I-ca-yaa 49 - RUAC KUƆTH IN RƐL RƆ

Bi ja̱ŋ Kuɔth Nhial a buay dööri

¹ Liɛŋɛ ɣä lö yɛn ji̱ dhuɔ̱li, kä lieŋɛ lö yɛn nɛy tin nɔ̱a̱n. Ci Kuoth Nhial ɣä cɔl ɛ /ka̱n ɣä ni dap, Cuɛ ciötdä cak ɛ ta̱a̱ ni jic maar.

² Cuɛ thokdä jak kä moth ce̱tnikɛ thɛp, kä cɛ ɣä tɛ̱̈ɛ̱̈ ni rɛy ti̱pädɛ, cuɛ ɣä jak kä ce̱tnikɛ dɔw kui̱n kui̱i̱n, cuɛ ɣä la̱th ni rɛy go̱kädɛ.

³ Kä cuɛ ɣä jiök i̱, “Ɛ ji̱n ja̱ŋdä, kɛ I-thɛ-rɛl ba ɣä liak kɛ jɛ.”

⁴ Duundɛ ɣöö cua̱ wee i̱, “Ɣän cä lät ni baaŋ, cä buɔ̱mdä thuk ni baaŋ a thil luɔt, kä ŋotdɛ te cuŋkä nikɛ Kuoth Nhial, ɛn min cuɔ̱lkɛ ɣä tëë nikɛ Kuothdä.”

⁵ Kä cu Kuoth Nhial ɣä cak ni ji̱, kɛ ɣöö bi ɣän a ja̱ŋdɛ kɛ ɣöö bä I-thɛ-rɛl luɔ̱c jɛ, kɛ ɣöö bi kɛn a nɛɛkɛ. Kɛ kui̱c ɛmɔ ta̱a̱ kɛ luth waaŋ Kuɔth Nhial, kä ɛn Kuothdä ɛ jɛn la buɔ̱mdä mɔ.

⁶ Kä cu Kuäärä wee i̱, “Kuiyɛ ɛlɔ̱ŋ kɛ ɣöö bi ji̱n a ja̱ŋdä, kɛ ɣöö bi thuk duëli Je-kɔb jiac nhial, kä bi ji̱ I-thɛ-rɛl tin tëk luɔ̱c jɔk. Ɣän bä ji̱ jak kä buay kä döör, dɔ̱ŋ bi ka̱ndä naŋ pekni ɣɔaa diaal.”

⁷ Kä nɛmɛ ɛ min ci Kuoth Nhial ɛ lar, ɛn min la Lueel kä Kuoth I-thɛ-rɛl in rɛy gɔɔydɛ rɔ, lätdɛ jɛ ram in ca nyir ɛlɔ̱ŋ kä ca lo̱k ɛ döör, ɛn ja̱ŋ ruëëcni wëë i̱, “Bi kua̱r ji̱ nɛn kä bikɛ rɔ̱ jiɛc, ruëëc bikɛ ji̱ nɛn kä bikɛ rɔ̱ goŋ, kɛ kui̱ Kuɔth Nhial in gɔaa, ni Kuoth I-thɛ-rɛl in rɛy gɔɔydɛ rɔ in ci ji̱ mɛk.”

Luuc Jɛ-ru-tha-lɛm jɔk

⁸ Kä cu Kuoth Nhial wee i̱, “Kɛ gua̱a̱th gɔɔyädä bä ji̱ loc, kɛ cäŋ känädä bä ji̱ luäk, ɣän bä ji̱ tit kä bä ji̱ jak kä mat ruac kɛ naath, kä bia mun nyɔk kɛ lätni, ɛn mundun ɛ te baaŋɛ,

⁹ bä ji̱ yieenä jiök i̱, ‘Bia raar,’ kä bä nɛy tin cieŋ rɛy muɔ̱th jiök i̱, ‘Bia rɛy buɔyä.’ Bikɛ laak gëëkni duɔ̱pni, pääm diaal tin car caar ba gua̱a̱th la̱kdiɛn.

¹⁰ /Ci buɔth kɛ bi näk kiɛ rɛw, kä /ci cäŋ kɛnɛ jiɔam in leth kɛ bi näk, kɛ ɣöö bi ram in nhɔkɛ kɛ bo̱th, bɛ kɛ bo̱th kɛ gëëk pi̱i̱ni.

¹¹ Ɣän bä päämkä diaal jak kä duɔ̱ɔ̱p, kä bä dupkä tin di̱t rialikä.

¹² Kä nɛnɛ, bikɛ ben ni guäth mi na̱n, bikɛ ben kui̱c caam kɛnɛ kui̱c konyä ca̱ŋ, kä bi tin kɔ̱ŋ ben kä Ath-wan.”

