I-ca-yaa 56 - RUAC KUƆTH IN RƐL RƆ

Nɛɛ Kuɔth Nhial bi döör diaal te thi̱n

¹ Cu Kuoth Nhial wee i̱, “Tit thuɔ̱k, kä lätni ni cuŋ, kɛ ɣöö ci gua̱a̱th känädä thia̱k, kä bi cuŋkä jɔɔc.

² “Kä puɔ̱th akɛ ram mi tiit nɛmɛ, ram mi rɔm jɛ a bum, ram mi tiit cäŋ lɔ̱ŋä a /cɛ jɛ nyon, ram mi /ci mi jiääk lät.”

³ Kä a jɛ thil juɔ̱r mi ci rɔ mat kɛ Kuoth Nhial mi wee i̱, “Kɛ thuɔ̱k bi Kuoth Nhial ɣä koc rɛy nɛɛnikɛ”, kä a jɛ thil jio̱w mi ruac i̱, “Nɛnɛ, ɛ ɣän jiath mi kööt.”

⁴ Kɛ ɣöö ci Kuoth Nhial wee i̱, “Kɛ kui̱ jiöwni tin tiɛtkɛ cäŋ lɔ̱ŋädä, tin mɛ̈kɛ ni tin tɛ̈thkɛ lɔcdä, kä rɔamkɛ mat ruacdä,

⁵ ɣän bäkɛ moc dhɔrä kɛnɛ pa̱nynikä, kɛ mi ba tim ni jɛ kɛnɛ kɛ̈k, mi gɔaa ni jɛn kä dhɔɔl kɛnɛ nyier, ɣän bäkɛ moc kɛ kɛ̈k mi /ci bi met bath amäni cäŋ kɛl.

⁶ “Kä kɛ kui̱ juri tin ca rɔ̱ ma̱t nɛɛ Kuɔth Nhial, tin la̱tkɛ jɛ ikä, kä nhɔakɛ ciöt Kuɔth Nhial, tin palkɛ jɛ, tin tiɛtkɛ cäŋ lɔ̱ŋä ɛ /ca jɛ yär, nɛy tin yuɔpkɛ mat ruacdä,

⁷ kɛn bäkɛ nööŋ pa̱a̱mdä min rɛl rɔ, kä bäkɛ moc kɛ tɛ̈th lɔaac duëël palädä, kä bä muckiɛn tin waŋkɛ kɛnɛ luurikiɛn nhɔk wi̱i̱ yi̱kädä, kɛ ɣöö ba dhɔrä cɔl i̱ dhɔr palä nɛɛni diaal.”

⁸ Cu Kuäär ni Kuoth, min määt pɛ̈ɛ̈c I-thɛ-rɛl wee i̱, “Ɣän ŋotdɛ bä nɛy ti kɔ̱ŋ ma̱tkɛ, ti /ci tɔ̱ a tin cä ruɔ̱ɔ̱l.”

Ruëëc I-thɛ-rɛl ti jiäk

⁹ Bia yɛn ley dɔaar diaal, bia mi̱ethɛ yɛn ley ruɔ̱ɔ̱p diaal.

¹⁰ Kɛn gueec I-thɛ-rɛl kɛ ciöör, kɛn diaal kueckɛ ŋɔak, ce̱t kɛn diaal kɛ jio̱o̱k ti ga̱a̱ŋ ti kueckɛ ɣöö dëë kɛ guee, la tɔ̱ɔ̱ckɛ bikɛ cu läk ni la̱a̱k ikä, kä nhɔk kɛn ni ni̱en.

¹¹ Kɛn ce̱tkɛ nikɛ jio̱o̱k ti näk buɔthkɛ, ti /ci dëë met ria̱ŋ. Kɛn kɛ yiëën deet ti kueckɛ ŋɔak, ci loc nikɛn duɔ̱pnikiɛn, ci ram ɔ wä guic ni min bɛ jek.

¹² Kä cukɛ wee i̱, “Bia jëknɛ kɔaŋ, bia thia̱ŋnɛ rɔ̱ kɛ kɔaŋ in ca̱r, cäŋ i̱ ruɔ̱ni bilɛ gɔaa ni jɛn ɛlɔ̱ŋ kä cäŋ ɛ walɛ mi.”