I-ca-yaa 5 - RUAC KUƆTH IN RƐL RƆ

Dit kakä wal kɛ kui̱ kɔaŋ

¹ Ɣän bä dit kɛt kɛ gua̱a̱th mäthdä, dit kɛ kui̱ kakä walkɛ kɛ kui̱ kɔaŋ. Määthdä tëë kɛ kak wal kɛ kui̱ kɔaŋ wi̱i̱ pa̱a̱m mi tekɛ mun mi gɔaa.

² Cɛ jɛ kuac a cɛ päämkɛ woc, kä cɛ jɛ pith kɛ buɔ̱cni ti gɔw. Kä cɛ jɛ ta̱th duel thuɔɔp ga̱ŋ rɛydɛ, kä cɛ jɛ tët pul puɔ̱ɔ̱ny pa̱a̱m kɛ kui̱ kɔŋä. Jɛn liipɛ ni dɛy ti gɔw thi̱n, duundɛ ɣöö cɛ kuir ni dɛy ti jiäk.

³ Kä täämɛ cu määthdä wee i̱, “Lö ji̱ Jɛ-ru-tha-lɛm kɛ yɛn ji̱ Juda, luɔ̱kɛ kɔ kɔnɛ kak walkä kɛ kui̱ kɔaŋ.

⁴ Ɛŋu mi dɔ̱ŋ mi dëë lät kä kak walkä kɛ kui̱ kɔaŋ, mi /ka̱n la̱t thi̱n? Kä ɛŋu cɛ kuir ni dɛy ti jiäk ɔ a /ci mɔ a dɛy ti gɔw tin liɛɛpä?

⁵ “Ɛn täämɛ ɣän bä yɛ la̱r min bä lät kä kak walkä kɛ kui̱ kɔaŋ. Ɣän bä nälɛ woc, kä bɛ cu wä juɔl. Kä bä wecdɛ däk, kä ba jɛ dɔany kɛ ciök.

⁶ Ɣän bä jɛ jak kä dɔr, /ca jɛ bi pur kiɛ /ca bi pith, bi piith ni wa̱th kɛnɛ kuiy thi̱n. Kä bä pua̱r jiök ɛn ɣöö /cɛ kak ɛmɔ bi demikä.”

⁷ Kä ɛn kak wal kɛ kui̱ kɔaŋ Kuɔth Nhial in la Ruey Ɣɔaa ɛmɔ, ɛ dhɔr ji̱ I-thɛ-rɛl. Kä ji̱ Juda kɛ dɛy jiɛn tin gɔw tin cɛ pith. Kä jɛn guicɛ ni thuɔ̱k thi̱n, duundɛ ɣöö cuɛ nɛn ni näk nath. Kä derɛ jek ni cuɔ̱ɔ̱ŋ thi̱n, cuɛ kulɛ liŋ ni lul.

Rik Gua̱n nyuɔɔni

⁸ Riɛk akɛ yɛn nɛy tin mat raan ciëŋ cieŋ in dɔ̱ŋ, kä mat raan kak kä kak in dɔ̱ŋ, amäni mi /cɛ thil gua̱a̱th mi lɔr, ɛ cieŋ ni ji̱n kä rɔa muun.

⁹ Ci Kuoth Nhial in la Ruey Ɣɔaa rɔ yac a liɛŋä wëë i̱, “Bi duël ti ŋuan te lɔrä, kɛn ti̱ec tin di̱t kä gɔw, bikɛ thil nɛy ti cieŋ thi̱n.

¹⁰ Bi kak wal kɛ kui̱ kɔaŋ nööŋ ni liɛɛr kɔŋä, kä bi kuay pi̱thä ti te rɛy cuaalä nööŋ ni dieny.”

¹¹ Riɛk akɛ nɛy tin la ker kɛ runwaŋ, kɛ ɣöö bikɛ wä maath kɔŋä, nɛy tin la jin amäni wäär amäni mi cikɛ yɔ̱ŋ kɛ kɔaŋ!

¹² La kɛn buɔ̱l kɛnɛ thom kɛ yikyikni, a puɔ̱ɔ̱t guäth mi̱eth kɛnɛ kɔaŋ, duundɛ ɣöö /ca lät Kuɔth Nhial car, thilɛ kɛ luth kɛ lät tetni Kuɔth.

¹³ Kɛ kui̱c ɛmɔ ba nɛɛ Kuɔth naŋ ɛla pɛ̈ɛ̈c kɛ kui̱c ŋɔaani, kä bi nɛɛkun tin luɔ̱thkɛ li̱w kɛ buɔth, kä bi nɛy tin duɛ̈ɛ̈k li̱w kɛ rɛw.

¹⁴ Inɔ bi ro̱l jɔɔkni buɔthɛ näk, kä bɛ thokdɛ lëp ɣööŋ ɛlɔ̱ŋ, kä bɛ ji̱ luthä kä Jɛ-ru-tha-lɛm kɛnɛ buɔ̱n nɛɛni tin duɛ̈ɛ̈k naŋ piny.

