I-ca-yaa 50 - RUAC KUƆTH IN RƐL RƆ

¹ Kä cu Kuoth Nhial wee i̱, “Warɛgak däkä muɔɔr a nikä, mëë cä jak kä wëë kɛ jɛ? Kiɛ ɛ ŋua̱l in mi̱th mɔ dëë jɛ kök ji̱ mɔ? Kɛ kui̱ dueerikun ca yɛ kɔak, kä kɛ kui̱ jiäkni muɔɔr ca jɛ tuk.

² Ɛŋu thilɛ raan ɔ mëë ba̱kɛ? Kä ɛŋu thilɛ ram mi loc ɣä mɔ mëë cä ciöt? Ɛ ku tetdä ciak a /cä yɛ dëë luɛl? Kiɛ thilɛ ɣä buɔ̱m mi dëë luäk ni yɛ? Kä nɛnɛ cua̱ bar ko̱t kɛ riet, kä cua̱ kiɛr jak kä dɔr rɛ̈w, cu rɛckiɛn ŋuɔ̱th kɛ thil pi̱i̱ni, kä cu rɛwkɛ cu näk.

³ Cä pua̱a̱r kum kɛ muth, kä cua̱ cuali jak kä kuumdiɛn.”

Luth jäŋä Kuɔth Nhial

⁴ Ci Kuoth Nhial ɣä ka̱m lɛp ŋi̱i̱cä nath, kɛ ɣöö dëë riet in dëë ram mi cuc jak kä bum ŋa̱c. La ɣä a keerɛ kɛ runwaŋ, la ɣä a jak kä liɛŋä ruac ce̱tnikɛ ram mi ŋi̱eeckɛ.

⁵ Ci Kuäär ni Kuoth ji̱thkä lɛp, ɛ /ka̱n rɔ lɛ luɔ̱c jɛ, /ka̱n rɔ ri̱t kɔɔrɛ.

⁶ Cä riet ni jɔkdä nɛy tin dua̱ckɛ ɣä, kä cä jio̱mdä ka̱m nɛy tin thötkɛ mi̱em ti̱ek, ɣän /ka̱n nhiamdä tɛ̱̈ɛ̱̈ kä ɣöö ba ɣä yɔŋ kɛnɛ ɣöö ba ŋul ruɛy.

⁷ Kɛ ɣöö ci Kuäär ni Kuoth ɣä luäk, kɛ kui̱c ɛmɔ ɣän /cä bi pöc, kä kɛ kui̱c ɛmɔ cä wi̱cdä kap ni nhial, ɣän ŋa̱cä jɛ /ca ɣä bi jak kä po̱c,

⁸ ram in lat cuɔ̱ɔ̱ŋdä thia̱kɛ. Tëëkɛ ram mi bi ɣä gɔny? Wanɛ rɛy luɔ̱k kɛɛl. Ɛŋa la gua̱n go̱o̱nyädä mɔ? A jɛ bëë ben lat kɛ ɣä.

⁹ Nɛnɛ jɛ, Kuäär ni Kuoth cɛ ɣä luäk. Ɛŋa bi jɛ lat ɔ ta̱a̱ kɛ duer? Nɛnɛ, bi kɛn diaal da̱k ce̱tnikɛ bi̱i̱, bi lɔa̱a̱t kɛ cam nhial.

¹⁰ Ɛŋa rɛydun luth Kuoth Nhial ɔ mɔ dëë jɔw jäŋädɛ liŋ ɔ, ram ɔ jäl rɛy muɔ̱th mi thil buay ɔ, kä ci ŋa̱thdɛ la̱th kä Kuoth Nhial ɔ mɔ ci rɔ thieŋ Kuothdɛ mɔ?

¹¹ Kä yɛn nɛy tɔ̱ la̱tkɛ ca̱a̱p, kɛ ɣöö bia nɛy tin kɔ̱ŋ däk tɔ̱, ba yɛ däk ɛ ca̱a̱pkun. Kuoth Nhial puɔ̱nydɛ bɛ mɛmɛ jakä tuɔɔk, bia cuuc rɛy däkä mi bɛc bɛc.