̱ Kuɔth I-thɛ-rɛl, min ci ji̱ lät kä ti ga̱ykɛ naath.

¹⁰ Bi jur pa̱nyniku nyɔk kɛ ta̱th, kä bi kua̱rkiɛn ji̱ lätikä, cäŋ ni mëë cä ji̱ duäc kɛ gakdä, kɛ gɔɔydä cä ji̱ nyuɔ̱th kɔ̱a̱c lɔaac.

¹¹ Bi thiekniku te ɣo̱o̱ŋä ni ciaŋ, /cakɛ bi gäk kɛ cäŋ kɛnɛ wäär, kɛ ɣöö dëë naath ji̱ nöŋ ria̱ŋ dööri, kä bi kua̱rkiɛn ben nikɛ buɔ̱l.

¹² Kä do̱r kiɛ kuäär ɛ /ci ji̱ bi lätikä mɔ ba jɛ däk, kɛn döör tɔ̱tɔ̱ bakɛ dup.

¹³ Kä ba ji̱ nöŋ jiɛn Lɛ-ba-nɔn tin gɔw, luɔ̱ɔ̱r kɛ ŋuër kɛnɛ ŋɔ̱a̱ny, kɛ ɣöö bakɛ biil ni luakdä, kä bä gua̱a̱th ciöknikä jak kä gɔaa.

¹⁴ Kä bi gua̱ni nɛɛni tin ciaŋkɛ ji̱ a jiäk, ben kä ji̱ a ca rɔ goŋ, kä nɛy diaal tin lökɛ ji̱ bikɛ rɔ̱ ben goŋ ciökniku, kä ba ji̱ cɔl i̱ Wec Kuɔth Nhial, Dha-yɔn Kuɔth I-thɛ-rɛl.

¹⁵ Cäŋ ni mëë ca ji̱ pa̱l ruëëc kä ca ji̱ lo̱k, ti thilɛ ram mi ret kɛ jɛ, ɣän bä ji̱ jak kä gɔaa amäni cäŋ kɛl, ala gua̱a̱th tɛthkä lɔaac mi do̱raar.

¹⁶ Kä ji̱n bi gɔy dööri lot, ce̱tnikɛ ram mi mi̱eethkɛ ɛ kua̱r, biɛ cu ŋa̱c ɛn ɣöö ɛ ɣän Kuoth Nhial ɛ ɣän Käändu, kä ɛ ɣän Lueelu min la Kuoth Je-kɔb.

¹⁷ Kä kɛ gua̱a̱th cikä min yian bä nööŋ ni da̱a̱p, kä kɛ gua̱a̱th ladiitdä bä nööŋ ni ciɛk in bo̱r, kä kɛ gua̱a̱th jiɛn bä nööŋ ni ciɛk in yian, kä kɛ gua̱a̱th guiiyni bä nööŋ ni ladiit. Bä nɛy tin yakɛ yɛ jakä tekɛ mal, kä bä ruëëckun jak kä ruec kɛ cuŋ.

¹⁸ /Ca ko̱r bi nyɔk kɛ li̱eŋ muundu, kä thilɛ da̱k kiɛ rik ti bi tuɔɔk këthniku, bi pa̱nyniku cɔli Ka̱n, kä bi thiekniku cɔli Liak.

Kuoth ɛ gɔɔy Dha-yɔn

¹⁹ Cäŋ /cɛ bi la buaydu kɛ cäŋdäär, kä /ci pay ji̱ bi mɛr kɛ wäär, Kuoth Nhial ɛ jɛn bia̱ buaydu mi do̱raar ɔ, kä ɛ Kuothdu bia̱ gɔɔydu mɔ.

²⁰ Kä /ci cäŋdu rɔ bi nyɔk kɛ kony, kä /ci pay buaydɛ bi thil, Kuoth Nhial ɛ jɛn bia̱ buaydu mi do̱raar ɔ, kä bi ni̱n pärädu cu thuɔ̱k.

²¹ Bi nɛɛku diaal a ji̱ cuŋni, bikɛ mun ciɛŋ amäni cäŋ kɛl. Kɛ kɛn tëë piɛɛthä, tëë la̱tdä nikɛ tetdä, kɛ ɣöö ba ɣä liak.

²² Kä nɛy tin tɔt kä kɛ bikɛ la thok duëël, kä nɛy tin kuiy ni kɛn bi kɛn a do̱r mi bum, mi wä gua̱a̱thdɛ wä cop bä jɛ la̱t kɛ pɛ̈th, ɛ ɣän Kuoth Nhial.