I-ca-yaa 51 - RUAC KUƆTH IN RƐL RƆ

Ba Jɛ-ru-tha-lɛm kän

¹ Cu Kuoth Nhial wee i̱, “Liɛŋɛ ɣä yɛn tin guɔ̱ɔ̱rkɛ cuŋ, yɛn tin görkɛ Kuoth Nhial, guɛcɛ pääm guäth in kuacɛ kɛ thi̱n, guɛcɛ gua̱a̱th in ŋaŋkɛ kɛ thi̱n.

² Kä guɛcɛ guurun ni A-bɛ-ram, kä guɛcɛ Thara mëë daap yɛ. Jɛn thilɛ jɛ gaat mëë cɔalä jɛ, kä cä jɛ poth kä cä jɛ jak kä nɛy ti ŋuan.

³ Kɛ ɣöö bä Dha-yɔn nyuɔ̱th kɔ̱a̱c lɔaac, bä nɛy diaal tin ci da̱k thi̱n moc kɔ̱a̱c lɔaac, kä bä därdɔaarɛ jak kä ce̱tnikɛ kak E-dɛn, dɔr rɛ̈wdɛ bɛ ce̱tnikɛ kakdä ɣän Kuoth Nhial, bi te ni tɛ̈th lɔaac kɛnɛ gɔɔy lɔaac thi̱n, bi ji̱kɛ tɛ̈th lɔaac lat kä bikɛ ki̱et kɛ diit.

⁴ “Liɛŋɛ ɣä lö nɛɛkä, ga̱ŋɛ ɣä ji̱thkun yɛn do̱rä, kɛ ɣöö bi ŋi̱i̱c wä raar kä ɣä, bi thuɔ̱kdä a buay kä naath.

⁵ Ci cuŋkä thia̱k ɛlɔ̱ŋ, ka̱ndä jɛn a dup. Ɣän bä naath ruac kɛ buɔ̱mdä, bi nɛy tin cieŋ wuɔ̱thni dhuɔ̱li guic ni ɣä, kä bikɛ ŋäth ni buɔ̱mdä.

⁶ Kapni wäŋku nhial guic pua̱a̱r, kä guic piny ni piny muɔ̱ɔ̱n. Ɛn pua̱a̱r bɛ thuɔ̱k ce̱tnikɛ tol, kä bi piny da̱k ce̱tnikɛ bi̱i̱, kä tin cieŋ thi̱n bikɛ li̱w ce̱tnikɛ luaŋ, duundɛ ɣöö bi ka̱ndä te thi̱n amäni cäŋ kɛl, kä ci cuŋkä bi met guut.

⁷ “Liɛŋɛ ɣä yɛn nɛy tin ŋa̱ckɛ cuŋ, yɛn nɛy tin te ŋuɔ̱tkä lɔɔcdiɛn, /cuarɛ dual kɛ ruac nath, kä ɛ ji̱ /cɛ lath kɛ kuethnidiɛn kɛ ji̱.

⁸ Bi diɛɛr kɛ cam ce̱tnikɛ bi̱i̱, kä bi rɛl kɛ cam ce̱tnikɛ thi̱et, duundɛ ɣöö bi cuŋkä te thi̱n amäni cäŋ kɛl, kä bi ka̱ndä tekɛ ri̱c diaal.”

⁹ Kërɛ kërɛ kä ka̱nɛ buɔ̱m, lö yɛn rɛm Kuɔth Nhial, kërɛ ce̱tnikɛ ni̱n tëë kɔn, ce̱tnikɛ ri̱c tëë wal. /Ciɛ ji̱n ɛn nëë ŋuk Ra-ɣab ni dhoon, mëë näk nyaŋ yiëër in di̱i̱t?

¹⁰ Kä /ciɛ ji̱n ɛn nëë jak bar kä kööt, mëë ko̱o̱t pi̱w bäpdiit in lueŋ, kä mëë jak luŋ bar kä duɔ̱ɔ̱p ëë jäl kɛ nɛy tëë ca luɛl?

¹¹ Kä bi nɛy tin ca luɛl ɛ Kuoth Nhial luny jɔk, bikɛ ben kä Dha-yɔn kɛ diit, bikɛ tekɛ tɛ̈th lɔaac mi thil pek, bi te ni kɛn kɛ tɛ̈th lɔaac kɛnɛ gɔɔy lɔaac, kä bi jiath lɔaac kɛnɛ pa̱r nɔ̱a̱n kɛ kɛ.