¹⁵ Ba nɛy tin luɔ̱thkɛ kɛnɛ nɛy tin duɛ̈ɛ̈k luɔc piny, kä ba ji̱ liakä luɔc piny.

¹⁶ Duundɛ ɣöö ba Kuoth Nhial in la Ruey Ɣɔaa liak kɛ cuŋ, bi Kuoth in Rɛl gɔɔydɛ rɔ, rɔ nyoth ɛn ɣöö rɛl gɔɔydɛ rɔ kɛ cuŋ.

¹⁷ Rɛy wec in ci da̱k bi dët laak thi̱n, kä ba gua̱a̱th la̱t rueethni deet.

¹⁸ Riɛk akɛ nɛy tin buathkɛ duer kɛ rɔk kacä, yɔ̱a̱ckɛ jiäk kɛ rɔk ce̱tkɛ thurbil,

¹⁹ tin la wee i̱, “Ɛ Kuoth pɛ̈th, a jɛ pɛth la̱tdɛ, kɛ ɣöö dɔ̱ŋ dëëkɔ jɛ nɛn. Ɛ cär Kuɔth I-thɛ-rɛl in rɛl gɔɔydɛ rɔ mal ben, a jɛ bëë kɛ ɣöö bakɔ jɛ nɛn!”

²⁰ Riɛk akɛ nɛy tin cɔalkɛ mi jiääk i̱ mi gɔaa, kä cɔalkɛ mi gɔaa i̱ mi jiääk, tin la̱thkɛ muth guäth buɔyä kä la̱thkɛ buay guäth muɔ̱th, tin la̱thkɛ mi kɛc guäth kä mi lim kä läthkɛ mi lim guäth kä mi kɛc!

²¹ Riɛk akɛ nɛy tin guɛckɛ rɔ̱ i̱ pɛl, tin carkɛ jɛ i̱ ŋa̱ckɛ ŋɔak.

²² Riɛk akɛ nɛy tin ɛ kɛn i̱ bum kɛ ma̱th kɔŋä, tin ɛ kɛn i̱ kɛ wäth ma̱th kɔaŋ in ca̱r,

²³ tin la pa̱lkɛ gua̱n dui̱rä kɛ kök, tin la pënkɛ can cuŋkiɛn!

²⁴ Bikɛ da̱k ce̱tkɛ min la mac jil ɛ waaŋ, ce̱tnikɛ min la juaac a pɛt kɛ bo̱l, kä bi thärkiɛn cu dhiap, kä bi gaaknikiɛn cua̱ ŋɛ̈th, kɛ ɣöö /ca ŋuɔ̱t Kuɔth Nhial in la Ruey Ɣɔaa lo̱k, kä /ca ruac Kuɔth I-thɛ-rɛl ba̱ny piny.

²⁵ Kɛ kui̱c ɛmɔ ci kɛ̈c Kuɔth Nhial ben kä nɛɛkɛ, kä cuɛ kɛ näk kɛ tetdɛ min bum, kä cuɛ pääm lath, kä cu ri̱ŋkiɛn te rɛy duɔ̱pni ce̱tnikɛ di̱r jiäkni. Kɛ kui̱ kä nɛmɛ /ci gakdɛ bi loc jɔk, kä bɛ ŋot kɛ mi duääcɛ naath.

²⁶ Bi Kuoth nyuuth ŋun kɛ kui̱ dööri ti nɔ̱a̱n, kä bɛ nɛy tin te peek ɣɔaa kuɔ̱th pa̱pa̱a̱r, kä bikɛ ben kɛ pɛ̈th mi di̱i̱t.

²⁷ Cuɛ thil ram kɛl mi cu cuuc kä kɛ kä cu tɛɛth, kä cuɛ thil ram mi cu dɔ̱ɔ̱l kiɛ cu niɛɛn, kä cuɛ thil la̱a̱k lɛtdä mi cua woc, kä cuɛ thil war mi cu puɔ̱t,

²⁸ kä moth bäärikiɛn, kä ca bäärikiɛn rialikä, kä bum rio̱p jiöŋköörikiɛn ce̱tnikɛ yiëth, kä ce̱t ciök thurbiɛɛlikiɛn nikɛ ruɔth.

²⁹ Kä ce̱t luliɛn nikɛ lul luɔny, bur kɛn ce̱tnikɛ ruath luɔny. Kä muɔckɛ rɔ ka̱a̱th mi bankɛ pɛ̈ɛ̈c, la kɛn kɛ cua̱ naŋ ɛ thilɛ ram mi luäkɛ.

³⁰ Kä bikɛ wuɔ̱w wi̱i̱dɛ ɛn cäŋ ɛmɔ, ce̱tnikɛ wuɔ̱w pi̱i̱ni baar. Kä mi ci raan mun guic, derɛ nɛn ni muth kɛnɛ da̱k, ɛ cäŋɛ ni buay bi pua̱a̱r jɛ jak kä muth.