¹³ Rɔali kɛ tɛ̈th lɔaac lö pua̱a̱r, kä lat liak lö piny, kä kɛ̈tdɛ diit lö pääm! Kɛ ɣöö ci Kuoth Nhial nɛɛkɛ bum, kä bɛ tekɛ kɔ̱a̱c lɔaac kɛ nɛɛkɛ tin ci cuuc.

¹⁴ Duundɛ ɣöö cu Dha-yɔn wee i̱, “Ci Kuoth Nhial ɣä pa̱l ruëëc, ci Kuäärä ɣä pa̱l jɔ̱ɔ̱r.”

¹⁵ Kä cu Kuoth Nhial ɛ loc i̱, “Ɛ dëë ciek gatdɛ mi lueth ku pa̱l ruëëc, a bɛ thil nhök kɛ gat mi cɛ dap? A cäŋ mi derɛ jɛ pa̱l ruëëc, ɣän cä yɛ bi pa̱l ruëëc.

¹⁶ Kä nɛnɛ, ɣän cä ciötdu gɔ̱a̱r tetnikä, ɣän guɛcä pänydu nhiamdä lö Jɛ-ru-tha-lɛm.

¹⁷ Gaatku a bëëni kɛ pɛ̈th, kä nɛy tin da̱kɛ ji̱ ba̱nykɛ ji̱ piny.

¹⁸ Kapni waŋdu nhial kä gui̱cni, ci gaatku diaal rɔ̱ mat kä bäkɛ kä ji̱. Kɛ thuɔ̱k ce̱tnikɛ tëkdä ɣän Kuoth Nhial, kɛn gaatku bi rɔ liak kɛ kɛ, ce̱tnikɛ kaw mi liak rɔ kɛ tiɛk ŋua̱a̱k.

¹⁹ “A cäŋ ni mɔ ca ji̱ däk ɔ kä ca ji̱ päl baaŋ, kä ca wecdu da̱k piny, kä bi kuɛ̈ɛ̈ täämɛ kä nɛɛku, kä nɛy tin ca ji̱ bät bikɛ nɔ̱a̱n ɛlɔ̱ŋ.

²⁰ Bi gaatku tëë dapkɛ pɛɛcä bikɛ ŋot kɛ mi ruackɛ a liŋi wäkɛ i̱, ‘Ɛn gua̱a̱th ɛmɛ kuiyɛ kɛ kɔ, moc nɛy kɛ gua̱a̱th mi ciëŋkɔ thi̱n.’

²¹ Kä bi ruac kɛ lɔcdu wi̱i̱ i̱, ‘Ɛŋa däp ɣä nɛy ti̱ti̱ ɔ? Ɣän thilɛ ɣä gaat ɛ ɣän rol, ca ɣä pɛc ɛ ca ɣä lo̱k, kuɛ la ŋa rɔm kɛn nɛy ti̱ti̱ ɔ? Nɛnɛ, ɣän cä duɔth kärɔa, kukɛ lɛ ben nikä kɛn nɛy ti̱ti̱?’ ”

²² Kä cu Kuoth Nhial ni Kuoth wee i̱, “Nɛnɛ, ɣän bä tetkä kap nhial kä döör, ɣän bä nyuuth thöp naath, bikɛ dhɔɔlku nööŋ kɛ bapdiɛn, kä bikɛ nyieeku kap kɛ wuɔ̱ɔ̱kiɛn.

²³ Kua̱r bikɛ la ro̱o̱m gankun, kä bi mänkiɛn kɛn kua̱r a röömkun. Kä bikɛ rɔ̱ goŋ kɛ yɛ a yiathkɛ nhiamdiɛn piny, kä bikɛ bɛ̈l ni tup ciöknikun. Kä bia jɛ ku ŋa̱c ɛn ɣöö ɛ ɣän Kuoth Nhial, kä nɛy tin ca ŋa̱thdiɛn la̱th kä ɣä /cakɛ bi jak kä po̱c.”

²⁴ Ɛ deri ti ca pɛc ku ka̱n kä ran rɛ̈m, kiɛ deri nɛy ti ca käp luäk kä ram mi ci naath joc?

²⁵ Kɛ thuɔ̱k cu Kuoth Nhial wee i̱, “Ba nɛy tin ca pɛc ɛ wääth ka̱n. Kä ba tin ca pɛc luäk kä ram in ci naath joc, ɣän bä nyiëëny kɛ nɛy tin nyieenykɛ yɛ, ɣän bä gaatkun kän.

²⁶ Ɣän bä nɛy tin ciaŋkɛ yɛ ɛ jiäk jak kä camkɛ ni ri̱ŋdiɛn, kä bikɛ math ni riɛmdiɛn ce̱tnikɛ kɔaŋ. Kä ba jɛ cu ŋa̱c ɛ nɛy diaal ɛn ɣöö ɛ ɣän Kuoth Nhial min la Käändu, min la Lueelu ni Kuoth Je-kɔb.”