I-ca-yaa 52 - RUAC KUƆTH IN RƐL RƆ

Ɛ Jɛ-ru-tha-lɛm lɔcdɛ tɛth

¹ Keri keri lö Dha-yɔn, kä jak ni rɔ kä bum, läthni bi̱i̱du min gɔaa, lö Jɛ-ru-tha-lɛm wec in rɛl rɔ, kɛ ɣöö /ci nɛy tin ka̱n cuɛl kɛnɛ nɛy tin jiäk rɔ̱ bi nyɔk kɛ ben kä ji̱.

² Tɛŋni tur pua̱a̱nydu piny, jiɛc rɔ, nyuuri lö Jɛ-ru-tha-lɛm, lony kuatni ŋuääkdu, lö nya Dha-yɔn mi pɛ̈c.

³ Kä cu Kuoth Nhial nɛmɛ lar wëë i̱, “Ca yɛ kɔak kɛ baŋ, kä ba yɛ luɛl a thil yio̱w.

⁴ Kɛ ɣöö ci Kuäär ni Kuoth ruac ɛn ɣöö kɛ nhiam ci nɛɛkä wä kä I-jëp kɛ ɣöö bikɛ wä cieŋ thi̱n, kä cu ji̱ A-thi-ri-ya kɛ wä ciɛŋ ɛ jiäk ni baaŋ.

⁵ Kä cu Kuoth Nhial lɛni ruac ɛn ɣöö täämɛ min cä liŋ /ciɛ ɣöö ca nɛɛkä naŋ ni baaŋ a thil luɔt? Kä wiee ni nɛy tin ruackɛ kɛ, kä lökɛ ni ciötdä ni ciaŋ.

⁶ Kɛ kui̱c ɛmɔ bi nɛɛkä ciötdä ŋa̱c, kɛ kui̱c ɛmɔ bikɛ jɛ ŋa̱c ɛn cäŋ ɛmɔ ɛn ɣöö ɛ ɣän ruac ɔ, kɛ thuɔ̱k ɛ ɣän.”

⁷ Ku ciök nɛɛni tin nööŋkɛ thuk lɛ gɔw i̱di wi̱i̱ pa̱a̱m, nɛy tin latkɛ mal kä nööŋkɛ thuk ti gɔw, nɛy tin latkɛ ka̱n tin jiökɛ Dha-yɔn i̱, “Kuothdu ɛ Kuäär.”

⁸ Li̱eŋɛ ci yiëënkun jiööthkiɛn kap nhial, kɛn kɛ̈tkɛ dit kɛɛl kɛ tɛ̈th lɔaac, kɛ ɣöö bikɛ Kuoth Nhial nɛn kɛ nyinkiɛn mi wëë wä luny kä Dha-yɔn.

⁹ Kɛ̈tdɛ diit tɛthkä lɔaac kɛɛl, lö yɛn da̱k Jɛ-ru-tha-lɛm, kɛ ɣöö ci Kuoth Nhial nɛɛkɛ bum, cɛ Jɛ-ru-tha-lɛm luɛl.

¹⁰ Bi Kuoth Nhial buɔ̱mdɛ nyoth nhiam dööri diaal, kä bi pek wec muɔ̱ɔ̱n diaal ka̱n Kuɔthda nɛn.

¹¹ Jiayɛ jiayɛ wuɔcɛ rɔ ɛn wi̱ni, /cuarɛ ti jiäk thiap, bia raar rɛydɛ kä lakɛ rɔ̱, yɛn nɛy tin kapkɛ kuak Kuɔth Nhial.

¹² Kɛ ɣöö /ci yɛn bi jiɛɛn kɛ pɛ̈th, kä /ci yɛn rɔ̱ bi bar, kɛ ɣöö bi Kuoth Nhial wä nhiamdun, ɛn Kuoth I-thɛ-rɛl bɛ yɛ gaŋ jɔk ɔ.

Cuɔ̱c jäŋä

¹³ Kä cu kuoth nhial wee i̱, “Nɛ̈nɛ ja̱ŋdä bɛ la̱tdɛ luäŋ, ba jɛ liak kä ba jɛ kap nhial, bɛ te ni nhial ɛlɔ̱ŋ.

¹⁴ Cu nɛy ti ŋuan ga̱a̱c mëë ca jɛ nɛn, cu nëndɛ naath gäy kɛ ɣöö /ca jɛ ŋic, /ci ta̱a̱dɛ ce̱tkɛ ta̱a̱ ran,

¹⁵ bɛ döör ti ŋuan gäy, kä bi kua̱r ti ŋuan biɛt kɛ nëndɛ, kɛ ɣöö bikɛ ti /ka̱n la̱rkɛ nɛn, kä bikɛ mi /ka̱n liŋ ŋa̱c.”