I-ca-yaa 45 - RUAC KUƆTH IN RƐL RƆ

Mëk Kuɔth kɛ Ko-rɛc

¹ Nɛmɛ ɛ min ci Kuoth Nhial ɛ la̱r raandɛ min cɛ mɛk, min la̱tdä Ko-rɛc in rɔamä tet cuëëcdɛ, bä döör jak kä kuaany nhiamdɛ. Bɛ buɔ̱m kua̱ri woc kä kɛ, kä bä jɛ lëp thuk duëli, kɛ ɣöö bɛ cu thil mi te gääkä.

² Ɣän bä wä nhiamdu, bä pääm wä jak kä car caar, kä bä thiekni yieethä min do̱l töl ni thuɔɔnyni, kä bä do̱o̱pni yieethä ŋuɔ̱k.

³ Kä bä ji̱ moc ria̱ŋ rɛy muɔ̱th ria̱ŋ mi ca tɔ̱w ni guäth mi kueckɛ, dɔ̱ŋ bi jɛ ŋa̱c ɛn ɣöö ɛ ɣän Kuoth Nhial, ni Kuoth I-thɛ-rɛl min cɔɔl ji̱ kɛ ciötdu.

⁴ Kɛ kui̱ jäŋädä ni Je-kɔb, ɛn I-thɛ-rɛl in cä mɛk, cä ji̱ cɔl ni cio̱tkädu, cä ji̱ ka̱m luth mi di̱i̱t cäŋ ni mɔ /ci ɣä ŋäc ɔ.

⁵ Ɛ ɣän Kuoth Nhial, thilɛ mi dɔ̱ŋ, thilɛ kuoth mi dɔ̱ŋ mi /ci mɔ a ɣän. Ɣän bä ji̱ moc kɛ buɔ̱m cäŋ ni mɔ kui̱ci ɣä mɔ,

⁶ dɔ̱ŋ ba jɛ ŋa̱c ɛ ji̱ känyä ca̱ŋ, kɛnɛ ji̱ konyä ca̱ŋ ɛn ɣöö thilɛ Kuoth mi dɔ̱ŋ ɛ ni ɣän, ɛ ɣän Kuoth Nhial thilɛ Kuoth mi dɔ̱ŋ.

⁷ Ɛ ɣän no̱o̱ŋ buay ɔ kä ɛ ɣän cak muth ɔ, ɛ ɣän no̱o̱ŋ puɔ̱th ɔ kä ɛ ɣän cak da̱k ɔ, ɛ ɣän Kuoth Nhial lät kɛn ti diaal ti̱ti̱ ɔ.

⁸ “Dɛmni lö pua̱a̱r ɛ te nhial ɔ, a nhial dɛm kɛ nhiaal cuŋni, a piny lep rɔ ɣööŋ, dɔ̱ŋ bi ka̱n ben nhial, kä a cuŋ do̱ny thi̱n bä, ɛ ɣän Kuoth Nhial cak jɛ mɔ.”

Kuäär Cäkä kɛnɛ Caal

⁹ Riɛk akɛ ram in gak kɛ Cääkdɛ, riɛk akɛ mun in gak kɛ tääthdɛ! La mun ram in tääth jɛ a thieec i̱, “Ɛŋu lätdi mɔ?” kiɛ derɛ wee i̱, “Ji̱n kui̱ci la̱t agɔaa”?

¹⁰ Riɛk akɛ ram ɔ bi gua̱n jiök ɔ i̱, “Ɛŋu ci ɣä cak ɔ?” Kiɛ bɛ man jiök i̱, “Ɛŋu daapi ɣä mɔ?”

¹¹ Kä cu Kuoth Nhial nɛmɛ lar ɛn Kuoth I-thɛ-rɛl kä Cääkdɛ wëë i̱, “A bi yɛn ɣä ku thiec kɛ kui̱ gankä, kiɛ bia ɣä la̱r min dëë la̱t?

¹² Ɛ ɣän ɛn nin lät piny, kä ɛ ɣän cak raan thi̱n ɔ, kä ɛ ɣän lät pua̱a̱rɔ kɛ tetdä, kä ɛ ɣän lät tin te thi̱n ɔ.

¹³ Ɣän bä Ko-rɛc jak kä lät ni cuŋ, kä bä dupkɛ diaal jak kä cuŋ. Kä jɛn bɛ wecdä la̱t, kä bɛ nɛɛkä tin ca pɛc lony ɛ lɔr, /cɛ kɛ bi lony kɛ kök kiɛ tho̱p duɔ̱ɔ̱rä, ruac ni ɣän Kuoth Nhial in la Ruey Ɣɔaa.”

