I-ca-yaa 54 - RUAC KUƆTH IN RƐL RƆ

Nhök Kuɔth Nhial kɛ I-thɛ-rɛl

¹ Kä cu Kuoth Nhial wee i̱, “Kɛt dit lö ciek mi rol, ji̱n ram mi /ken met dap, ji̱n kɛt dit tɛthkä lɔaac kɛ jɔw mi di̱i̱t, ji̱n ram mi /ken kɔŋ tekɛ mäc dapä! Kɛ ɣöö bi ŋuan ni gaat ciëk mi ca päl kä gaat ciëk mi tekɛ cɔw.

² Jakni gua̱a̱th kɛmɛkädu kä di̱t, ɣär duäl kɛmɛkädu a di̱t, /cu luny jɔk jakni ni depkɛ kä bär, kä jakni löckɛ kä bum.

³ Kɛ ɣöö bia wä raar kui̱c cuëëc kɛnɛ kui̱c caam, kä bi gaatku döör mac, bikɛ wi̱i̱kiɛn tin te baaŋ ciɛŋ.

⁴ “/Cu dual kɛ ɣöö /ci bi tekɛ buar, kä /cu po̱c kɛ ɣöö /ca ji̱ bi jak kä tekɛ buar, bi buar ŋuɛɛtädu pa̱l ruëëc, kä /ci ɣöö ɛ ji̱n ciek jɔkä bi nyɔk kɛ ti̱em.

⁵ Kɛ ɣöö Cääkdu ɛ cɔwdu, kä cɔalkɛ ciötdɛ Kuoth Nhial in la Ruey Ɣɔaa, ɛn Kuoth I-thɛ-rɛl, ɛ jɛn la Lueelu mɔ, cɔalkɛ jɛ Kuoth wec muɔ̱ɔ̱n kɛɛliw.

⁶ Bi Kuoth Nhial ji̱ cɔl ce̱tnikɛ ciek mi ca lo̱k kä ci lɔcdɛ jiath, ce̱tnikɛ ciek mi ca kuɛn ɛ ŋuɛ̈t, kä ca lo̱k, ruac ni ɣän Kuoth.

⁷ Kɛ ɣöö cä yɛ päl kɛ gua̱a̱th mi tɔt, duundɛ ɣöö bä yɛ rol kɛ nhök mi di̱i̱t.

⁸ Kɛ ŋɛ̈ɛ̈ny mi di̱i̱t, cä rɔ tɛ̱̈ɛ̱̈ kä yɛ kɛ gua̱a̱th mi tɔt, duundɛ ɣöö kɛ nhök mi thil pek, bä tekɛ kɔ̱a̱c lɔaac kɛ yɛ,” ruac ni ɣän Kuoth Nhial Lueelun.

⁹ “Kɛn ce̱tkɛ nikɛ ni̱n Nowa kä ɣä, mëë cä jɛ lar ɛn ɣöö /ci nyɔc rɔ bi nyɔk kɛ ben wi̱c muɔ̱ɔ̱n, ɛn täämɛ cä yac ɛn ɣöö /cä rɔ bi nyɔk kɛ gak kɛ yɛ, /cä yɛ bi nyɔk kɛ duäc.

¹⁰ Bi pääm diaal thuuk kä bikɛ jiɛɛn, duundɛ ɣöö /ci nhökdä min do̱raar bi thuuk kä yɛ, kä thilɛ mi bi mat malädä woc kä yɛ, ruac ni ɣän Kuoth Nhial in tekɛ kɔ̱a̱c lɔaac kɛ yɛ.”

Jɛ-ru-tha-lɛm in thia̱k

¹¹ “Kä lö wec mi can, mi ca däk ɛ jiɔam, kä thilɛ mi buum jɛ, nɛnɛ, ɣän bä ji̱ nyɔk kɛ ta̱th kɛ pääm ti gɔw, bä tukdu täth kɛ pääm ti di̱t kökdiɛn.

¹² Ɣän bä biɛɛniku la̱t kɛ guɛɛy in tɔ̱c, kä bä thiekniku la̱t kɛ guɛɛy in jaŋ jaŋ, kä bä pa̱nyniku diaal täth kɛ pääm ti di̱t kökdiɛn.

¹³ Ba gaatku diaal ŋi̱eec ɛ Kuoth Nhial, kä bi gaatku tekɛ mal mi di̱i̱t.

¹⁴ Kä ba ji̱ yiath piny rɛy cuŋni, kä bi ciaaŋ jiääk na̱n kɛ ji̱, kɛ ɣöö thilɛ mi bi dual kɛ jɛ, bi dual nɔ̱a̱n kɛ ji̱ ɛlɔ̱ŋ, kɛ ɣöö /cɛ bi ben thiekädu.

¹⁵ Kä mi wëë tekɛ ram mi mak ji̱, /cɛ bi ben kä ɣä ɛn ram ɛmɔ, kä ram ɔ bi ji̱ mak ɔ, bi jɛ puɔ̱t.

¹⁶ Kä nɛnɛ, ɛ ɣän cak bel ɔ, tin la kɔ̱a̱lkɛ mac miim a bɛ bo̱o̱l, kä bikɛ yio̱w köör täth ce̱tkɛ min görkɛ. Kä ɛ ɣän cak nɛy tin ba naath näk kɛ kɛ tɔ̱.

¹⁷ Kä thilɛ yio̱w köör ti ba yɛ nyɔk kɛ juɔ̱c kɛ kɛ, kä bia lëëp diaal tin gɔanykɛ yɛ loc. Nɛmɛ ɛ jɛn duŋ ja̱a̱ŋni Kuɔth Nhial, kä ɛ jɛn min la cuɔ̱ɔ̱ŋdiɛn,” ruac ni ɣän Kuoth Nhial.