¹² Cu Kuoth Nhial wee i̱, “Ɛ ɣän ɛn nëë buum ji̱, ɛ ji̱n ŋa mɔ duali mɔ kɛ nɛy ti la li̱w, nɛy ti la li̱w ce̱tnikɛ juaac?

¹³ Ɛ ci Kuoth Nhial ni Cääkdu pa̱l ruëëc, mëë cak pua̱a̱r, kä yiɛth wi̱c muɔ̱ɔ̱n piny, kä ji̱n duali ni ciaŋ kɛ kui̱ nɛɛni tin ciaŋkɛ naath ɛ jiäk, min go̱o̱rɛ ɣöö bɛ ji̱ däk? Kä jɛn a nikä ɛn gak nɛɛni tin ciaŋkɛ naath ɛ jiäk?

¹⁴ Kɛn nɛy tin ca yiɛn bakɛ lony ɛ lɔr täämɛ, /cikɛ bi li̱w duëël yieenä, kä /ci mi̱ethdiɛn bi thil.

¹⁵ Kɛ ɣöö ɛ ɣän Kuoth Nhial ni Kuothdu, min cu yier jiɛc ɛ bi muaŋdɛ wuɔ̱w, kä cɔal ciötdɛ i̱ Kuoth Nhial in la Ruey Ɣɔaa.

¹⁶ Ɣän cä ruacdä ka̱m ji̱, kä bä ji̱ gaŋ bi te ti̱pä tetkädä, ɛ ɣän läth pua̱a̱r guäthdɛ mɔ, kä ɛ ɣän yiɛth wi̱c muɔ̱ɔ̱n piny ɔ, kä cua̱ Dha-yɔn jiök i̱, ‘Kɛ yɛn nɛɛkä.’ ”

Thuɔ̱k cucä Jɛ-ru-tha-lɛm

¹⁷ Jiɛc rɔ jiɛc rɔ, jiecni rɔ cuɔ̱ŋ lö Jɛ-ru-tha-lɛm, ji̱n min ci yɔ̱ŋ kɛ gak Kuɔth Nhial, ci Kuoth ji̱ jak kä maathi jɛ amäni nuɔ̱ɔ̱rɛ, ci jɛ liɛli piny kɛɛliw ɛ ria̱th ni ji̱n.

¹⁸ Kä gaatkɛ diaal tin cɛ dap thilɛ ram kɛl mi bi jɛ bo̱th, kɛn gaat diaal tëë cɛ rɔm thilɛ kɛl mi bi tetdɛ käp.

¹⁹ Rik da̱ŋ rɛw ti̱ti̱ bikɛ ben kä ji̱, ba mundu däk ɛ bɛ ria̱r, kä jɛn bɛ tekɛ buɔth kɛnɛ ko̱o̱ri, ɣän bä ji̱ kulɛ bum i̱di? Kä ɛŋa bia kulɛ mat ɔ?

²⁰ Ci gaatku thil lua̱ŋ, te ni kɛn tɔ̱ɔ̱cä gɔŋtɔtni duɔ̱pni, ce̱tkɛ thiäŋ mi ca käp kɛ cambak, cikɛ thia̱a̱ŋ kɛ gak Kuɔth Nhial, cikɛ ŋɛ̈ɛ̈ny Kuɔth jek.

²¹ Kɛ kui̱c ɛmɔ liɛŋɛ nɛm yɛn nɛy tin cuc, yɛn tin ci yɔ̱ŋ mi /ci mɔ a yɔ̱ŋ kɔŋä,

²² Nɛmɛ ɛ min ci Kuäär ni Kuoth ɛ lar, ɛn Kuothdu min la gaŋ nɛɛkɛ wëë i̱, “Nɛnɛ ɣän cä liɛɛr kɔŋä min ci ji̱ jak kä yɔ̱ŋ woc tetkädu, cä jɛ woc ɛn tuɔ̱k gaakdä /ci jɛ bi nyɔk kɛ ma̱th.

²³ Bä la̱th ni jɛ tetni nɛɛni tin gak kɛ ji̱, tin jiökɛ ji̱ i̱, ‘Goŋ rɔ bakɔ ja̱l jɔɔkdu’. Kä curi jɔkdu jak kä ce̱tkɛ piny, cuɛ ce̱tnikɛ duɔ̱ɔ̱p kä kɛ ja̱lkɛ jɛ.”