¹⁴ Cu Kuoth Nhial wee i̱, “Bi ria̱ŋ I-jëp kɛnɛ kuak Kuc a nyinku, kä bi ji̱ Thɛba tin ba̱r ba̱a̱r a kuaanyku, kɛn bikɛ ben kä ji̱ ala nyinku, ba ji̱ guɔ̱ɔ̱r ɛ kɛn, bikɛ ben a te ciökiɛn kɛ kuatni ba ji̱ ben goŋ. Ba ji̱ ben lip ɛ kɛn wäkɛ i̱, ‘Kuoth tëë kɛ ji̱n kärɔa, thilɛ Kuoth mi dɔ̱ŋ, thilɛ Kuoth mi dɔ̱ŋ mi /ci mɔ a jɛn.’ ”

¹⁵ Kɛ thuɔ̱k ɛ ji̱n Kuoth kä Kään I-thɛ-rɛl, ɛ ji̱n Kuoth mi la rɔ a teey.

¹⁶ Nɛy diaal tin la̱tkɛ kuth jiɛn, bakɛ jak kä po̱c kä bikɛ tekɛ buar, bi kɛn diaal tekɛ buar kɛɛl.

¹⁷ Duundɛ ɣöö ca I-thɛ-rɛl kän ɛ Kuoth Nhial kɛ ka̱n mi thil pek, kä /ca ji̱ bi moc kɛ pöc kiɛ buar amäni cäŋ kɛl.

¹⁸ Cu Kuoth Nhial in cak pua̱a̱r, jɛn min la Kuoth, min ci piny la̱t kä cɛ jɛ täth, /kenɛ jɛ cak kɛ ɣöö bɛ te baaŋ, cɛ jɛ la̱t kɛ ɣöö ba jɛ ciɛŋ wee i̱, “Ɛ ɣän Kuoth Nhial thilɛ Kuoth mi dɔ̱ŋ.

¹⁹ /Ka̱n ruac guäth mi kueckɛ, /ka̱n ruacdä lat rɛy muɔ̱th, ɣän /ka̱n kuay Je-kɔb jiök i̱, ‘Go̱rɛ ɣä dɛɛkä baaŋ.’ Ɣän Kuoth Nhial latdä ni thuɔ̱k, ɣän latdä ni min la cuɔ̱ɔ̱ŋ.”

Kuth jiɛn /ca Bɛ̈-bi-lɔn bi kän

²⁰ Matdɛ rɔ̱ kä bia kɛɛl, bia thiäkä yɛn tin ŋot kɛ tëk rɛy dööri! Kä nɛy tin kapkɛ kuth jiɛn kueckɛ min lät kɛn ɛ, palkɛ kuoth mi /cikɛ dëë luäk.

²¹ Bia latdɛ ruacdun guäth luɔ̱k, akɛ ca̱a̱tkɛ ruac kɛɛl! Ɛŋa mi ci ti̱ti̱ lat ni wal? Ɛŋa mi ci jɛ lat mëëdan? /Ciɛ ɣän Kuoth Nhial ɛ nëë lat kɛ? Kä thilɛ Kuoth mi dɔ̱ŋ mi /ci mɔ a ɣän, ɛ ɣän Kuoth cuŋni kä kään, thilɛ Kuoth mi dɔ̱ŋ ɛ ni ɣän.

²² Luɔ̱nyɛ kä ɣä bia kään, yɛn diaal yɛn ji̱ pekni ɣɔaa! Kɛ ɣöö ɛ ɣän la Kuoth Nhial ɔ, thilɛ Kuoth mi dɔ̱ŋ ɛ ni ɣän.

²³ Ɣän puɔ̱nydä cä rɔ yac, ɣän cä ruac mi thuɔ̱k lat, ruac mi /cä bi nyɔk i̱, “Bi mua̱a̱l diaal rɔ̱ goŋ nhiamdä, kä bi lëëp diaal rɔ̱ yac.”

²⁴ Kä bi naath ruac kɛ kui̱dä ɛn ɣöö, cuɔ̱ɔ̱ŋ kɛnɛ buɔ̱m bäkɛ kä Kuoth Nhial. Kä nɛy diaal tin gak kɛ ɣä, ba kɛn diaal jak kä po̱c.

²⁵ Kɛ Kuoth Nhial bi gaat I-thɛ-rɛl diaal gɔɔy jek kä ba jɛ liak.