Biblia Todo Logo
Bìoball air-loidhne

- Sanasan -

I-ca-yaa 59 - RUAC KUƆTH IN RƐL RƆ


Lo̱k go̱kä kɛ dueer nath

1 Nɛnɛ tet Kuɔth Nhial /cɛ ciɛk kä ɣöö derɛ raan kän, kä /kenɛ ji̱thdɛ di̱w kä ɣöö /cɛ dëë liɛŋ.

2 Duundɛ ɣöö dueerku ca kamdu da̱a̱k yɛnɛ Kuothdu, ci dueerku jɛ pën ɣöö bɛ ji̱ guic, kɛ kui̱c ɛmɔ /cɛ ji̱ liŋ.

3 Kɛ ɣöö ci tetku ya̱r kɛ riɛm, kä ci yiɛtku ro̱ŋ kɛ jiäk, kä ji̱n latdi ni ka̱a̱cni, kä lat lɛpdu ni ti jiäk.

4 Kä thilɛ ram mi lat cuŋ, kä thilɛ ram mi lat luk kɛ ŋuɔ̱t ti gɔw, ŋa̱thkɛ ni ruac mi baŋ ruac ka̱a̱cni, tuɔkɛ ni rik kä la̱tkɛ ni dueer.

5 Kuɛ̈mkɛ ni toŋ thɔa̱a̱l mi te lueŋ, kä la̱tkɛ ni mi ce̱tkɛ lath makaarä, kä ram ɔ dëë toŋkiɛn cam ɔ bɛ li̱w, kä mi ca kɛl kuɛm bä ni thɔ̱l raar thi̱n.

6 Kä ɛn lathdiɛn /ca jɛ dëë lät bieyni, thilɛ nɛy ti dëë rɔ kum kɛ min ci kɛn ɛ la̱t. Lätkiɛn kɛ lät jiäkni te ni ciɛŋ ko̱o̱ri kɛ kɛ.

7 La kɛn a ban ni mi jiääk, la kɛn cua̱ pɛ̈th kɛ wuth riɛm raam mi thil duer piny, cärkiɛn kɛ cär ti jiäk, kä dupkiɛn te ni da̱k thi̱n.

8 Kui̱c kɛn duɔ̱ɔ̱p malä, kä thilɛ cuŋ rɛy lätnikiɛn, cikɛ dupkiɛn jak kä dup ti gɔ̱a̱ŋ gɔa̱a̱ŋ, nɛy diaal tin jäl thi̱n kueckɛ mal.


Lat nath kɛ dueerkiɛn

9 Kɛ kui̱c ɛmɔ nɔ̱a̱n thuɔ̱k kɛ kɔn, kä /ci cuŋ cup rɛydan, gui̱c kɔn buay, duundɛ ɣöö ɛ muth ni kɛɛliw, kä liip kɔn buay, ku kɔn lɛ jäl ni muth.

10 Luk kɔn ni päny ce̱tnikɛ ciöör, la thi̱ep kɔn ce̱tkɛ nɛy ti thil wäŋ, la kɔn kɔ̱a̱a̱th a kɔ̱thikä kɛ cäŋdäär ce̱tkɛ wäär, rɛy nɛɛni tin bum ce̱t kɔn nikɛ nɛy ti ci li̱w.

11 Burni kɔn ce̱tnikɛ nyakudhuny, kä päri kɔn ce̱tnikɛ guɔ̱kni, görnɛ thuɔ̱k, kä thilɛ mi te wa̱nɔ, görnɛ ka̱n, duundɛ ɣöö nɔ̱a̱nɛ kɛ kɔn.

12 Kɛ ɣöö jiäk kɔ ŋuankɛ nhiamdu, kä dueerkɔ gɔanykɛ kɔ, kä te jiäk kɔ kɛɛl kɛ kɔ, kä ŋäc nɛy nyuɔɔnkɔ,

13 nyuɔɔn kɛnɛ lo̱k Kuɔth Nhial, kɛ locda jɔk kɛ guur Kuɔthda, kä ruac nɛy a jiäk kɛ nɛy tin kɔ̱ŋ, kä caar nɛy ni ti jiäk kä lat nɛy ni ka̱a̱cni.

14 Ci thuɔ̱k cu loc jɔk, kä ci cuŋ cu cuɔ̱ŋ ɛ na̱n, /ca thuɔ̱ɔ̱k lɛ lat duɔ̱pni, thilɛ luth mi lɛ cop wi̱c.

15 Ci thuɔ̱k thil, kä ram mi ci mi jiääk nyoth tëë kɛ riɛk. Cu Kuoth Nhial ɛ guic, kä cuɛ lɔcdɛ lo̱k, kɛ ɣöö thilɛ thuɔ̱k.


Rial Kuoth Nhial rɔ ikä kɛ luäk nɛɛnikɛ

16 Cuɛ nɛn ɛn ɣöö thilɛ raan, cuɛ ga̱a̱c ɛn ɣöö thilɛ ram kɛl mi dëë luäk, cu buɔ̱mdɛ jɛ nöŋ juc nath, cu cuŋkɛ jɛ moc kɛ buɔ̱m.

17 Cuɛ cuŋ la̱th kathdɛ ala ko̱t, kä cuɛ kum känä la̱th wi̱i̱dɛ, cuɛ rɔ moc kɛ bi̱i̱ cutdä kä cuɛ rɔ rith kɛ gak ce̱tkɛ mi ɛ bi̱i̱.

18 Ce̱tnikɛ tin ci kɛn kɛ la̱t, bɛ kɛ cuɔ̱lkɛ ni nɔ bä, bɛ ŋɛ̈ɛ̈nydɛ nyuɔ̱th nɛy tin gak kɛ jɛ, kä bɛ nɛy tin cieŋ wuɔ̱thni dhuɔ̱li cuɔ̱l lätkiɛn.

19 Kui̱ kony ca̱ŋ ba ciöt Kuɔth Nhial luɔ̱th thi̱n, kä bi ji̱ känyä ca̱ŋ buaydɛ luɔ̱th, kɛ ɣöö bɛ ben ce̱tnikɛ waŋ mi ci thia̱a̱ŋ kɛ pi̱, mi cuackɛ ɛ yiëë Kuɔth Nhial.

20 “Kä bɛ ben kä Dha-yɔn ala Lueel, bɛ ben kä ji̱ Je-kɔb tin ca rɔ ri̱t dueerikiɛn, ruac ni Kuoth Nhial.

21 “Duundɛ ɣöö kä ɣä, nɛmɛ ɛ jɛn mat ruacdä kɛ kɛ, duundɛ ɣöö yiëëdä min tekɛ ji̱, kɛnɛ ruacdä min cä ka̱m ji̱, akɛ /ci jiɛy kä ji̱, kiɛ akɛ /ci jiɛy kä gaatku, kɛnɛ gaat ganku, niɛ täämɛ amäni cäŋ kɛl,” ruac ni ɣän Kuoth Nhial.

Nuer Bible © Bible Society in South Sudan 1998,2012.

Bible Society in South Sudan
Lean sinn:



Sanasan