I-ca-yaa 6 - RUAC KUƆTH IN RƐL RƆ

Ciöt Kuɔth kɛ I-ca-yaa

¹ Kɛ ruɔ̱n ëë li̱w kɛ kuäär ni Ö-dhi-ya cua̱ Kuäär ni Kuoth nɛn tëë nyuurä wi̱i̱ kɔam kuäärädɛ ni nhial, kä liakɛ jɛ. Kä ci bi̱i̱dɛ luak thiäŋ.

² Wi̱i̱dɛ te nyin nhial thi̱n, te mɔ kɛ gɔ̱k da̱ŋ bäkɛl. La mɔ nhiamdɛ a kum kɛ gɔ̱k da̱ŋ rɛw kä bɛ puɔ̱nydɛ kum kɛ rɛw tin kɔ̱ŋ, kä bɛ rɔ bar kɛ rɛw tin kɔ̱kiɛn.

³ Kä cɔalkɛ rɔ̱ wäkɛ i̱, “Mi rɛl gɔɔydɛ rɔ, mi rɛl gɔɔydɛ rɔ ɛ Kuoth Nhial in la Ruey Ɣɔaa, ci wi̱c muɔ̱ɔ̱n thia̱a̱ŋ kɛ buaydɛ.”

⁴ Kä cuɛ do̱o̱pni thiek lath kɛ jɔw nɛɛni tin cio̱t, kä cu luak thia̱a̱ŋ kɛ tol.

⁵ Kä cua̱ wee i̱, “Riɛk akɛ ɣä! Kɛ ɣöö cä bath, ɛ ɣän ram mi jiäk thokdɛ kɛ ɣöö ciëŋä rɛy nɛɛni ti jiäk thukiɛn. Kä ŋotdɛ cua̱ kuäär ni Kuoth Nhial in la Ruey Ɣɔaa nɛn!”

⁶ Kä cu puɔ̱ny kɛl ben kä ɣä ni nhial kɛ ruɛ̈l maac mi cɛ ka̱n wi̱i̱ yi̱kä kɛ kääpni maac.

⁷ Kä cuɛ thokdä thiap kɛ jɛ, kä cuɛ wee i̱, “Nɛnɛ, nɛmɛ cɛ thokdu nyɔt, ɛn täämɛ ca jiäku woc, kä ca dueerku päl.”

⁸ Kä cua jɔw Kua̱r ni Kuoth liŋ wëë i̱, “Ɛŋa bä kulɛ ja̱k ɔ? Kä ɛŋa bi wä kɛ kui̱da mɔ?” Kä cua jɛ loc i̱, “Ɣän ɛn! Jäk ni ɣä.”

⁹ Kä cuɛ wee i̱, “Wër jio̱kni nɛy tɔ̱tɔ̱ i̱, ‘Li̱eŋɛ agɔaa, duundɛ ɣöö /cɛ bi cop lɔɔcdu, kä guecɛ agɔaa duundɛ ɣöö /cia bi ŋa̱c.’

¹⁰ Kä nyon cär nɛɛni tɔ̱tɔ̱, kä jak nikɛ kä mi̱eŋ, kä jak nikɛ kä /ci gui̱c, kɛ ɣöö /cikɛ bi guic, kä /cikɛ bi liɛŋ, kä /cikɛ ŋɔak bi ŋa̱c, kɛ ɣöö /cikɛ rɔ̱ bi riet ɣä ɛ bäkɛ jak kä gɔw.”

¹¹ Kä cua̱ wee i̱, “Amäni nɛy Kuäärä?” Kä cuɛ wee i̱, “Amäni mi ci wec te baaŋ a thilɛ nɛy ti cieŋ thi̱n. Kä a thilɛ ciëŋ naath, kä a /cɛ thil ram mi cieŋ muun,

¹² amäni mi cä naath jäk ni nɔ̱nä, ɛ ca mun pa̱l ruëëc.

¹³ Mi ci nɛy da̱ŋ wäl duɔth muun, ba nyɔk nikɛ wa̱ŋ ɛn mun, bikɛ ce̱tnikɛ jiath ŋɔ̱a̱p mi ca jɔap piny.” Kä kɛn nɛy tɔ̱ bi ŋot kɛ tëk tɔ̱ bikɛ ce̱tnikɛ jiath mi nyɔk rɔ kɛ tunh.