I-ca-yaa 47 - RUAC KUƆTH IN RƐL RƆ

Ciaaŋ Bɛ̈-bi-lɔn ɛ jiäk

¹ Bër piny nyuuri rɛy tupä, lö jut nyaal Bɛ̈-bi-lɔn! Nyuuri piny a thil kɔm kuäärä, lö jut nyaal Kɛ̈l-da-ya! Kɛ ɣöö /ca ji̱ bi nyɔk kɛ ciöt i̱, mi puɔth kiɛ mi tekɛ maan.

² Käni pil kä guär kuän, woc bi̱i̱ wecdu, woc yietdu a ciöku jɔc, wër jiɛth ni kiɛr.

³ Ba ta̱a̱ juutädu nyoth, ɛ ba buaru nɛn. Ɣän bä rɔ col, thilɛ ram mi bä päl.

⁴ Ɛn Käända, cɔalkɛ ciötdɛ Kuoth Nhial in la Ruey Ɣɔaa, ɛ jɛn Kɛl I-thɛ-rɛl in Rɛl Gɔɔydɛ rɔ.

⁵ Nyuuri bitdä, kä wër rɛy muɔ̱th, lö jut nyaal Kɛ̈l-da-ya! Kɛ ɣöö /ca ji̱ bi nyɔk kɛ ciöt i̱ kuäär ciëk kuääri.

⁶ Ɣän cä gaak kɛ nɛɛkä ɛn nëë, ɣän cä tin la nyinkä lo̱k, cä kɛ la̱th ni tetkädu, kä /keni tekɛ kɔ̱a̱c lɔaac kɛ kɛ, cu mäni nɛy ti di̱t curi kɛ moc la̱t mi thiɛk thiɛk.

⁷ Curi wee i̱, “Bi ɣän a kuäär ciëk amäni cäŋ kɛl,” duundɛ ɣöö /keni ti̱ti̱ la̱th lɔɔcdu kiɛ /keni guutdiɛn car.

⁸ Täämɛ liɛŋɛ nɛmɛ lö nhöök gɔyni, yɛn nɛy tin nyuur malä, yɛn tin ruac kɛ lo̱ckun i̱, “Ɛ ɣän thilɛ ram mi dɔ̱ŋ, ɣän /cä bia̱ ciek jɔkä, kiɛ bä cuuc kɛ thil gan.”

⁹ Kɛn rɛw ti̱ti̱ bikɛ ben kä ji̱ kɛ gua̱a̱th mi tɔt kɛ cäŋ kɛl, bi gaatku bath kä bi ji̱n a ciek jɔkä, kɛn bikɛ tuɔɔk kä ji̱ kɛn da̱ŋ rɛw, a cäŋ ni mɔ ti̱i̱ kɛ ti̱t ti ŋuan ɔ kä ti̱i̱ kɛ wal ti buɔ̱m buɔ̱ɔ̱m.

¹⁰ Ji̱n ŋääthi ni jiäku, ɛ la wi̱i̱ i̱, “Thilɛ ram mi nɛɛn ɣä.” Ci pɛlu kɛnɛ ŋäc ŋɔaanidu ji̱ bath, kä ji̱n ruaci kɛ lɔcdu wi̱i̱ i̱, “Ɛ ɣän thilɛ ram mi dɔ̱ŋ.”

¹¹ Duundɛ ɣöö bi jiäk ben kä ji̱, kä /ciɛ bi ŋa̱c ɛn duɔ̱ɔ̱p in bi käp ni jɛ cuɔ̱ŋ, kä bi da̱k ben kä ji̱, mi /ci bi luäŋ kɛ gaŋ jɔ̱ɔ̱r, bi da̱k ji̱ pärikä kɛ pɛ̈th, mi /ci bendɛ bi met ŋa̱c.

¹² Teni rɛy kuthniku kɛnɛ rɛy ti̱tniku tin ŋuan tëë lätdi ni mëë ɛ ji̱n ŋuɛ̈t, dɔ̱ŋ bɛ rɔ luɔ̱t ji̱, dɔ̱ŋ bi naath jak kä dual.

¹³ Ci cuuc kɛ ruaacni diaal tin ci jek, a nɛy tin ŋa̱ckɛ nyin nhial ka̱nkɛ ji̱, nɛy tin la guɛckɛ ni dääk nhial, tin la guɛckɛ ni ciɛr, tin la markɛ mɔ bi tuɔɔk ɔ kä ji̱ kɛ tëth path.

¹⁴ Nɛnɛ bikɛ ce̱tnikɛ jil, bi mackɛ waŋ, /ca rɔ̱ dëë luäŋ kɛ ka̱n kä bo̱l maac mi di̱i̱t. /Cɛ bi ce̱tkɛ mac miim mi dëë ɣɔ̱c ni raan kɛ jɛ, thilɛ mac mi ca kɔŋ dɔp ce̱tkɛ jɛ!

¹⁵ Ɛ jɛn ta̱a̱ in bi tekɛ nɛy tëë lät kɛɛl kɛ ji̱, nɛy tëë ja̱lɛ kɛɛl ni mëë kɛ yɛn ŋuɛ̈tni, bi ram ɔ wä wi̱el nikɛ duɔ̱ɔ̱pdɛ, thilɛ ram mi bi ji̱ kän.