I-ca-yaa 46 - RUAC KUƆTH IN RƐL RƆ

¹ Nɛmɛ ɛ jɛn thuɔ̱k kuthni ji̱ Bɛ̈-bi-lɔn, kuoth Bɛl kɛnɛ Nɛbo tëë la palkɛ. Ɛn täämɛ kapkɛ kɛ ɛ muɔ̱li, ala ti thiak thiaak ti cuɔ̱ckɛ ley.

² Kɛn kuth tɔ̱tɔ̱ bikɛ tɛɛth kɛɛl, kä /ci kɛn riɛk dëë luäk, kɛn pua̱nykiɛn bakɛ naŋ ala pɛ̈ɛ̈c.

³ “Liɛŋɛ ɣä lö dhɔr Je-kɔb, yɛn duɔth dhɔaar I-thɛ-rɛl tin tëk, yɛn nɛy tëë kapä ni mëë dapkɛ yɛ, cä yɛ rɔm ni jic,

⁴ amäni mɔ bi dɔŋ ɔ, bɛ ŋot ɛ ɣän, amäni mɔ bi wi̱cdu buay ɔ, bä ji̱ kap. Ɣän cä ji̱ cak kä bä ji̱ tit, bä ji̱ rɔm kä bä ji̱ kän.

⁵ “Ɛŋa mi bia ca̱a̱t kɛ ɣä kiɛ bia pa̱a̱r kɛ ɣä, mi dërɛ pa̱a̱r kɛ ɣä ɛ bakɔ ca̱a̱t?

⁶ Kɛ nɛy tin ka̱mkɛ da̱a̱p raar kä göökiɛn, nɛy tin thɛ̈mkɛ ciɛk in bo̱r kɛ theem, tin la kɔakɛ tääth dääpä min bi jɛ wä tääth ni kuoth, kä bikɛ rɔ̱ cu goŋ palkɛ jɛ!

⁷ Kä bikɛ jɛ kap kɛ wuɔ̱ɔ̱kiɛn, kä bikɛ jɛ la̱th guäthdɛ, kä bɛ cu te cuŋä ɛn wi̱ni, kä /cɛ dëë met jiɛɛn ɛn guäth ɛmɔ. Kä mi ci raan pal nhiamdɛ, /cɛ jɛ dëë loc kiɛ luäk kä riɛkdɛ.

⁸ “Tim nɛmɛ kä läthni jɛ wi̱i̱du, carɛ kɛ wi̱cdu lö gua̱n dueeri,

⁹ tim ŋɔak tëë kɔn, kɛ ɣöö ɛ ɣän Kuoth thilɛ Kuoth mi dɔ̱ŋ, ɛ ɣän Kuoth kä thilɛ mi cäätkɛ ɣä.

¹⁰ Ɣän cä guut lat ni tukädɛ, ni wal cä ti /ken ni tuɔɔk lat, wa̱a̱ i̱, ‘Cärkä bikɛ te ni thi̱n, kä bä tin diaal tin luɔtdä la̱t.’

¹¹ Ɣän bä raan cɔl kui̱ känyä ca̱ŋ, ram mi bi ben ni muun mi nɔ̱a̱n, kɛ ɣöö bɛ cärkä ben la̱t. Ɛn min cä lat, bä jɛ jak kä tuɔɔk, min cä car, bä la̱t ni jɛ.

¹² “Liɛŋɛ ɣä yɛn nɛy tin bum lo̱ckiɛn, yɛn nɛy ti nɔ̱a̱n kɛ cuɔ̱ɔ̱ŋ.

¹³ Ɣän cä cuɔ̱ɔ̱ŋdä nööŋ ni thiäkä, jɛn /cɛ nɔ̱a̱n ɛlɔ̱ŋ, kä /ci ka̱ndä bi jääny. Ɣän bä Dha-yɔn kän, kä bä liakdä ka̱m I-thɛ-rɛl.”