I-ca-yaa 57 - RUAC KUƆTH IN RƐL RƆ

Kuth I-thɛ-rɛl ti jiäk

¹ Ci ram mi gɔaa li̱w, kä thilɛ ram mi caar jɛ kɛ lɔcdɛ, nɛy ti ji̱ ŋäthä ca kɛ naŋ, kä thilɛ ram mi ŋäcɛ. Ca ram in gɔaa woc rɛy rikni,

² cɛ wä rɛy malä, kɛn cikɛ lɔ̱a̱ŋ jek li̱th kɛn nɛy tin la̱tkɛ ni cuŋ.

³ Duundɛ ɣöö bia wa̱nɛ mi, bia yɛn gaat ti̱tni, yɛn gaat dhöömni kɛnɛ lëër.

⁴ Ɛŋa mi yɔŋ yɛn ɛ? Ɛŋa mi buuy yɛn ɛ min ɣo̱o̱k yɛn lëëpkun raar kɛ jɛ? Kɛ yɛn gaat ti ji̱ nyuɔɔni, kuay ti ji̱ mɛɛtdä,

⁵ yɛn ti diëthkɛ thäri jiɛn ritni, kɛnɛ thär jiɛn diaal tin tɔ̱ɔ̱c, yɛn nɛy ti thöpɛ gaatkun ala muc rɛy löli, kɛnɛ thär päämni tin ci ba̱k?

⁶ La yɛn pääm ti puath puaath a kän rɛy lo̱o̱lä ala kuth, la yɛn kɛ a pal ala kuth, la yɛn kɛ a ti̱th kɔaŋ ala muc, kä tho̱p yɛn kɛ muc bɛɛl. Caar yɛnɛ dëë lɔcdä tɛɛth kɛ kɛn ti̱ti̱ diaal?

⁷ La yɛn cua̱ tɔ̱ɔ̱c kɔ̱a̱kni päämni tin ba̱r ba̱a̱r, bia cu wä nhial wiaa luurikun thöp.

⁸ Kä läth yɛn kuth jiɛnkun tutdä duëël thaar thiek, Ci yɛn ba̱ny ni ɣä piny, ce̱t yɛn nikɛ ler cia lëp ni dha̱a̱ŋniku ɣööŋ. Cu wä ni yɛn rɛy dha̱a̱ŋnikun tin cia la̱t ɛ di̱t. Kä cuarɛ kök ni rɔ̱ kuthkun, cuarɛ nhɔk ni paliɛn ce̱tnikɛ ler mi guic nho̱o̱kdɛ.

⁹ Curi wä kä kuoth Mo-lɛk kɛ liɛɛth Ɔ-lip, curi wal yi̱i̱rädu jak kä ŋuan, la jäki naath wa kuth go̱r guäth mi nɔ̱a̱n, la jäki kɛ amäni ro̱l jɔɔkni.

¹⁰ Curi cuuc kɛ bär duɔ̱pdu, duundɛ ɣöö /keni wee i̱, “Thilɛ jɛ luɔt”, curi rɔ nyɔk kɛ jek buɔ̱m, kɛ kui̱c ɛmɔ /keni rɔ ka̱p cuɔ̱ŋ.

¹¹ Ɛŋa mi duali kɛ jɛ, mɔ lätdi ni ɣä kac ɔ, mɔ /ci ɣä tim ɔ, kä /ci ɣä car ɔ? Kä ciɛ ɣöö cä biɛt kɛ gua̱a̱th mi bäär, ɛ jɛn /keni ɣä luɔ̱th ɔ?

¹² Ɣän bä cuŋku lat kɛnɛ lätku, duundɛ ɣöö /ca ji̱ bi luäk.

¹³ Mi wi̱i̱ wä wiee go̱ri luäk, ɛ kuth jiɛnkun tin cia ma̱a̱t ka̱nkɛ yɛ! Bi jiɔam kɛn diaal lɔk, bi yiëë mi ŋɔakɛ ni jɛ kɛ lɔk. Duundɛ ɣöö bi ram mi teey rɔ kä ɣä bɛ mun ɛmɔ ciɛŋ, kä bɛ pämdä min rɛl rɔ ciɛŋ.

Lär Kuɔth kɛ luäk kɛnɛ pual pua̱a̱ny

¹⁴ Kä ba jɛ lar i̱, “Ta̱thɛ jɛ, ta̱thɛ jɛ, rialɛ duɔ̱ɔ̱p ikä, jakɛ duɔ̱ɔ̱p kä puɔth kɛ kui̱ nɛɛnikä.”

¹⁵ Kä cu Kuoth in te nhial min rɛl rɔ, min tëk a thil pek, min rɛl ciötdɛ rɔ wëë i̱, “Ɣän ciëŋä nhial guäth mi rɛl rɔ, kä ciëŋä bä kɛɛl kɛ nɛy tin jiɛth lo̱ckiɛn kä kɔ̱c, kä muɔɔcä nɛy tin kɔ̱c kɛ tëk, kä lua̱kä nɛy tin jiɛth lo̱ckiɛn.

¹⁶ Kɛ ɣöö cä bi göny amäni cäŋ kɛl, kä /cä bia̱ gakä ni ciaŋ, kɛ ɣöö yiëë ran kɔ̱cɛ nhiamdä, ɛn yiëë ran in cä cak.

¹⁷ Ɣän cä gaak kɛ kui̱ lätnikɛ tin jiäk, cua̱ jɛ duäc, kä cua̱ rɔ tɛ̱̈ɛ̱̈ kɛ ŋɛ̈ɛ̈ny, duundɛ ɣöö cu loc ni kɛn jɔk, kɛ dupkiɛn tin go̱o̱r lo̱ckiɛn kɛ.

¹⁸ Ɣän cä lätkiɛn nɛn, duundɛ ɣöö bäkɛ jak kä gɔaa, ɣän bä jɛ bo̱th, kä bä jɛ bum, kä bä jɛn min pär ka̱m ɣöö bɛ ɣä liak.

¹⁹ Ɛ mal ɛ mal tekɛ nɛy tin nɔ̱a̱n kɛnɛ nɛy tin thia̱k, kä bäkɛ jak kä gɔw,” ruac ni ɣän Kuoth Nhial.

²⁰ Kä nɛy tin jiäk ce̱tkɛ kɛ yier mi ŋɛ̈ɛ̈ny, mi /ci dëë met lɔ̱ɔ̱ŋ, min yor muaŋdɛ dhia̱t kɛnɛ tuäk ni nhial.

²¹ “Thilɛ mal kä ram mi jiääk,” ruac ni Kuothdä.